Teena e Uaine moliaga e 32

By Deidre Tautua – Fanene 30 January 2018, 12:00AM

Ua te’ena e le ali’i o David Nomereta Uaine moliaga e 32 o lo’o fa’asaga i a te ia e aofia ai moliaga o le faia lea o ni fa’amaumauga sese ma lona fa’atauina faalesolitulafono o tusifolau Samoa i luga o fesootaiga faatekonolosi.

O le tete’e a lea alii na auala mai i lana loia o Unasa Iuni Sapolu i le aso ananafi.

O le loia o lo’o tula’i mo le itu a leoleo o Fatumanavaupolu Ofisa Tagaloa.

Sa tula’i Uaine i luma o lana afioga i le Faamasino Sili, Le Afioga i a Patu Tiavasu’e Falefatu Sapolu.

“Lau afioga i le Faamasino Sili o lēo lo’o molia ua ia te’ena uma moliaga e 32 o lo’o fa’asaga i a te ia,” o le saunoaga lea a Unasa.

“O le umi fo’i o taualumaga o le faamasinoga e le’o mā iloa lelei ona e 32 moliaga o lo’o fa’asaga i le o lo’o molia nei.

“O lona uiga e fai si umi o taualumaga o le fa’amasinoga pe a fua atu i le tele o moliaga.”

O le aso fa’atulagaina o taualumaga o le fa’amasinoga i lea mataupu ua tolopoina nei i le Aso 14 Me, 2018.

O le ali’i o Uaine sa fa’apea ona lokaina i le tausaga ua mavae ona o ni tu’uaiga o lo’o faapea ona fa’asaga i a te ia o lona fa’atauina atu lea fa’alesolitulafono o tusifolau Samoa i luga o fesootaiga faatekenolosi i Aferika i Saute.

O le lua vaiaso na se’i mavae atu nei na tatalaina mai ai lenei taule’ale’a i tua e tusa ai ma le talosaga a lana loia.

O aiaiga o lo’o tataina ai Uaine i tua o lona saini lea i le ofisa o leoleo i Afega fa’apea ai ma le tu’uina atu o lona tusifolau i le ofisa o resitala, ma ia nofomau i lona aiga i Tuana’i.

By Deidre Tautua – Fanene 30 January 2018, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>