La’uga-oneone ma le si’isi’i o le suasami ua si’itia ai i uta Solosolo

By Pai Mulitalo Ale 16 May 2016, 12:00AM

O le Sunami o le 2009 na a’e ai se tofa a’o se fa’autaga i le afio’aga o Solosolo, e talanoaina le fa’ase’e atu o le afio’aga i nofoaga maualuluga.

Na ta’ua e le Afioga a To’omata Nora Leota – o se tamali’i o le afio’aga, na laga le mata’upu lea i se fonotaga a le nu’u ma e to’atele ua manana’o e si’i i uta, ona ua silafia le le-saogalemu o le afio’aga i le taimi nei, ona o le si’isi’i pea o le suasami.

E to’atele aiga o le afio’aga e le o matua ano tele i le fa’afitauli lea i le taimi nei, peita’i na ta’ua e To’omata, talu ai ona ua amata-mea le fa’afeagaiga o le EFKS, ua to’atele fo’i ua manana’o ai e aga’i i uta.  Ae le-na o a’afiaga fa’aleNatura o lo’o fesoasoani i a’afiaga o le afio’aga; o lo’o iai fo’i le sao o tagata i lea fa’afitauli.

Ua amata ona goto i lalo le tali-galu fou sa faia e taofia ai le tafia o le ‘ele’ele, lea na ta’ua e To’omata, o le la’uina o le oneone mai  le lotoifale o le afio’aga, le ‘autu moni o le fa’afitauli ua va’aia nei. 

Na ta’ua, ua tele kamupani ua va’aia o la’u le oneone mai lo latou nu’u ma ua mae’a ona latou logoina le Matagaluega o Puna’oa Fa’aleNatura ma le Si’osi’omaga, mo se fofo aua e talitonu le afio’aga, o le la’uina o le oneone mai lo latou n’u , ua afaina ai lo latou nu’u ae maise le soifua saogalemu o tagata uma, lea o lo’o matua atugalu iai. 

Na fa’ailoa fo’i e To’omata, po ua tolu nei tausaga talu ona si’itia le to’atele o le nu’u ma o se vaega pe 60 pasene  o aiga, ua iai nei i nofoaga maualuluga, ma e to’aitiiti lava o lo’o iai pea i nofoaga tu-lalata i le sami.   

E afaina gofie lava le afio’aga lea, ona e le gata i le si’isi’i pea o le suasami ae fa’apea ona afaina pe a lolo vaitafe i itu uma e lua o le afio’aga.  “Na matua afaina lava matou i le sunami o le 2009, lea na tele ai ina taufetuli le nu’u nei i nofoaga maualuluga, ma o le mafuaga lena ua tonu ai i le tele o aiga, e sili ona nonofo tumau ai loa i uta,” o le fa’aaliga lea a To’omata. 

E le gata fo’i i lea, a o le sao o le sami i le malae o le nu’u i le taimi nei, ua avea ai e pei o se vaituloto pe a o’o ina sua o le tai. Sa talosagaina se fesoasoani mai le Matagaluega o Puna’oa Fa’aleNatura ma le Si’osi’omaga, i se ‘auala e taofia ai le sami mai le o’o mai i le malae ma fanua o le nu’u, ae sa le-manuia fo’i. 

“O le isi sefulu tausaga o muamua, e lilofia ai le malae atoa o le nu’u i le sami,” o matematega lava ia a To’omata.

Na ta’ua fo’i, o le tulaga lea ua iai nei le fa’afitauli o le suasami, ma sa iloa i le taimi ina ua ‘elia le tu’ugamau o lona tua’a, a ua lilofia e le sami, pe o le 10 futu i lalo.

 “E fa’afetai lava ona e tele fanua i uta, e maualuluga e fa’ase’e iai matou ma e talosia fo’i, ia silasila toto’a aiga o lo’o totoe nei i tai, ina ia se’e atu i uta mo le saogalemu,” o le fa’aaliga lava lea a To’omata.

Na ta’ua fo’i, o le to’atele lava o aiga, o lo’o fai-fai-malie lava talu ai, ona o mana’oga tau-seleni ae maise o so’otaga ma talitonuga fa’aEkalesia. 

Moni la ua to’atele o le afio’aga ua i uta, ae na ta’ua, o lo’o iai pea le Ekalesia Katoliko ma le EFKS i le a’ai i tai. Saunoa To’omata, o le mafuaga tonu lava le o le fo’i atu o le to’atele o le afio’aga i tai, ona o sauniga fa’aleLotu.

“’Ou te le-iloa po’o afea e se’e ai i uta ekalesia nei e lua, ae talosia, ia vave fai o se tonu mautu.” 

By Pai Mulitalo Ale 16 May 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>