“Ia Galulue Fa’atasi,” Mafa Maotu.

Tusia Vatapuia Maiava ma Sarafina Sanerivi ,

107 Hits

Le tinā ia Mafa Maotu mai le afioaga o Malie.

Le tinā ia Mafa Maotu mai le afioaga o Malie. (Photo: Sarafina Sanerivi )

O le tele o lima e māmā ai se avega. 

O lea le manatu o le tinā ia Mafa Maotu, e 49 ona tausaga mai le afioaga o Malie. 

Na fa’aalia e Mafa, po’o a lava fa’afitauli ma faigata o le olaga, e faigofie lava mea uma pe’a galulue fa’atasi. 

O le tinā ia Mafa e fai la latou maketi faifa’atasi ma nisi o aiga i totonu o le latou nu’u. O lona talitonuga, e tu’u fa’atasi fua o fa’ato’aga a tagata ese’ese, e felanulanua’i ai le ese’ese ma tele ai mea e fai ai filifiliga a le mamalu o le atunu’u. 

Na fa’ailoa mai foi e Mafa, e fesoasoani tele lenei maketi i le tausiaina o lona aiga. 

“E tele lava le fesoasoani a si o matou aiga e maua mai i le maketi lenei,” o lana fa’aaliga lea i le Fofoga o Samoa. 

 “O le tupe e maua mai i le fa’atauina o fuala’au aina nei e fa’aaoga i mea e fai a le aiga aemaise o fanau i aoga.

“E mo’i lava e le tele se seleni e maua mai ai, ae e maua mai ai lava le fesoasoani mo a’u ma lo’u aiga.

“O le tupe foi e maua mai ai e alu i le fa’agaioiga o mea e fai a le nu’u aemaise foi o le lotu.”

Na ta’ua e Mafa, e maua lava le $300 tala o lana tupe e maua i le aso mai le fa’atauina o ana fuala’au aina. 

“Ua fai lava si umi talu ona maua mai a matou tupe mai i le maketi lenei. 

 “E le na’o a’u foi o lo’o fa’aaogaina lenei maketi. O lo’o iai fo’i nisi o lo’o fa’atau fa’atasi a matou oloa i lenei maketi. 

“Out e fiafia lava a’u i lea tulaga auā tele ai ma manaia le felanulanua’i o fuala’au aina ese’ese aemaise foi o le ese’ese o mea e aumai i totonu e tagata faima’umaga. 

“O le tupe fo’i la matou te maua i aso ta’itasi e vaevae ia i matou uma. Ae fa’amoemoe lava le tupe matou te maua i le to’atele o tagata fa’atau.”

Na ta’ua e Mafa e leai lava ma se mea e maua ma se filemu i le olaga nei. 

Ae e mafaia so’o se mea pe a galulue fa’atasi ma galue malosi. 

“E leai lava se mea e faigofie. E faigata le sa’iliga o manuia. Ae a fai e to’aga ma galue malosi fa’atasi ai ma le loto gatasi, e faigofie mea uma. 

“E te le maua se manuia pe a nofonofo ma fa’apalapala.

“Tatou te fa’afeagai uma lava ma puapuaga ma faigata i le olaga nei. Leai lava se isi e sao mai ai. Ae a tatou galulue fa’atasi ma fesoasoani le tasi i le tasi, e mti

 ai la tatou avega.

“Ou te talitonu foi e tofu lava le tagata ma fa’afitauli e feagai ai i aso uma ma aso fai so’o, ae o le auala lava lena e mafai ai ona tatou fōfōina se fa’afitauli, o le galue malosi ma galulue fa’atasi.”

© Samoa Observer 2016

Developed by Samoa Observer in Apia