O LA’U TALA FO’I

125 Hits

1.Matauina i Tala Fou ni folafolaga a se Kamupani fou –lea fai mai o se “Kamupani Tau Fesootaiga fou lea e sili ona lelei…! A matau la i lenei Kamupani-o se kamupani fou lea faatoa tatala aloa’ia-ae o lea ua faamuamua mai folafolaga.

Sa faita lava se’i tofo muamua le atunuu i ana auaunaga ona faatoa vivi’i mai lea-ae o lea taunuu ai le upu -ua muamua faitau tama’i-moa –ae lei fofoa….! Ia afai o lea ua muamua ona folafola mai ae tatou te le’i vaai tino i lenei auaunaga. O le lagona la ua o’o mai-ua faata’ita’i foi lenei kamupani fou i faiga a le faiga-malo-o le folafola mai ae leai lava se mea o faia! O le itu la ua aliali mai-o lea foi ua faata’ita’i lenei kampani fou i faiga a le Malo-ma e peiseai la o le mea taua lava o le ta’u-ona faataatia ai lava lea.

O le mea la ua tupu mai-“ua fau-sasaga folafolaga ae leai se mea o faia. Ua foliga mai la o le mea taua lava o le ta’u-ae o le faatinoga-e matua leai lava. O le mea la ua tupu-ua le o toe talitonu se tasi i nei folafolaga-e na ona maumau ai o le ‘ea –ae leai se mea o faia! Ua foliga mai o Samoa o se atunuu o ni tagata valelea. A uma ona fai mai folafolaga a le Malo-ona soso’o mai ai lea ma folafolaga a kamupani-ae a mae’a loa-ona galo loa lea o upu ma folafolaga na fai mai. O le alu alu lava o lea-sau faavalea le atunuu. O le a la sou taofi?

2. Ua toe matauina foi i Tala Fou tusitusiga a nisi o le atunuu e ala i Tusi i le Faatonu-e faasino i le eletise ma le faaitiitia o lona tau e pei ona folafola mai i le atunuu. Ia atonu e avanoa lava soo se tagata o le atunuu e faaali o latou finagalo i soo se mataupu!

Ae o le mataupu lenei e uiga i le fuafuaga a le Malo e faaitiitia le tau o le eletise-e i ai le manatu e faapea-o lea mataupu e le o lelei ona faamalamalama mai i le atunuu-ma e faigata foi ona talia e le atunuu-talu ai-e na ona fai mai ua pa’ū le tau o le eletise-ae le o manino mai pe o le a le pa’ū o le iunite e tasi o le eletise. E anoano foi isi mataupu o loo fia malamalama ai le atunuu!

A’o lei folafolaina mai lenei pa’ū o le tau o le eletise-sa masani ona totogi e le atunuu le aitalafu a le Malo poo le EPC-sa totogi foi e le atunuu le Tau o le Suau’u lea e aumai e vili ai le eletise-toe totogi ma le pili o le moli o le tagata ia.

O lona uiga la-e tolu mea sa totogi e le atunuu-o le aitalafu a le Malo-totogi o le suau’a-toe totogi ma pili o latou moli! O le fesili la-afai la e moni ma faamaoni ua pa’ū le tau o le eletise-o lona uiga- “ua le o toe totogiina e le atunuu le aitalafu a le malo ma le suau’u”-ae o le a totogi na o pili o latou moli? E mafai faamolemole ona faamalamalama mai le vala lea? O le a sou taofi?

3. Matauina i Tala Fou se ulutala fai mai ua faaalia se fuafuaga tau fusu’aga mo tamaiti laiti-ma e moni lea faaaliga -o le taaloga o le fusuaga i Samoa i aso ua mavae sa matua malosi ma maoa’e lona faatinoina-ma o ia taimi-sa amata mai lava lenei taaloga i totonu o a’oga-i aso ua mavae-ma o le toatele foi o tama fanau a Samoa sa auai i lenei taaloga-sa masani foi ona fusu ma isi tagata fusu Iloga mai fafo. O le mea la ua tupu-e peiseai na tuua loa le atunuu e nisi o faia’oga o a’oga a le Felela lea taaloga i na aso-o le taimi foi sa le toe vaaia ai lenei taaloga i totonu o Samoa. Ma e manatua ai le Tivoli lea sa fai ma malae o lea taaloga i na aso.

O le mea la ua tupu-o tagata fusu o Samoa- na latou tuua le atunuu mo fafo ma ua faapena ona mou atu ai ma le taaloga. I le taimi nei la-o lea ua tau toe lalaga ma afai e faaauau pea-e toe maua lava e Samoa lona tulaga sa i ai muamua e tusa ai ma lenei taaloga.Ae o le itu e faafetai ai-e ui lava ina mou atu lea taaloga-ae o loo vaaia pea nisi o tama fanau a Samoa-o loo faaauauina pea lenei taleni! Ia afai la ua ua fai se fuafuaga mo lea Taaloga i totonu o Samoa-o se faatosina tele lena mo nisi o tupulaga talavou a Samoa! O le a sou taofi? 

4. Matauina ma le fiafia le faae’eina atu o suafa matai o le afioaga o Vaitele-ma o le matau i ai-e le gata i alii ae faapea foi tamaitai! Afai la o le afioaga o Vaitele o le fuaiala mavae o Faleata-o moomooga la o le loto-maumau pe ana faapea o loo i aao pea o lea afioaga ona eleele e pei ona masani ai.

Afai la o eleele o lenei afioaga na ave faamalosi e Siamani-sa tatau lava ona toe faafo’i i aao o lea afioaga ona laueleele e tua i ai aiga ma faatinoa ai e le gata i le aganuu ma faiga masani a le Itumalo o Faleata-ae faapea foi le va faafeagai ai ma isi nuu uma o Samoa! O le a sou taofi?

© Samoa Observer 2016

Developed by Samoa Observer in Apia