“Fa’afetai i le Palemia ma le faiga malō’’

Tusia Vatapuia Maiava ma Sarafina Sanerivi ,

144 Hits

FIAFIA UA MA’EA GALUEGA O LE 2016: Savelio Fiaali’i, 58 tausaga mai le afioaga o Saoluafata.

FIAFIA UA MA’EA GALUEGA O LE 2016: Savelio Fiaali’i, 58 tausaga mai le afioaga o Saoluafata.

Ua tatou iai nei i le fa’aiuga o lenei foi tausaga. 

O se vaitau e toe manatu ai i galuega ma atina’e sa fa’atinoina i lenei foi tausaga o le a tatou fa’amavae atu ai.

Mo le tamā ia Savelio Fiaali’i e 58 tausaga mai le afioaga o Saoluafata, o lona agaga fa’afetai ona ua ma’ea ma le manuia galuega o lenei tausaga. 

Na ta’ua e Savelio, e tele lava atina’e ma tiute ese’ese sa feagai ai ma le atunu’u i lenei tausaga, ae fiafia lava ona o le anoanoa’i o atina’e lelei ua iai i totonu o Samoa. 

“O le fa’amalō lea i le afioga i le Palemia ma lana faigamalō ona o le tele ma le anoanoa’i o atina’e ua mafai ona fa’atinoina mo le tatou atunu’u i lenei foi tausaga.

“O le fa’afetai i le Palemia mo lana ta’ita’iga aemaise o lana faigamalō i le fa’afoeina o atina’e ese’ese ua iai i totonu o Samoa.

“Ua tele lava atina’e lelei ua mafai ona fa’atinoina ma ua manuia ai le mamalu lautele o le atunu’u.”

Na ia ta’ua foi, ua telē lava le suiga o le olaga ua iai i Samoa pe a fa’atusatusa atu i tausaga ua mavae.

“Ua le’o toe tutusa lava le olaga ua iai nei ma aso ua mavae. O suiga ua iai nei, e filogia lava le lelei ma le leaga.

“O tulaga lelei, ua tele atina’e lelei ma poloketi lelei a le faigamalō ua ‘ae’ae ma manuia ai le atunu’u.

“Ua taugofie foi le tau o oloa ona o le tele o le au faipisinisi mai Saina. O le fa’afetai lea i le Palemia ona o le tofā e fa’atagaina ai le aufaipisinisi mai fafo e faia a latou pisinisi i totonu o Samoa.

“Ou te iloa o lo’o iai nisi o lo’o faitioina lea tulaga, ae taga’i foi, o le tele o le aufaipisinisi Saina lea o lo’o iai i Samoa, ua leva tausaga o aumau ai i Samoa, ma ua avea Samoa ma o latou aiga. O nisi ua fai aiga ma fai fanau i totonu o Samoa.

“E le mafai la ona taofia lo latou omai ai e fai a latou pisinisi i totonu o Samoa. 

“O lo’o telē la latou fesoasoani mo le atina’eina o si o tatou atunu’u.”

Aepeita’i, na ia ta’ua o nisi o suiga le manaia ua va’aia i totonu o le atunu’u, o le tele lea o le mau fa’ama’i ese’ese ua iai i totonu o Samoa ona o le anoanoa’i o mea’ai ese’ese ua maua i totonu o Samoa. 

“Ae o la aso, sa maua lava le soifua lelei o tagata ona o le lelei o le tausiga. Pei o le suafa’i, vaisalo, fa’apāpā ma isi lava mea’ai na iai. 

“Ae ua tauau lava ina mou atu ma seāseā ona toe maua ia taumafa i totonu o Samoa. Ae pei o le mafuaaga lea na umi ai ma maloloina o tatou matua i aso ua mavae, ona o le lelei o meaai sa tausi ai o latou soifua.”

Na ia ta’ua foi, o le isi suiga o lo’o iai i le taimi nei, o le televave mai ai o auala fa’atekonolosi ma telefoni fe’avea’i.

“Sa manaia lava aso ia sa leai ni telefoni feavea’i ma isi tulaga. Ae na atamamai lava nai o tatou matua ua mavae atu. 

“O le fusipa’u lava ma le sasa a matua na mafua ai ona atamamai o tatou matua. E le’i fa’alagolago i ni komepiuta ma isi auala fa’atekonolosi. 

“Ae o le vaitau lenei, ua fa’alagolago lava fanau i ala fa’atekonolosi i lenei vaitau. 

E pei e sa’o ai la agana o lo’o ua tatou fa’alogoina pea, “Ua telē lava le suiga o Samoa ua iai.”

“E aogā lava e vave feso’ota’iga ma mafai ai ona feso’ota’i ma aiga ma uō, ae ua to’atele lava nisi ua fa’aaogaina sese ia auaunaga ma oo ai lava ina fa’atupu ai ni vevesi i nisi o aiga. 

Aemaise lava i le tupulaga. Ua tele lava ina fa’aaoga sese telefoni ma initaneti i le vaitau lenei.”

© Samoa Observer 2016

Developed by Samoa Observer in Apia