Mana’omia se suavai ma se eletise
O ai ea sa faapea mai ua uma aso sa mafatia ai le suavai ma le eletise?
A o lea e o’o mai lava i lenei taimi, o lo’o iai pea latou o lo’o nonofo e aunoa ma se suavai.
Sa taua e Petaia Talalima mai Tiavea-uta lenei tulaga.
O Petaia ma lona aiga fa’atoa a o ese mai Falelauniu. Ua atoa nei le masina ma nai vaiaso talu ona latou nonofo i le latou nofoaga fou.
“O le fanua lea, o le fanua a le aiga a si o’u to’alua; lea la matou te nonofo ai faatasi ma le ma pepe."
“O mea taua la ia matou te le’o maua, o le suavai ma le eletise."
“O lea la ua silasila atu, ia ua ma’ea ona uaea uma totonu o le fale, ua uma foi ona totogi le E.P.C, toe a la o le faaolaina o le matou eletise, aua na omai le E.P.C. le vaiaso ua te’a ae faimai la e sese le faiga o uaea."
“Ia ua le malamalama la poo ai o lea faia lenei galuega."
“E mana’omia lava le eletise iinei aua e fai lava sina pogisa ma e leai foi ni pou muli i luga o le auala."
“E mana’omia le suavai i le faiga meaai, faapea foi le suavai mo le inu ia ae maise lava le ma pepe."
“Ai lava o le alofa o le Atua lea e timu ai iinei i le tele o aso ae matou te le faamoemoe tele la i ai aua e le talanoa a sesi ma le finagalo o le Atua."
“O si aiga la lea e tala atu o matou, lea e agalelei mai i le latou suavai ma o latou foi lea sa maua mai ai a matou tane vai.”
E mana’omia lava se fesoasoani i se tane vai.
“O le matou aiga o se aiga vaivai, e o’o foi la i le matou fale, ia e tau le lava tapoleni e tali ai le timu pea malosi."
“Ae o lea e lelei a matou meaai aua o lea e i ai le maumaga ma o lea foi e iai a matou aiga i Apia e fesoasoani mai isi taimi."
“O lea lava e tau atina’e atu le maua aiga.”
A e fia fesoasoani ia Petaia Talalima mai Tiavea uta, fa’amolemole fa’afeso’otai o ia i le numera 7715144.