Share

E laititi lava se fa’amama avega a le fa’amasinoga i se alii e le’o setaimi muamua lea ua molia ai i ni moliaga e aafia ai ni tama’ita’i.

O le aso Gafua lea na faia ai le fa’aiuga a le Fa’amasinoga Maualuga i le alii o Tolo Koroseta 30 tausaga lea ua fa’asalaina mo le 10 tausaga e nofosala ai i le falepuipui ina ua fa’amaonia lona moliaga o le faiaiga fai fa’amalosi ma le ave fa’amalosi o se tagata.

O lenei fa’aiuga na faia e le afioga i le Fa’amasino, Vui Clarence Nelson. O le tama’ita’i na aafia i lenei mataupu e 22 tausaga ma o ia o le uo teine a le uo tama a le ua molia. Na manino i luma o le Fa’amasinoga o le ua molia ua fa’aipoipo ma e to’afa ona alo,peitai ua tetea i le taimi nei ona e mafua mai i le solitulafono lenei.

Na fa’aalia e le Fa’amasino i le lipoti a le Ofisa Fa’anofo Va’avaaia, na matua musu le ua molia e fa’asino lona aiga i le Ofisa ona o lona manatu ia aua nei oo ni lagona maasiasi lona aiga ona o le mataupu ua molia ai.

Ua nofo tapena lava o ia poo le a le fa’aiuga e oo ia te ia ae aua nei aafia ai finagalo o le latou aiga.

O se tasi lea o itu na saunoa ai le Fa’amasino e taua tele ma o se itu lea o itu e fai ma lelei o le ua molia, ona o lona puipuiga o lona aiga.

Pei ona silafia e 10 tausaga na amata fua mai ia le fa’ai’uga a le Fa’amasinoga. Ae na toe siitia i luga i le 11 tausaga, ona sa iai fo’i lona moliaga muamua sa falepuipui ai i le 2006 i lona faia foi o ni uiga mataga i se tasi tama’ita’i.

Ae na toesea le isi tasi tausaga, ona o itu lelei sa folasia e lana Loia, le susuga ia Fepuleai Ameperosa Roma, ae le gata i lea o le toe suia o lana tali i le tetee ile ioe.

Na saunoa Vui nao le pau lena o itu ua toesea ai nisi o masina mo le ua molia, ae leai lava se isi toesega mo ia, ona ua silasila le Fa’amasinoga o ia lea o se tasi o tagata ua lamatia ai le soifua o tama’ita’i o si o tatou atunu’u. Ae i se ripoti a leoleo e tusa ai o lenei
mataupu, o le po o le aso 22 Iulai 2011 na faia ai se fiafia (pati) sa iai uma le ua molia ma le tama’ita’i na aafia i Mulinuu.

O le aso na sosoo ai na ala ifo ai le tama’ita’i i le taeao ma iloa ai o loo galo lana ato i totonu o le tamai ta’avale a le ua molia, o le mafua’aga lea sa ave ai loa ana feau tusitusia i lana uo tama, pe mafai ona piki mai lana ato. E oo ifo lava i le aso 24 e lei oo atu lava lana ato o lea nafa’afesootai sao loa i le ua molia pe mafai ona momoli atu lana ato. Sa fai le ua molia i le tama’ita’i e uma alu atu e momoli atu i le latou aiga aiga.

Na ta’ua e fa’apea, ina ua manava atu le tama’ita’i i le po i le 9:30 na vili atu ai le ua molia ia te ia e fa’asino atu le auala e agai atu ai i lona aiga, o lea ua alu atu e momoli atu le ato. Na feiloai i la’ua i luma o le auala. Peitai na oo atu le ua molia ma fai i le tama’ita’i e omai e piki atu lana ato i le i latou fale. Sa fa’apea loa ona agai mai i
la’ua ma avatu le ato, ae ina ua mae’a ona piki le ato sa toe foi atu loa i la’ua ma agai
sao i Tuanaimato i le vaega lea e latalata i le malae tapolo.

Oi ina sa paka ai loa le ta’avale ma amata loa ona ole e lea alii le tama’ita’i. Na musu
le tama’ita’i ma tauanau lenei alii e momoli o ia i lona aiga. Sa musu le alii e momoli le
tama’ita’i i le latou fale, sa iu ai lava ina ia ave fa’amalosia lenei tama’ita’i i Tafaigata i se fanua tuufua e latalata i le fanua tanu lea e teu ai tagata sa maliliu i le tsunami.

Na paka le ta’avale ma tago loa lenei alii ma toso le tama’ita’i i tua o nofoa i le pito i tua o le tama’ita’i ma amata loa ona fa’amalosi. Sa tagi le tama’ita’i ma augani atu i lenei alii e momoli o ia i lona aiga.

Ae sa palauvale iai le ua molia i le tama’ita’i ma fai ia “ tapuni lo’u gutu”..

Na taumafai fo’i le tama’ita’i e tauivi ma le ua molia, peitai na u e lenei alii ona tama’ilima. O le fefe o lenei tama’ita’i i lenei ali’i, sa fai ai lava le mea na manao ai. O itu nei na silasila iai le Fa’amasinoga e avea ma itu ogaoga o lenei mataupu.

Na saunoa manino le Fa’amasino ua matua tele se aafiaga ua oo i lenei tama’ita’i, e pei ona fa’ailoa mai i lana lipoti ua masae ai le la laufai ma lana uo tama e mafua mai ona o loo tu’uaia o ia i lenei fa’alavelave. Sa fa’aaoga e le ua molia le ato a lenei tama’ita’i e fai ma auala e mailei ai le tama’ita’i. O se isi itu matuia, ona o lea sa iai le fa’atuatuaga a le tama’ita’i i le ua molia ona o ia o le uo tama a lana uo tama. I le tula’i mai ai o lenei solitulafono ua manatu le Fa’amasino ua tatau ona iai se Fa’alapotopotoga e fesoasoani ia latou ua aafia i mataupu fa’apea.

E moni o loo iai le Fa’alapotopotoga o Toomaga mo e Puapuagatia o loo tele le latou fesoasoani i le fa’atalanoaina o tama’ita’i o lo’o aafia i tulaga fa’apea, ae o loo mafuli lava le latou pitolaau i le fanau laiti.

“Ae o nei tama’ita’i o loo manaomia e latou se fesoasoani”.

O Vui lea. Sa ia saunoa o nei polokalame e fa’atalanoa ai tama’ita’i matutua o loo aafia i mataupu fa’apenei, o lo’o faia i Niu Sila ma Ausetalia ae le’o mafai ona fa’atino i Samoa nei.

Share

Please Register OR Login to comment.


Comment Policy: Please read our comment policy before making a comment. In short, please be respectful of others and do not engage in personal attacks. Otherwise we will revoke your comment privileges.