E faigata le sa’iliga o le manuia.

Tusia Vatapuia Maiava ma Sarafina Sanerivi ,

116 Hits

Junior Fuimaono, 21, tausaga mai le afioaga o Salelologa i Savaii.

Junior Fuimaono, 21, tausaga mai le afioaga o Salelologa i Savaii. (Photo: Sarafina Sanerivi)

E leai se mea lelei e maua ma le filemu. 

O le finagalo lea o Junior Fuimaono mai le afioaga o Salelologa i Savaii. 

O le taule’ale’a e 21 ona tausaga ma o ia o se avepasi. 

O lana fa’aaliga mai i le Fofoga o Samoa, o le galuega lea o le ave pasi e le’o se galuega faigofie. 

“E mo’omia ai lava le lava o le onosa’i ma le fa’apalepale. 

“Aemaise lava la pasi ia o lo’o la’uina le mamalu o le atunu’u o lo’o alala i nu’u i tua. E tau leai ni pasi e o ai ma e le fa’apea foi o taimi uma lava e alu ai le pasi i tua. O lona uiga, e tatau lava la ona fa’atali se’ia tumu le pasi ona fa’ato’a alu lea o se Malaga.” 

Na ia ta’ua foi, o le tele o pasi i Samoa, o le tupe lava e mafaufau ai. 

“Ae ou te manatu ona o le to’atele o i latou, o le galuega lea o lo’o fa’alagolago ai le tausiaina o aiga. 

“Peita’i, e faigata tele pe a fa’amuamua le mana’o o a’u lea e avepasi ae fa’atuatuana’i le mana’o o le tagata ti’eti’e.

 “E na’o le lua lava pasi o lo’o momoliina le mamalu o le atunu’u i le fa’aitu lea ou te ave pasi ai, ma ou te taumafai lava ina ia ave le avanoa e ti’eti’e uma ai i latou o lo’o fia Malaga i o latou aiga. 

“Afai foi la e iai nisi o i latou e le lava se seleni mo pasese, ou te fesoasoani ai lava. Auā e mafai lava ona fa’apaleni mai i sesi aso.

Na ia ta’ua foi, ua telē lava le suiga ua iai i nei aso i le auaunaga a pasi i totonu o le atunu’u.  

“Ua tele kamupani ma fale pasi ua iai i nei vaitau, ma ua tele ai foi ina fai fa’atauvaga le tele o pasi ma falepasi i le taimi nei e pei a o isi pisinisi. 

“O le tele foi o le mau fale pasi ma pasi ese’ese, ua tauau ai foi ina faigata ona maua ni tagata ti’eti’e ma pasese.”

Na ia ta’ua foi le faigata o lenei galuega, auā e usu i le taeao po ae manava ua leva le po. 

“E le faigofie. Auā e ala lava i le vaveao e le’i taitai, ae o’o fo’i i le fale ua po.

“E le faigofie foi auā o lo’o ia te oe le fa’atuatuaga auā le saogalemu o tagata o le atunu’u aemaise ai ina ia taunu’u manuia faiga Malaga. 

“O pasi ia e feoa’i i nu’u i tua, matou te feala lava e le’i taitai oso le la. E seiloga foi a la ua ma’ea uma Malaga o le va’a moe ma momoli uma tagata, fa’ato’a mafai lea ona maua foi le malolo.”

Na fesiligia foi Junior mo sona finagalo e tusa ai ma le tele foi o fa’alavelave e tula’i mai ave pasi i le tele o taimi. 

Ae na ia ta’ua, o lava lava o le onosa’i e mafai ai ona fo’ia fa’afitauli. 

“E pei ona faiatu, e le faigofie le galuega lea o le ave pasi,” o lana tala lea. 

“E le lava foi se taimi e malolo ai. E mo’omia lava la le lava o le onosa’i e fa’afoe ai le galuega ma ia mafai ai ona fa’ataunu’uina lana galuega i le filemu ma le saogalemu.”

© Samoa Observer 2016

Developed by Samoa Observer in Apia