E sili lava le aiga moni

Tusia Vatapuia Maiava ma Sarafina Sanerivi ,

308 Hits

Tausala Toma ma si ana fanau mai le afioaga o Faleapuna.

Tausala Toma ma si ana fanau mai le afioaga o Faleapuna.

E to’atele lava tagata e sa’afi ma momo’o ina ia maua avanoa e nonofo ma aumau ai i atunu’u mamao. 

Ae mo le tinā ia Tausala Toma e 27 tausaga mai le alalafaga o Faleapuna, e leai lava se isi atunu’u e sili atu nai lo’o Samoa. 

Na fa’aalia mai e Tausala, po’o a lava e tele o oloa ma tupe e maua i isi atunu’u, e le taitai ona ave’esea ai lona fia aumau pea i Samoa.

“E ese le matagofie o le olaga i Samoa,” o le fa’amatalaga lea a Tausala. 

“Ou te iloaina, o le tatou atunu’u o lo’o maua lava le ola fiafia ma le ola filemu. E le pei o isi atunu’u o lo’o iai le mau fa’alavelave ma aafia tagata i taua ma fevesia’iga. 

“Ae o si o tatou atunu’u, e to’afilemu lava ma leai lava se vevesi. E ui foi lava ina iai fa’afitauli i nisi o taimi, ia ae o le olaga lava ia e fa’apena lava. O aso ua lelei o aso foi ua masei.

“O le ala lea, pe fai mai lava o lo’o tele le oa i nisi atunu’u, e sili atu lava ia te a’u le nofo ai i Samoa.”

Na ta’ua e Tausala, o le itu e manaia ai le olaga i Samoa, ona o le sa’oloto o tagata i o latou lava fanua, aemaise e fa’amoemoe lava i fa’ato’aga ma sami e maua mai ai mea’ai mo aiga.

“O iinei foi i Samoa, e maua foi lava tupe e tausi ai fanau, ma maua meaai aua le tausiga o le aiga.

“O lo’o maua foi le ola lelei ma fa’amanuiaga mai le Atua. E le’o tu’ulafoa’ia lava i tatou e le Atua. I totonu o si o matou aiga ma totonu o si o matou alalafaga, e mo’i lava e iai nai fa’afitauli, ae e mafai lava ona fo’ia fa’afitauli ona o le pulega a ali’i ma faipule. 

“O le tulaga lena e ese le manaia ai o le olaga iinei i Samoa. E faigofie lava mea uma ma to’afilemu. 

“E tele foi mea e maua mai ai seleni e tausi ai aiga ma fanau. A le faigaluega o lea e iai fanua ma le sami e mau mai ai mea e tausi ai aiga.

“E ala ese’ese mai lava fa’amanuiaga a le Atua. E toto le fa’i ma le ta’amu ma mafai foi ona fa’atau atu e maua ai seleni. 

“O si o matou aiga, e na’o a’u lava ma lo’u to’alua ma si a ma fanau e to’afa.

O le tama o le aiga o lo’o faigaluega nei, ae o a’u o lo’o va’aia si a ma fanau.

“O fe’au masani lava e fai i aso ta’itasi. O le fe’au tele lava o le faiga lea o mea’ai aemaise o le va’aiga o si a’u fanau ia ma tapena autafa o le fale.”

E le gata i lea, na fa’aalia e Tausala, na pau lava le fa’anaunauta’iga o lona loto o lo’o iai i lenei taimi o le una’ia lana fanau i le aoga, mo so latou lumana’i manuia.  

“E to’alua si a’u fanau o lo’o ua aoaoga nei. 

“O le fa’anaunauta’iga lava o lo’o iai o le una’ia lea o la’u fanau ma ia to’aga e ave i le aoga ina ia maua ni o latou lumana’i manuia. E le gata mo i latou, ae fa’apea foi se manuia o aiga, nu’u ma ekalesia. Aua o fanau e fa’amoemoe iai le lumana’i manuia o so’o se aiga.”

© Samoa Observer 2016

Developed by Samoa Observer in Apia