MATOU TE FA’ATO’ESE ATU

By Vatapuia Maiava 23 March 2016, 12:00AM

O le Agaga o le Eseta na matua manino mai ananafi, ina ua toe fa’atasitasi Avele, o Sagato Iosefo ma Sagato Poseko e tanuma’i o latou ‘ese’esega sa iai ae alo e to’ele ma fa’ato’ese ma fa’amagalo le tasi i le isi.

Na to’atutuli ma loimata o le salamo, fanau-a’oga e fa’ato’ese, talu ai le vevesi i fusu’aga ma tauga-ma’a sa va’aia i Savalalo, lea lava na i’u ina falema’i ai nisi o faia’oga ma tamaiti-a’oga i le vaiaso talu ai. 

A to’aititi mai, e to’aono tamaiti na loka ai ma taofia e leoleo ma o lo’o fa’atalia nei se aso e tula’i ai i luma o le Fa’amasinoga.

O ananafi la, na amata lava i le taeao ona o’o atu Kolisi o Sagato Iosefo ma Sagato Poseko i Avele e fa’ato’ese ona o lo latou fa’aletonu ma a’afiaga i ia vevesi.

Na mae’a lea, ae aga’i mai Avele i Kolisi uma nei e lua – Sagato Iosefo ma Sagato Poseko, e to’atutuli ma fa’ato’ese fo’i latou, ona o le mea na tupu.  

Ina ua mae’a, sa toe fiafia fa’atasi tamaiti-a’oga uma o kolisi nei e tolu, ma toe maua le agaga o le fai-fai-mea fa’atasi i le fealofani. Sa fa’atalofa ma lulu-lima, fusifusi ma sisiva ma fa’amafanafana le tasi i le isi i le agaga fiafia ina ua mae’a ona fa’alelei. 

O le Afioga a Patele Christopher J. Ford, le Pule o le Kolisi a Sagato Poseko na tima’i i fanau-a’oga uma, i le taua o le filemu. 

“’Ou te fa’ato’ese atu ma le agaga-maulalo ia Avele fa’apea fo’i Sagato Iosefo, ona o aga a Sagato Poseko, ua tupu ai le finagalo-tiga ia ‘outou ma le to’atele o isi Samoa,” o ana saunoaga fa’ato’ese ia.

 “’Ou te fa’amalulu atu ona ua outou tiga talu a matou aga-so’ona fai. E fa’ato’ese atu fo’i ona o taimi ua tulolo ai le fa’amoemoe ona o a matou aga, ua le atagia ai se lelei. E fa’amalulu atu ona o a matou aga ua fa’atupu ai le loto-ita i lo tatou nei lotoifale ae maise lava lo matou fa’aopopo atu i tiga ma mafatiaga o Iesu le Fa’aola, ae le fa’asoa fa’atasi ma Ia lona lava satauro.

 “Fa’amolemole fa’amagalo mai a’u nei, fa’amagalo a matou tamaiti-a’oga ae maise le matou a’oga aua  ua matou talitonu fa’amaoni, o Sagato Poseko lava na fa’ananau ina ia tu’u-fa’atasia tagata uma i le filemu o Le Atua.”  

Na fa’aauau pea le saunoaga a Patele Christopher, e momoli atu se fe’au aoga mo tamaiti-a’o’oga o a’oga uma e tolu. 

 “O le mea lona lua ‘ou te fia tautala iai, e ‘auga lava i le fiafia; o sauaga ma misa’aga fa’apenei, e le maua ai se fiafia. Na ‘ou fesili i a matou tama-a’oga i le Aso Faraile, “po’o ai o fiafia i le asō ina ua mae’a fusu’aga ananafi, nai lo le taimi e le’i tupu le vevesi?’

“E leai se isi na tali!! Sa fa’anoanoa tagata uma; o misa’aga ma fusu’aga, e le maua ai se lelei, na o le leaga lava, o fusu’aga ma misa, e tele ai isi fa’alavelave e tutupu ae le fofoina ai ni fa’afitauli, o vevesiga fo’i ma misa, e fa’anoanoa ai tagata. 

“Pei lava ona faia nei i tamaiti-a’o’oga o Avele, ua fa’anoanoa, e fa’apena fo’i le fa’anoanoa ai o tamaiti Sagato Iosefo ma Sagato Poseko fo’i.”

Mo pule-a’oga, o faia’oga ma tamaiti-a’oga uma e le’i a’afia i nei vesiga, ua matua le fia iai lava – ua fiu fo’i i nei mea o fusu’aga a a’oga.  

 “Ua lava ia nei mea, ua tatau ona tu’u. Tula’i mai mo se filemu, tula’i mai mo se fiafia, tula’i mai mo se lelei; manatua, o lou sao lena ma le fa’amoemoe lena o tamaiti-Avele uma, tamaiti Sagato Poseko ma so’o se a’oga lava i Samoa nei, e tatau ona fa’atino o le mea sa’o ma lelei. 

“E fiafia le tiapolo pe a leai se galuega lelei a tagata e fai, e fa’apena fo’i pe a le faia e tagata le mea sa’o ma lelei.”

Na ioeina uma e faia’oga o a’oga e tolu, le fe’au a Patele Christopher mo fanau-a’oga , ma ua o’o i le taimi ua tatau ai ona fai o le mea sa’o, fai o le mea e lelei, o le taimi mo le filemu.

“Fai le mea sa’o; fa’atino nei ma fa’ataunu’u le filemu ma faia se fa’aleleiga. Manatua lelei i lenei taimi fa’apitoa o le tausaga, ua tatou tutu fa’atasi uma ai ia Keriso, i se ‘auala filemu ma maualalo,” o lana tima’i lea. 

“O tatou uma o lana fanau, o tama ma teine o fanau a Le Atua, o uso ma tuafafine uma o Iesu. Tatou tutula’ia, ia alofa le tasi i le tasi e pei o uso ma tuafafine ia Keriso”. 

By Vatapuia Maiava 23 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>