O LA’U TALA FO’I

30 March 2016, 12:00AM

1. Matauina i Tala Fou le anoano ma le felanulanua’i o tapenaga a vaega a nisi o Ekalesia mo le faamanatuina o le Maliu ma le Toe Tu Manumalo o le Keriso ma le Faaola mai le oti ma le tuugamau.

O le matau la i le felanulanua’i o ia tapenaga-o le tupulaga talavou lava o teine ma tama sa faatinoina-ma o ia taumafaiga uma-o le faatinoina lea o le Upu Folafola i le tupulaga lalovaoa o le atunuu!

Ia o nei mea uma-o mea e tatau ona tatou faia-talu ai o lo tatou lavea’ina ma le faaolataga mai le oti, agasala ma le malaia-o le aano atoa lea o le Maliu ma le Toetu Manumalo o le Faaola!

E ui lava la ina faapea o le tofi o le tagata o le sese-ae o le 99 pasene o tatou olaga-tatou te fiafia tele e fai mea sese ma mea e inosia e le Atua!

O le uiga la o se faamatalaga-e le faapito i se tasi nei sese ma faaletonu-e afua mai lava ia i latou ua ta’ua o ta’ita’i o le atunuu, nuu ma itumalo-ona fai pea mea sese!

Afai la o le tofi o le tagata le sese-ia atonu e na o le Atua na te silafia ma ati lana silafaga i le mea e igoa o mea sese; ma poo a foi ituaiga o agasala e pei ona faaigoaina ai e isi Ekalesia-ae atonu ua lava ma totoe lo tatou iloa i le uiga o lea upu o le ‘sese’!

Afai la ua tatou iloa ma manino lelei i le uiga o lea upu o le sese-ona faapea lea o se manatu-o le maliu tiga o le Keriso ma lona Toe Tu Manumalo-o lona uiga-o le mana o lona Toe Tu Manumalo-ua tatau ona lava ma totoe- e fai ai se suiga i o tatou olaga-nei ma ieluā!

O le a sou taofi? 

2. Ua toe matauina foi i Tala Fou ni ata o ni pagota-faatasi ai ma se ulutala fai mai-“Ua sili atu i lo le tausaga atoa-o tafafao lava i tua ia pagota…!

O le uiga la o lea ulutala-e matua leai lava ma se mea a le Vaega o Falepuipui o faia-e saili ai ina ia maua ia pagota ma toe avatu i le Falepuipui! O le fesili la-o le a le pogai ua tuufau ai pea nei pagota i tua-ae leai se gaoioiga a le Vaega o Falepuipui o faia i ai?

Afai latou te le o mafai ona faatino o latou tiute-o le a le mea e saga maumau ai tupe a le atunuu i o latou totogi-ae na o le nofonofo le mea o loo fai-ae sa’oloto pagota i tua? Aisea ua le mafai ai ona fai se faiga e matua taofi ai lea mea o le sosola i tua o pagota?

O lea la ua aliali mai iinei-e matua le mafaia lava e le Pulega o Falepuipui o loo i ai nei-ona faatino o latou tiute-ae maumau ai tupe a le atunuu! E le o le taimi muamua lenei ua sosola ai i tua nei pagota? 

O ai e tuua’ia pe a fasioti e nei pagota ni tagata o le atunuu? Afai la e le o iloa e le Pule o le Falepuipui le faiga e taofi ai lenei faafitauli-aisea e le avatu ai ni filifili u’amea ma ni loka e saisai ai ia pagota ma le sosola soo i tua?

Afai la o le faiga lenei o le nofonofo ae tuufau pagota e o e tafafao i tua-o le upu moni e ta’u atu-e maumau tupe a le atunuu i se falepuipui fou-ae o le mea lava e tasi! Ua fai ma vaisu o nei pagota le sosola i tua!

Afai o le taimi o galuega  a pagota lea e sosola ese ai pagota-o le a le pogai e saga tuu ai ia pagota e o i galuega a pagota pe afai o iloa lelei e le Pulega o le taimi lea e sosola ai? O a mea a Leoleo o le Falepuipui e fai-ae le o e vaai galuega a pagota?

Afai la e manatu le Pule o le Falepuipui e tatau lava ona auai ia pagota i galuega fai a pagota-aisea la ua le mafai ai ona outou o e vaai faalelei ia galuega ina ia le mafai ai ona toe sola se pagota i fafo? O le a sou taofi? 

3. Matauina foi i Tala Fou fai mai e leai lava se tasi ua masalomia i le maliu o se tina matua Penisione ma e leai foi nisi ua avatu i le Ofisa o Leoleo ina ia fesiligia ma su’esu’eina!

O loo faapena foi ona faaauau su’esu’ega e tusa ai ma le talepeina o le fale o lea tina. I le taimi nei la e tusa ai ma le faaaliga a le Fofoga o le Matagaluega o Leoleo e faapea o lea faalavelave –ua faatatauina o se mea na tupu….!

Ia e ui lava ina ua maliu lea tina ma o loo faia pea suesuega i le mafuaga o lona maliu-ae o le upu moni lava-e leai se mea e tupu fua-ae ailoga e mafai e se tina faapea ona pule i lona lava soifua? 

O le a sou taofi?

Matauina pea lava pea i nei Aso Malolo o le Eseta le tulaga mata’utia o uiga o avetaavale i Samoa nei –aemaise ai lava le tupulaga o tama ma teine talavou –le feoa’i solo i afiafi o faiga-lotu a aiga-ma latou taavale leoleoa i le musika-pisa ma toē leo-tetele!

O ia foi avetaavale-e le o ni Papalagi-ae o tagata Samoa lava. O le fesili ua tula’i mai-pe o le mea ‘ea ua faaletonu mafaufau o ia tagata?

O le isi fesili-o nei ‘ea tagata na ola mai o latou nuu i le salafa o Upolu poo Savaii-lea o loo faafino ai vavao i afi mo faiga-lotu-ma Sa se’ia pa’ia le taeao o le isi aso? Afai la o ia tagata e mai Upolu nei i nuu i tua-ma Savaii-o loo fai ai vavao i afiafi uma mo faiga-lotu ma le Vavao mo le po atoa-aisea ua sui ai o latou uiga ma amio faapenei?

E mafua ‘ea ona ua maua le taavale? E ofo le loto pe afai e le o iloa e nei tagata uma- toetoe lava o taavale uma e tofu ma le leitio ma le laau-pese! O le a la le pogai e saga ki ai i lugā laau pese o a latou taavale ma le maloā?

E mafua ‘ea ona ua poto tele pe ona o le faavalevalea ina maoa’e? O le a sou taofi? 

30 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>