O LA’U TALA FO’I

282 Hits

1. Matauina i Tala Fou fai mai e leai lava se tofiga ua faia mo le Tofi o le Peresetene o le Faamasinoga o Fanua ma Suafa- lea na faamavae mai ai talu ai nei-le Afioga a Tagaloa Tuala Kerslake ia Aperila o le tausaga nei.

O lea la tulaga fai mai na faamaonia e le Ofisa Sili o le Faamasinoga ma Pulega Tau Faamasinoga-o Papalii John Taimalelagi, ‘fai mai e le’i fono lava le Vaega o le Komisi o Faamasinoga e fai se tofiga.

O lea tulaga o loo avanoa pea. Fai mai la Papalii o le tofia o se Peresetene o le Faamasinoga o Fanua ma Suafa- e tutusa lelei lava ma le tofia o Faamasino o le Faamasioga Faa-Itumalo ma le Faamasinoga Sili.

Fai mai e le manaomia ni tusi talosaga ma e leai foi ni talanoaga e faia. O ia tofiga e fai to’atasi lava e le Komisi o Faamasinoga a Samoa. E fai e le Komisi o Galuega Tau Faamasinoga le fautuaga i le Kapeneta-ona faamaonia lea e le Ao o le Malo.

Ia afai la o le taualumaga masani lea-ia atonu o se tofiga lea e le tatau ona faataatia umi- pe a fua i le anoano o faamasinoga aemaise ai o faamasinoga apili-ia ua leva ona taatitia! O le a la sou taofi? 

2. Matauina foi i Tala Fou se ekalesia fou ua faatuina i Nuu Fou-ma o lea ua faata’oto le latou fuafuaga mo le fausia o so latou malumalu tapua’i. O le matau i lea galuega- e foliga mai o se kamupani Saina foi lea o le a faatinoina!

Ia e pule lava le Ekalesia ia ma le latou tufuga-aua o i latou e faatupeina lea galuega tele. Ae o le tulaga lea ua manino mai totonu o lenei atunuu-e peiseai o le a le faaaogaina kamupani a Samoa lava ia-ae ua faaaoga kamupani mai fafo!

Ia e le o se faiga fou lea-aua o lea lava ua tatou vaai tino i ai- a aumai tupe mai Saina- ona toe o mai lea o kamupani fau fale mai Saina  e fai le galuega-o le taunuuga la-o tupe ia na aumai mo sea galuega- e toe foi uma lava i Saina, ae o lea e leai ni galuega a kamupani faufale a le atunuu lava ia.

O le fesili la-a faapefea la kamupani fau fale a Samoa lava ia? O le a la le pogai e fai mai ai o meaalofa ma le a ma le a-ae toe o mai ma tagata Saina e fai? E mafai la ona ta’u sea mea o se meaalofa ia Samoa pe afai e toe o mai tagata mai fafo e fai-ona toe ave uma ai lava lea o tupe -ae leai se sene ‘apa e totoe i Samoa nei? Faamata la o laisene nei pisinisi iinei e pei o kamupani Samoa? O le a sou taofi? 

3. Matauina i Tala Fou ua matua tasi le faamoemoe o le Palemia o Samoa- e toe teuteu le Faavae o le Malo Tuto’atasi o Samoa! O le fesili la-o le a le faamoemoe o lea toe teuteuga? O se teuteuga lelei poo se teuteuga e feoti uma ai le atunuu?

E faapea ona ia toe teuteu to’atasi le Faavae- ae sa tofu nuu uma o Samoa poo itumalo uma ma le sui usufono na faia lea galuega-ona toe faaopoopo foi lea o isi Sui auai mo le faiga o le Faavae i le ta’ito’atolu a le itumalo e tasi ona o le faigata o le galuega?

E le gata i lea-e to’alua alii Loia mai fafo-o le Loia mo Samoa ma le Loia mo le Malo o Niu Sila-sa filo i le faatulagaina o le Faavae o le Malo Tutoatasi o Samoa! Afai la o Alii Papalagi nei fai mai le Palemia- na o la faia ni mea sese-ia e tatau ona toe aveese-o le fesili-“O a la ia mea sese?

O lona uiga-e sili atu le poto o le Palemia o Samoa i le taimi nei- i lo Tama a Aiga ma le ‘Aufai Tofā ma le ‘Aufai-Uta o le atunuu na faia le Faavae? O le faapea mai la e leai se aoga o le Faatomuaga o le Faavae-o le fesili-“e i ai se tulafono e tasi lava a Samoa e leai sona faatomuaga?

E ala ona fai le faatomuaga-ia auiliili ai mea ta’itasi uma o sea tulafono ma ona fuaiupu ta’itasi? Afai la o le a gafa le Palemia ma le toe iloiloina to’atasi o le Faavae atoa o le atunuu na fai ma pasia e faavae ai lona Malo Tuto’atasi i le 1962-o fea lava le Iunivesite na a’oga faa-Loia ai le Palemia? Se iunivesite i Samoa nei poo se iunivesite –i lo latou lava itumalo? O le a sou taofi? 

4. Matauina i Tala fou o lea o loo tau saili se isi galuega a le Faatonu Sili Aoao talu ai  o le Matagaluega o A’oga, Taaloga ma Aganuu ina ua mavae le Faiga-Palota Lautele talu ai nei-lea sa tauva ai-ae ua le faamanuiaina.

O le fesili la-o lona uiga na faamavae mai lana galuega lea alii ona o le faiga-palota talu ai nei?  O le fesili-aisea na le mafai ai ona ave ni ona aso malolo mo lea faamoemoe-aua o le faiga masani lea sa fai i tagata faigaluega o le Malo e fia tauva i le Paslota-afai e i ai ni ona aso malolo- ona faaaoga lea-ae afai e leai- ona talosagaina lea o aso malolo ae leai se totogi poo le (Leave without pay). O le uiga la o se faamatalaga-afai sa le manino lelei lea tulaga-talu ai ona e manumanu ia Matafeo o le a maumau lenei alii aoga- e tautuaina lo tatou atunuu! O le a la sou taofi?

© Samoa Observer 2016

Developed by Samoa Observer in Apia