1. Ua matauina i Tala Fou se ulutala fai mai ua faasolo ina foliga leaga le Faiga-Palota!

O lea la ulutala e faasino i le taua mo le nofoa o le Taulaga-o le Itumalo i le Taulaga i Sisifo. Ona o lea la itu-o lea ua ofo atu ai e le sui faatu o Faumuina Asi Wayne Fong-se taui e $1000 mo soo se faamatalaga e uiga i le tagata na faaleagaina lana laupapa  faalauiloa o lana faatosina i Sinamoga! Ae le ona pau lea o le tupe ua ofo atu! Ua toe ofo atu foi ma le isi $1000 i le taimi lava e maua ai lea tagata ma faasalaina…..! O le fesili la ua tulai mai-aisea ua faapenei ai le atunuu?

Afai o se sui faatu o le itumalo na faatu ai lea laupapa-aisea ua faaleaga ai? O nei la faiga uma- e pogai mai faiga pi’opi’o ia ua sasao faa-afi i totonu o le atunuu! O lea ua tulai mai uiga mataga talu ai lava nei mea o faiga-Pati! O a la mea mataga faapenei e tutupu mai- e le kea i ai polokiki leaga ma faiga-vaega faa-polokiki!

E tasi lava le mea e mana’o i ai-ia manumalo-ae le taua pe o le a le faiga na manumalo ai ae pe na sa’o pe leai! O le ata la ua aliali mai-e i ai le taimi e toe fetaua’I ai lava tagata Samoa-talu ai nei mea o faiga faa-Pati! Afai la e le’i talia e o tatou matua i le amataga ia ituaiga o pulega-malo-o le a le pogai ua tatou fiafia ai e fai nei mea o Pati? O se mea e masani ai ona pulea Samoa e se vaega faa-upufai poo sui o le atunuu atoa? Ia o lea ua amata ona aliali mai uiga mata’utia o faiga-pati! Aisea?

E tasi lava le faamoemoe o soo Vaega Faa-Upufai-“ia na o ia lava e pule i mea uma-tusa lava pe le o se mea e pule ai. O lea la ua tatou vaaitino i le faamoemoe o faigamalo faa-Pati! O le mea taua –o lana pule toatasi-pulea o mea uma mo latou lava manuia-ae le kea i le atunuu ma lona manuia! O le a sou taofi?

2. Matauina I le Televise ma Tala Fou le tulaga faigata o le Faiga Palota Lautele o loo loma nei- e tusa ai lea ma vaega faa-upufai o loo tauva mo le faafoeina o le Malo. Ua matauina foi o le vaega tele lava o sui faatutu mo le faiga-palota-e lagolagoina le HRPP!

O lona uiga la- e le o toatele ni sui tauva mo le Itu Agai-ma e le o iloa pe o le a le mafuaga! E aliali mai foi- e peiseai e le o malosi se taumafaiga a le Tautua Samoa Party-e ala I ona sui tauva mo le Palota-ina ia manumalo i le Faiga-Palota-ina ia mafai ai ona ia faafoeina le Malo o Samoa.

A toe faaupu la-ona faapea lea e peiseai o loo faamoemoe le Tautua Samoa Party I se vavega! Ia-e moni lava e i ai vavega-ae tasi lona –e na o le Atua na te faia vavega-ae na o mea faa-taulaitu poo mea faa-maneta e mafai ona fai e le tagata! Afai la sa matua galulue punoua’i  le Tautua Samoa Party e tusa ai ma lo latou malosi ina ia manumalo i le faiga-palota-sa tatau foi ona toatele ni o latou sui faatutu! Ae ui o lea-o le itu e tatau ona faailoa atu e faapea-afai o loo malepe totonu o le Tautua Samoa-ona o le le faamaoni o ona sui faipule-e le mafai la ona fai se vavega  I lenei itu! Afai la e tausolomua i sui o le Tautua Party ona le tumau i le mea na tauto muamua ai-e faapefea la ona maua ni malo- e le o galulue faatasi ma e le o fetalitonua’i? O le a sou taofi? 

Matauina i le Talanoaga i le Ala ma nisi o sui o le atunuu le malosi o le lagolago a tagata mo le HRPP o loo faafoeina nei le Malo. O molimau la a ia sui o le atunuu fai mai e ma’eu le lelei o le vaaiga o le atunuu e le HRPP. Tele atiina a’e ua latou faia talu mai le 35 tausaga talu ai-ma o tupe a le atunuu na fai ai ia atiina a’e. Fai mai isi ua tele fesoasoani a le HRPP I tagata ma o le pogai lea ua toatele ai sui faatutu o le HRPP mo le faiga-palota lautele.

O isi fai mai e tele a’oga ua fesoasoani i ai le malo.

O le a se isi mea tatou te toe manaomia mai le Malo ua 35 tausaga o ona pulea le atunuu! Ia-o finagalo faaalia ia na faaalia mo le Talanoaga i le Ala-ae ia manatua-ana moni ma faamaonia ia mau e pei ona tuuina mai-faamata e mativa faapenei le atunuu? A toe tuu atu foi i finagalo faaalia o le atunuu i le Talanoaga i le Ala ma le pogai latou te lagolagoina ai le HRPP mo le Faiga-Palota Lautele i le masina fou-o le itu e ofo ai e leai ma se tasi o lea Talanoaga i le Ala na ia ta’ua faiga pi’opi’o a le HRPP lea e faitau miliona ma miliona tupe a le atunuu ua magoto ai i le moana sausau-ma o le pogai lea ua matitiva ai le atunuu! Poo ai lava la e fai mai e leai se mativa i Samoa-ae ua lava ma totoe tamaiti ia e feoa’i solo i le alatele i le ao ma le po e tau faatau atu ni oloa e tausi ai lo latou aiga! E faapefea la ona fai mai i latou nei i le Talanoaga i le Ala o loo manuia Samoa? O le a sou taofi?