|
Tomua mala i le malaga aulakapi Malisi mai Samoa |
|
Tusia: eventpolynesia.com
O le Aso Gafua nei e taliu mai ai i Aukilani le malaga ta’amilo a le Aulakapi a Malisi mai Samoa, lea ua manumalo i le siamupini o le 2010 i le ta’amilosaga a le Marist International Sevens fa’apea ma le Marist Champ of Champs sa faia i Ueligitone i le Aso Faraile ma le Aso Toanai ua mavae.
O se tala fa’afiafia loto ma o se matagi agi malie lea i le tapuaiga a Tama Tuai o Malisi ma aiga i Samoa fa’apea foi Niu Sila nei ua suiga malie ai tulaga fa’anoanoa i le fa’amanualia o le alii ta’alo ia Ben Leia i toe tapenaga a le aulakapi a o sauni mai mo lana malaga ta’amilo i Niu Sila.
O le susuga ia Ben Leia, 20 tausaga e mai le afioga o Satitoa i Aleipata o lo o taofia nei i le falemai i Motootua a o taumafai ai se avanoa mo togafitiga i Niu Sila.
 Saunoa le Peresetene o le Kalapu o Ta’aloga a Malisi i Samoa, afioga Tagaloa Fouina Su’a, “E ui o se tulaga faigata e le i fa’amoemoeina le fa’amanualia o Ben, peitai ua avea nei o se fa’amalosi au mo le aumalaga.”
“Ua iai le fesoasoani mai le pulega a le falekalapu o le 2ND LEVEL i Glen Eden i Aukilani i le fa’aavanoaina o le Aso Faraile nei e faia ai se fundraising e fesoasoani mo le tausia ma togafitiga o le alii ta’alo ia
Ben. O le a auai atu iai le aumalaga mai Samoa fa’apea le fa’amalumalu a le Asosi a Tama Tuai o le Malisi i Aukilani e lagolago i lenei agalelei,” saunoa iai Tagaloa.
O le uluai ta’aloga a le au tele 15 na malolo ai i le au malosi a Marist St. Patrick i Ueligitone. Peitai ua saunoa le alii faiaoga ia Muliagatele Brian Lima ua matuai sauni le aumalaga mo le ta’aloga ma le kalapu a Papatoetoe i le vaiaso nei ae maise le taualuga i le la ta’aloga ma lona uso tuofe ia Malisi Samoa i Aukilani.
O le Aso Toanai nei 13 Fepuari i le 10 i le taeao o le a faia ai le Po Siva mo le aumalaga i Tangaroa College sosoo atu ai ma le ta’aloga fa’apitoa ma Tama Tuai o Malisi i Aukilani i Tangaroa College lava.
Fa’aalia e le Peresetene o Malisi Samoa i Aukilani, afioga Luafalealo Felise, “Ua saunia sa tatou taumafataga ae maise se mea’alofa a le aumalaga aua lou aao foai i le Po Siva. E fa’atalauula atu ai i’a i latou uma sa a’otauina i Malisi Mulivai fa’apea Lotopa ma Alafua, aemaise o aoga uma a le Ekalesia Katoliko ina ia tatou feiloai uma i lea fa’amoemoe”
Saunoa Tagaloa, “O se seleni o le a maua mai le maau o aiga ma uo i Niu Sila o le a fesoasoani mo le aumalaga ae maise le fa’aleleia o le nofoaga ma le malae ta’alo a le Kalapu i Lotopa.”
O le 9 i le afiafi o le Aso Toanai o le a faia ai le social tele i le faletafao o le BOG i Manukau e fiafia fa’atasi ai ma aiga ma uo ma fa’amavae atu ai i le aumalaga mai Samoa.
Isi sui o le malaga e aofia ai le afioga Muagututia Oliva Fidow o le taitai malaga fa’atasi ma le faufautua o le aumalaga, le tofa Tuilagi Maiava Saipelel Esera.”
Mo nisi fa’amatalaga i polokalame a le aumalaga i Aukilani, fa’afesootai Luafalealo Felise i le telefoni 818-1802 poo Gaono Mike Smith i le numera (0274) 872-993. Back
|
