Share

O le fa’aiuga o le vaiaso na se’i mavae atu nei sa vala’au mai ai se tasi o tamā matua i a Samua Tavita Talapusi mai le itūmālō o Vaimauga ma fa’ailoa mai lona le fiafia i le tulaga e pei ona ua eliina ai nei le oneone e nisi o kamupanī i le vaega tonu lea o lo’o i ai le auala laupapa i Vaisigano.

O lenei tulaga e pei ona ua ia ta’ua le le lelei tele ai o lea vaega o lo’o fa’atinoina e i latou nei, ma o lona manatu ua tatau nei loa taofi. “Taofi le eli’ina o le oneone.”

“O le galo tele o a’afiaga e tula’i mai i i le taimi mulimuli ona o le mana’o i le tupe o le isi lea tulaga o le faia ai o nei gaioiga le talafeagai,” “O le auala laupapa e tatau ona va’ai lelei e pei o se tamā ma se tinā ua va’aia lelei la la’ua fanau, ma e ao ona silafia lelei fo’i o lenei ua savali i le 57 tausaga o lea auala laupapa, ma o se fausaga malosi tele pe a fua atu i ai i, ma e tatau ona va’aia lelei ni isinia mo fautuaga talefagai lelei ona fai ai lea otou uiga.”

“O se lapata’iga lea auā a tupu se fa’alavelave ua tigaina fo’i le mālō, ae tou matamata e pei oni vale, ae tou te le vālea, ae afai ua fa’atagaina fa’aletulafono ia va’ai po’o sa’o le suaina o lalo o le auala laupapa, a vaai lelei i le ata o le auala laupapa, ua pi’o leaga lava, ua amata ona goto i lalo le ogatotonu, ma o le tele ai le faigata mo tagata ma ta’avale.”

“O lea fo’i matou te manana’o i tupe ae matou te puipui ma fa’ataūaina ele’ele o Vaimauga ma lona si’osi’omaga i le fa’amatagofieina o le taulaga ma Samoa e pei ona fagufagu mai ai le Ofisa o Turisi.”

“E pei ona i ai Afioga Pa’ia a le Atua i le 1 Timoteo 6:10-11, Auā o le mana’o i tupe o le pogai lea o mea leaga uma lava, ua mana’o tele i ai nisi ona sesē ai lava lea o i latou i le fa’atuatua, ua tuia ai, ua ati i latou e i latou i puapuaga e tele.”

“Ou te matua mamao lava i le auala laupapa lea, o aso la ua leva sa tele lava
ona o matou tafafao ai i lalo ifo o le auala lea, ma ua tele lava suiga ua i ai i lenei vaitau, e matua’i le talafeagai lava lea tulaga o lo’o fa’atinoina e i latou nei.”

“O le tele o lo latou eliina o le vaega tonu lea o le a telē se avanoa e fa’aletonu ai pou simā tetele lea o lo’o fai ma poutu malosi e latou te taofi’ina lea auala laupapa, lona uiga e maualalo loa le eliina ai, o le a gau
ma malepe loa i lalo.”

O le aogā tele o lenei auala laupapa mo femalagaina o se tasi lea o tulaga taūa tele i le silafia ai e Samua ona o lo’o mafai ona feso’otai ai ma Matautu ma fa’asolo atu ai i le atu Vaimauga ma le tele o afio’aga i lea vaega o le atunu’u ma e na te iloa e le taumate le tele ai o tupe o le mālō e fa’aaluina ai.

O se tasi o sui o le kamupanī o le Bluebird i a Dury Westerlund lea o lo’o latou eliina le nofo’aga tonu lea, na ia ta’ua ai ua ma’e’a ona tu’uina atu e le Matāgluega o le Punaoa Fa’alenatura ma le Si’osi’omaga le fa’atagana latou te fa’atinoina ai lea galuega ma o le fa’ataunu’uina ai o se tasi o pōlōketi a le Matāgaluega o le Suavai o le auga tonu lea o lea elieliga oneone.

Sa taumafai atu i le Matāgaluega o Si’osi’omaga ma o latou fa’amaonia la latou fa’atagana aloa’ia mo le Bluebird e ala lea i le pemita.

O se tulaga na tete’e ai Samua ona sa ia fa’ailoa pe ua uma ona faia le pemita pe leai fo’i e tatau lava ona manatunatu lelei i vaega uma auā le agai i le lumana’i aemaise le saogalemū o tagata uma lava.

Share

Please Register OR Login to comment.


Comment Policy: Please read our comment policy before making a comment. In short, please be respectful of others and do not engage in personal attacks. Otherwise we will revoke your comment privileges.