Aloa’ia ma Fa’aaloalogia Tagata Uma

By Fa’aliliu e Maiava 31 May 2016, 12:00AM

Toe mafaufau tasi lava…Na asiasi atu le ali’i-lauiloa o Lonzo Green i lona aiga, ma sa tumu ane iai lona tei la’iitiiti o Jim ma ana uo e fia feiloa’i i le uso o lona tama. Ae sa filo ai la se tamaitiiti 15 tausaga – e filemu lava e le-tautala.

E le-iloa e matua o Jim le tamaitiiti lea ma le-fa’atagaina ai loa i totonu o le fale. Talu ai ona o si tamaitiiti lea o se tamaitiiti mativa, na le-amana’ia ai lava ma fa’a’esea, ona o se tagata le-taualoa ma i’u ai lava ina latou fa’aigoa, o se “lapisi-pa’epa’e” 

Ae na ta’u e Jim i lona Uncle o Lonzo, o le tamaitiiti lea e i fafo, e iai lana kitara peita’ e le-iloa ona ki, ma sa ofo fiafia ai loa Lonzo e fa’asino iai le kiina o le kitara.

Ae talu ai e le fa’atagaina i totonu o le fale, na fa’atonu ai loa la te feiloa’i i fafo, i tafatafa o le ‘auala.

Na manino ia Lonzo, e matamuli le tamaitiiti lea ona e le-masani i nofoaga o aiga maualuluga fa’apea a lona tua’oi. O se kitara tuai lana kitara, ituaiga taugofie ma e tautau lava i lona ua i se fasi manoa.

Ina ua ma’ea ona fa’asino e Lonzo i le tamaititi matamuli lenei le kiina o lana kitara, sa ia ofo atu fo’i e a’oa’o iai nai pese. Na matua fa’ate’ia le la’iititi lea ma sa fiafia tele ina ua malie Lonzo e fa’aalu le lua itula o ona taimi la te ta-ta-kitara fa’atasi ai ma pepese, ma atili fiafia ai ina ua mautu lona mafaufau i lona iloa ua maua e ta ai le kitara ma pese. 

E le’i toe feiloa’i Lonzo ma le tamaitiiti lea, pe fa’afesaga’i fo’i i se taimi. Talu ai, o le tamaitiiti lava lea – na le-fa’atagaina i totonu o le fale, na avea mulimuli ane ma Tupu o Pese o le Rock n’ Roll: o Elevisi (Elvis Presley).

Ae iai fo’i le isi tala moni fa’apena, i se isi fo’i tupu sa le-fa’atagaina i totonu o le tele o fale fa’apea fatu o isi tagata. O Ia lea o le Tupu o Tupu uma o le lalolagi nei. Ui lava o Ia sa foafoaina le lagi ma le lalolagi, ae na tonu lava ia te Ia e fa’amatagaina o Ia e ala i lona liutino tagata ma fanau mai o se tagata fa’atauva’a i se aiga maulalo.

O le to’atele o tagata latou te le’i amana’ia o Ia. E le gata sa te’ena o Ia e ona lava tagata, a ua o’o lava ia tatou o nei aso.   

Manatua, na fetalai Iesu, e le na o Ia o se Ali’i Sili,  se faia’oga po’o se perofeta fo’i. Na ta’utino lava, o Ia o le Atua e To’atasi. Le Atua le Alo na afio mai e lavea’ia tatou ma e toe afio mai fo’i e fa’amasino le lalolagi atoa ona o o tatou sese ma olaga agasala.

O Ia lava la le Fa’aola moni mo tagata uma ua mae’a ona fa’amaonia. Leai se isi ta’ita’i i le tala-fa’asolopito na ta’utino o Ia o Le Atua, vagana lava Iesu. 

E fa’ananau lava o Ia e fa’amagalo tatou uma mai o tatou sese, ina ia mafai ona tatou maua Lona soifua atoa e fa’avavau. Sa ia saunia mea uma mo tatou, e o’o lava i Lona Soifua sa ofoina mai mo a tatou agasala ina ia tatou sao atu i Lona malo i le Lagi. A’o lau lava filifiliga. Ae a le aso?

E te aloa’ia ai lou Tupu i lenei aso? Tatalo nei e fa’amagalo ‘Oe ma pulea atoa e Ia lou tagata ma lou ola, ona e maua lea o Lona alofa moni, Lona soifua fa’amalieina ma Lona filemu mo ‘Oe i aso o totoe. O lo’o fa’atalitali mai pea o Ia mo ‘Oe i le aso a’o le’i tuai na’ua. 

Toe mafaufau tasi lava…  

By Fa’aliliu e Maiava 31 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>