Share

O le afiafi o le Aso Faraile na tea nei, na faatautaia ai le Tauvaga Tausala o Samoa, aua le sailia o se tamaitai o le a tulai mai e fai ma sui o Samoa mo le tauvaga Tausala o le Pasefika, mo le 2013-2014.

O le tamaitai Tausala o Susana Fanueli, 23 tausaga, ua tulai mai na tau’aveina le pale o le Tausala o Samoa mo le 2013-2014, e sui i le tamaitai o Janine Tuivaiti, lea ua maea lona tofiga i lenei tausaga. O lea tauvaga tele, na faataunuuina lea i le Hall a tupulaga a le EFKS i Sogi.

I le maea ai o le tauvaga na ia saunoa mai ai ua lagona le faageetia ma le mafanafana o lona loto, ae le gata i lea, o le maua lea e ia o le tooa i taimi uma.

“E momoli atu lau faafetai i lou aiga, o au uo ma lau aufaigaluega atoa mo le lagolagoina o au lea ua mafai ai ona ou tulai mai e avea ma Tausala o Samoa mo lenei tausaga,” o lana saunoaga faatopetope lea i le maea ai o le tauvaga.

Na ia saunoa foi o le a ia galue malosi mo lenei tausaga ma le tausaga fou, ao avea ai o ia ma amepasa i totonu o le atunuu.

O le tamaitai ua faapaleina mo le Tausala o Samoa mo lenei tausaga, o le alo o Lupematasila Reti ma le tina o Legaasa Fanueli.

O ia o se tamaitai tuai o le Kolisi o Samoa, ma sa fa’amanuiaina o ia e ala i se fa’ailoga sikolasipi e suesue ai mo aoaoga i totonu o le Iunivesite a Victoria i Ueligitone i Niu Sila. O loo glaue nei Susana o ia o se Pule ma Suetusi sili  a le Malo mo le taimi nei.

“Matou te ave le faafetai i le Atua, ona o lona alofa ua mafai ona faaiu lenei tauvaga ma le fiafia. Ou te faafetai foi i si au tama o Sana, ona o lona faaeaea aiga, ua mafai ai ona avea o ia ma tamatai Tausala o lenei tausaga” o le fa’amatalaga lea na tuuina mai e le tina o Lagaasa, ma lona mimita tele.

O fa’ailoga na manumalo ai le tamaitai o Susan, o le Ata Lelei ma le taleni.

O le tamaitai na mauaina le tulaga muamua, o Muliagatele Renera Thompson, o ia foi lea o le Tausala Samoa mai Ausetalia. O ia lea na mauaina le manumalo i le Puletasi ma le Ofu Faaleaganuu.

O le tulaga lua na mauaina lea e le tamaitai o loo lagolagoina lea e le Mahealani Islan Wear, le tamaitai o Teagan Martha Moore, o ia foi lea na manumalo i le Ofu taele ma le Taligafesili.

O le tulaga tolu, na sola ai le tamaitai o loo lagolagoina lea e Samoa Lokostyle, Isabel Chadwick, na manumalo i le Miss Personality.

O le fa’ailoga o le Internet, na maua lea e le tamaitai o loo lagolago e le Veronica, Agnes Warren ma le tamaitai o loo lagolago e le Lavashe Couture na ia mauaina le fa’ailoga o le National Tourism, Setatia Stowers Brown.

Share

Please Register OR Login to comment.


Comment Policy: Please read our comment policy before making a comment. In short, please be respectful of others and do not engage in personal attacks. Otherwise we will revoke your comment privileges.