“Ia ta ō ma a’u, e te iloa ai lo’u maelega ia Ieova.”

Tusia Petaia Setu ,

334 Hits

E faigata ona faamălieina oe ma a’u i se galuega vaganā ua vaai lelei iai. E le mafai foi ona iloa le manino ma le atoatoa pe a le lelei le faamatala upu poo ni molimau i ia mea. E le faigofie foi la ona talia le moni ma le faamaoni seia tutusa o loto. O le loto lea ua tasi na ala ai ona uunaiina pea e Ie’u le uso nei ia Ionatapa. Sau ta ō! Ta ō ma a’u e te iloa ai lo’u maelega ia Ieova.

O le toasa o le Atua, ua tupu tele lea i le aiga o Aapo. Le tupu ma lana masiofo sa sili ona matautia o mea leaga la te faia i luma o le Atua o Isaraelu. Na afua mai i le fao faamalosi o le tovine poo fanua o Napota, ma fasioti faatopetope atu ai ma Napota i tuuaiga pepelo ma faiga leaga a Iesepela. O le faamalosia o tapuaiga faapaupau ia Paala ma faaseseina atu ai ma le toatele o le nuu.

O Ie’u, o le atalii ia o Iosefatu. O le tasi lea taitai fitafita a le tupu o Aapo. Na faauuina o ia e le tasi soo o le au perofeta na auina e Elisaia, e fai ma tupu o le malo o Isaraelu (II Tupu.9.1-3). O lana misiona, na te faaumatia le aiga uma o Aapo, ma tagata uma lava ua ifo atu ia Paala (II Tupu.9.7-10). O le tagata e toa le loto; e mata’u tele i le Atua. Na afua mai i lea lava aso ona pulea ma taitaiina e le Agaga o le Atua, faatonu ma mafutaina e Ieova le Atua o Isaraelu.

O le feiiloaiga ma Ionatapa, o le tagata ua tauleleia ma naunau atu ia Ieova, na matua faaalia ai le faamaoni o Ie’u i le Atua, ma le limataitaiina o ia e le Atua i lana misiona. E tulaga ese lava lona valaauina. O le uiga o Ie’u – ‘o Ieova, o Ieova lava Ia.’ O lona uiga la, o le soifuaga o Ie’u, o se olaga e faalologo ia Ieova, o lona faasinomaga o Ieova, e pulea e Ieova. A silasila lelei i talaaga o le tagata nei,  o loo manino lelei ai, o lona loto lea. O le loto ua pulea e le Atua. Le loto lea ua taumafai e faapipii iai ma le loto o Ionatapa, e molimauina le faamaoni (maelega) o lona loto i lona valaauina. Se i vaai Ionatapa i le faataunuuina o lana misiona, ma molimau i lona mata’u ma lona faamaoni ia Ieova.

O Ieova, o Ieova lava Ia. O ai se na te tu ma tetee atu i lana pule? E pule aoao lava Ia i le lagi ma le atulaulau atoa uma lava. A finagalo lava ia e faapea – e faapena! A pule lava foi Ia e faapena – e faapena lava. I le, o lana pule lava lea sa pipii iai le loto o Ie’u, ma tumau ai Ie’u. Ia matua faaumatia mea leaga uma. Ae le mafai ona faia e Ie’u pe afai e le mata’u i le Atua! E le mafai foi ona faataunuuina e Ie’u pe a ia iloa e le maua ai sana mea! E ono tolofia foi le misiona pe ana fefe Ie’u i tagata! A ua iloa e le auauna nei, ua manao le Atua i se faafouga o le ola tapuai o ona tagata. Ua naunau le finagalo o le Atua ia toe fuatai lona nuu. Ua manaomia se loto fou; se pulega fou; se nuu fou. 

Samoa e, e faapefea ona toe fau lou olaga? O ai na te toe faafoi oe ma lou aiga i le matagofie o le Atua? A o ai na te molimauina lou loto i le Atua? Lou mata’u i le Atua? Lou maelega ia Ieova? O fea e afua mai ai? A o ai na te matua’iina? ‘Aua le vaai fua i le isi! O oe lava. E faafoi e oe, oe lava i le Atua. O le loto sa ia Ie’u, ma le loto o Ionatapa, o le loto lena e manaomia ona fafao i lou loto. Ona e le toe ifo lea ia Paala, ae vivii faamaoni i le Atua Soifua e toatasi. Ona e le toe alu lea i taaiga faapaupau, ae mafuta i lou toalua ma lau fanau. Ona e saoloto lea ma fiafia i aso uma, ola mălie ma lou mautinoa o lou taunuuga. Ona mafai lea ona e faaolaina nisi agaga, ma iloa atu Iesu Keriso i lou olaga. 

Ioe, o le loto o oe ma a’u e tatau ona sa’o i le Atua! Ia tonu lou loto i le finagalo o le Atua. Auā, o lena e faigofie ai le faigata, e māmā ai le mamafa, e malamalama ai le pogisa, e saoloto ai le pologa; e mālōlō ai ma’i; e ola ai le oti i le agasala.

E le i faasaoina e Ieova se leaga e tasi i le aiga o Aapo ma perofeta uma a Paala. E inoino le Atua i le amioleaga, ae fiafia i le faamaoni. O le uiga lea o le valaauina o Ie’u, ia faaumatia le amioleaga ma mea leaga uma, a ia faatuina se Isaraelu fou e iloa ona mata’u ma alofa atu i le Atua.

Lou atunuu e, Samoa, vaai ane i ou autafa, tulimata’i ma maitau lelei suiga tetele ua iai nei le lalolagi; o loo fetaufaoa’i lava le pule ma le fefaatauaiga o tupe ma oloa a le lalolagi. A o le lalolagi ma mea uma o iai o mea a le Atua (Sal.24). Peitai, ua mamao ese o tatou loto ma le Atua na faia mea uma (Mar.7:6). Toe vaai i le maelega o Ieu ia Ieova – Po ua tonu mai ea lou loto, faapei o lo’u loto i lou loto? (f.15). Ioe, o sa’o lou loto? O e talitonuina lo’u loto i le Atua? Po o tutusa ea o ta loto i le Atua lo ta Faaola?

O oe le tagata o le Atua, o le a lau misiona? Ma oe le tagata ua mata’u i le Atua, se a lou valaauina? Sau ia! Uso e, sau ia. Ia ta ō ma a’u, e te iloa ai lo’u maelega ia Ieova.

 

Amene

7737063/7783782

E-mail: petaiasetu@gmail.com

© Samoa Observer 2016

Developed by Samoa Observer in Apia