Amataga maoa’e o le tausaga mo a’oga
Tusia - Ilia L Likou
Faaliliu e Seagaitumua Tupuola.
Na amata le tausaga a’oga fou a le St. Mary’s Primary School i se Misa Sa i le Kafetala i Mulivai ananafi. Fai mai le Pule-o Sister Masele Tenasio o lea Misa Sa o se avanoa lea e faapa’ia ai ma tuuina atu le latou galuega i le Atua Silisili Ese. “O la matou Sauniga faale-tausaga lea o le Misa Sa e talosagaina ai le Atua mo Lana puipuiga ma Lana Ta’ita’iga ia i matou uma lava ta’ito’atasi ao matou faagasolo le amataga o lenei tausaga,” o le saunoaga lea a le Tamaitai.
E tumau pea ona i ai le lagona i taimi uma i totonu ia i matou e faapea e le mafai ona matou alo atu e faagasologa galuega masani o lenei tausaga e aunoa ma le sailia muamua lava o le Atua.” “Matou te mana’omia Ana faamanuiaga i luga o a matou fanau, faia’oga ma matua. E mafaia mea uma e ala i le Atua.”
E sili atu i lo le selau matua, o e tausia ma e lagolagoina le a’oga sa auai i lea sauniga. Sa filo ia i latou se tina e 48 tausaga lona matua o Fala’i Ulugia mai Vaiusu o ia lea na fai mai o lea sauniga o se fuafuaga lea e sili ona lelei. “I le avea ma tina, ua ‘ou fiafia lava e vaai tino i lenei mea,” o lana faaaliga lea.
“O se mea lelei tele le tuuina atu o a tatou fanau pele i le Atua ma faailoa ia i latou le ala e viia i le Atua mo le meaalofa o le ola ma o latou ola. “E le gata ina tatou ave i latou i le a’oga ina ia mafai ona aoaoina i latou mo se lumana’i manuia, ae tatau foi ona tatou aoaoina i latou pe faapefea ona ola faatasi ma le Atua i aso uma lava.
Ina ua mae’a le komunio, sa faamanuia atu i ta’ita’i o le a’oga, kapeteni o ‘au ma faia’oga.
“Sa matou tauivi e faatulaga ma ola i le olaga faa-Kerisiano e ala i le faatulagaina o olaga o tamaiti ma le tausia o tamaiti ua tuuina atu i le tatou tausiga tau aoaoga faatasi ai ma le alofa ma le faaaloalo,” o le faitauina lea o tautoga a faia’oga na fai.
“Ua matou tuuina atu atoatoa i matou i lenei auaunaga e faa-evagelia ai ma faaleleia le aoaoga faa-Ktoliko tau le aoaoina pa’ia ma e ala i le faaolaolaina pea o la matu vaala’au ma le faamaoni i le agaga o Maria lo tatou faata’ita’iga ma lo tatou faa-Tina.”