Popole i le Aoteatea i se a’oga

Tusia Ilia L. Likou ma Faaliliu e Seagaitumua Tupuola ,

214 Hits

Sa matamata tamaiti a’oga i se mea uiga ese a’o talepe i lalo e ni alii le faitoto’a ma aapa mai ma fasi se alii faia’oga o ia lea “sa faatino lana galuega.”

O lea faalavelave na tupu i le Kolisi a le Ekalesia Aso Fitu i Lalovaea i le Aso Lulu. Na faamaonia e le Pule o le A’oga, o Eteuati Koria, sa musu o ia e talanoaina lea faalavelave ae fai mai ua mae’a ona tuuina atu i le Komiti a le A’oga mo se faaiuga. “E leai se isi o’u manatu e toe faaalia e uiga i lenei mataupu,” o le faaaliga lea a le Pule o le Aoga. O le faia’oa o loo aafia ai, e le o faalauiloaina lona suafa, ma e musu foi e faaali sona manatu. 

Na ia faailoa i le Sunday Samoan e faapea ua maua si ona malosi, ae na te mafai ona faamaonia na o le itu e faapea ua uma ona ia faaulu se tagi aloa’ia i Leoleo. 

Ae peitai- o matua ia e molimauina lea faalavelave  e le o fiafia. O se tasi o i latou lea na talanoa i le Sunday Samoan i luga o le aiaiga e le faalauiloaina lona suafa-fai mai o sea ituaiga o amio sa le tatau ona faatagaina i totonu o se malae o se a’oga. “I le avea ma tamā, sa ‘ou matua faanoanoa ina ua ‘ou vaaia lea faalavelave i lea aso,” o lana faaaliga lea. “ O le uiga o la’u faamatalaga-o lenei mea na tupu i luma o tamaiti a’oga, faia’oga, pule o le a’oga, ekalesia ma i matou i le avea ma matua. O le mea uiga ese ma le mataga. Sa le tatau i tamaiti a’oga ona vaai i lenei ituaiga o mea.”

E tusa ai ma le matua, e to’alua se uso e aooga i le a’oga, o se tuagane o le tina ma le isi alii sa faatinoina le fasiga o ia tamaiti. “Na pogai nei mea uma ina ua sasa e le faia’oga se tamaititi (laititi) o le Tausaga 9 ona o le le faia o lana homework. Ona ta’u ai lea e lea tamaitiiti i lona uso matua e i le Tausaga 13 ma ta’u e lona uso matua i le uso o lona tamā ma le isi alii.”

Fai mai le matua ua popole sa fai e le faia’oga lana galuega. “Sa na aoaoina a tatou fanau ma ou te manatu o nisi taimi e leaga ai amio a tatou tamaiti a’oga talu ai e le o lelei ona aoaoina le pulea o a latou amio. “Ou te mantu o le taimi tonu lenei mo le malo aemaise ai lava le Matagaluega o Aoga ona toe iloilo le tulafono e tusa ai ma le sasaina o tamaiti i a’oga. E tatau ona faataga-talu ai o le ituaiga lenei o amio tatou te le mana’omia.” “ E i ai le aso e ono fasiotia ai se tasi ona e i ai lo latou lagona ua ia i latou le aia tatau e tali atu ai e fai ma sui o a latou fanau.”

Fai mai le isi matua o Atina’e Talatua e faapea e le mafai e tagata nei e faia osofaiga ona tatala le faitoto’a, ona latou talepeina lea. 

 “E na ona o mai lava toso i lalo ona o mai lea i totonu. Ona amata lea ona fasi le faia’oga. Sa taumafai le isi faia’oga e faafilemu mea-ae sa le maua ai se fesoasoani.” 

 “O le faia’oga lea na fasi sa matua manu’a leaga lava. O se itu e faanoanoa ai le vaai atu i le tupu mai i le taimi nei. I le avea ma tina, ou te manatu o lenei a’oga e le o toe saogalemu mo la’u fanau. Ua mafai e Tagata ona savavali sa’oloto mai i totonu i soo se taimi, i aso uma ma fai soo se mea latou te manana’o i ai.”

Sa le mafai ona maua mai se manatu faaalia mai le Taitaifono o le Komiti a le A’oga ma Leoleo ananafi.

© Samoa Observer 2016

Developed by Samoa Observer in Apia