Una’i fanau i aoga – Fa’atasia

By Ilia L Likou 11 October 2017, 12:00AM

O le olaga lenei a le lulū ma loimata e le mafai ona fa’aeaina.

O lea le talitonuga o le tinā i a Fa’atasia Salea, 53 le matua o le soifua o Nu’u Fou.

E maua le fa’atalatalanoaga ma Fa’atasia o lo’o aga’i i lo latou aiga fa’atoā fo’i mai le Kolisi o Uesile i le totogiina o pili a lana fanau e to’alua aua suega fa’ai’u o le Tausagfa 12 ma le Tausaga 13.

“Ia e pei o lea le tulaga o lo’o ua i ai nei, o a’u na ou usu atu i tai i le aoga a le fanau e totogi pili a le fanau e to’alua e pei ona masani ai.” O lana saunoaga lea i le Fofoga o Samoa.

“O si o matou aiga e to’agaogao lava e tasi si o’u tuagane olo’o faigaluega i le taimi lenei, ma se tasi o le fanau ia ma e toe pau lea o le fanau aoga o lo’o ua totoe, lea e i ai le to’alua lea na ou usu atu e totogi a la pili aoga.

“O le itu mautinoa ia e le’i lelei se Lotu Tamaiti a le fanau i le tau sefesefeina o le tupe aua lava  fanau.

“E le’o iloa mai lava e le lalolagi na’o le iputi laumoli lae fai le Lotu Tamaiti ae a le o fanau i suega fa’ai’u o le tausaga o le ma’imau atoa o le malosi.

Na ia fa’ailoa e latalata le $500 le tupe fa’aaluina mo pili lava ia mo suega fa’ai’u o le fanau i lenei tausaga.

“Ia e $280 le Tausaga 13 ae $245 le i le Tausaga 12 ma o se itu  ua taugata lava ua o’o atu ai le taugata o aoga a fanau.

“E pei ona ou fa’ailoa atu, o lea lava le fa’amuamua mo a’u lava ia o si o’u fanau, out e fa’afetai ai lava i si o’u tuagane o lo’o fesoasoani malosi mai le taimi lenei.

“O le lu’i fo’i lea o lo’o ave i fanau ia to’a’aga i le aoga ma fa’aaoga tatau tupe o lo’o alu ai, aua e le gata ina selesele matou (matua) ae o latou lumana’i fo’i.

O lona talitonuga ua le toe faigofie nei aso.

“O le itu mautinoa lava lea i lo’u iloa i ai, aemaise lava i aoga a le fanau ua talanoa lava i nonogatupe mea e fai ai mea uma.

“A e le alofa lava oe ia ia olona uiga ua le avea lau fanau i le aoga, o la’u ia lu’i i matua ia aua le fa’avaivai.

“E tatou te fa’avaivai loa, e leiloa le mea o le a o’o ai mafatiaga a nai o tatou fanau i le lumanai.

“E le paū fua lou afu matua, a e lulu lava ma le fa’amaoni ia e te selesele ma le fiafia i le lumana’i.

By Ilia L Likou 11 October 2017, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>