E suamalie le ola tausi-aiga

Tusia Seia Soloi ,

137 Hits

Fai-faatoaga tautua ai le aiga: Mati Maiava mai le nuu o Luatuanuu.

Fai-faatoaga tautua ai le aiga: Mati Maiava mai le nuu o Luatuanuu. (Photo: Sei’a Soloi)

O le taule’ale’a ia Mati Maiava, 28-tausaga le matua mai le afioaga o Luatuanuu ma ii lona ola a’e a ii totonu o lona aiga, o ia o se faifaatoaga ma o lana galuega lava lea i aso uma o le vaiaso ma ii le Aso Gafua i le Aso Toona’i.

“O le matou aiga e le’o se aiga e toatele ni ona tagata o lo’o nonofo ai e na’o le toaono lava i matou ma i le matou aiga e leai seisi o matou e faigaluega ua na’o le pau lea o le mea o lo’o faamoemoe iai ua na’o le faatoaga lava mo le ola a ii aso uma” o lana tala lea i le Fofoga o Samoa.

“O le faatoaga lava le faamoemoega atoa o lo’u aiga ma le tausiga e le faatauina ae o le naunautaiga ina ia maua se matou meaai mo aso uma aua le tausiaina ai o le aiga aua e le toatele lava i matou.

Mo Mati ma lona aiga o le latou faamoemeoga atoa o le maumaga, na fesiligia ai foi pe o fia saili sana galuega mo le lumanai, ae ia faaalia e sili lava le olaga o le fai-faatoaga.

“O le toatele lava o tagata e faimai e saili sa’u galuega e fesoasoani ai i le aiga ae ia a’u lava ia na ou fanau mai lava ma lo’u iloa o a’u o se tagata fai-faatoaga out e fesoasoani a ii lo’u aiga ma o lo’o o’u fiafia lava e fai aua ua ou iloa lava o a’u lava o le fai-faatoaga.

I lana mau e moni ua taugata le tau o le soifuaga ae o lana lu’i lea mo nisi o tagata o lo’o faapaie ona tautuaina aiga e sili lava le galue i le faatoaga.

“O la’u vaai lava o le toatele lava o tagata e le gafatia le tau o le soifuaga ua iai nei aemaise lava pe a fua atu i le matou aiga e leai seisi e faigaluega ae ua avea lava le faatoaga ma o matou manuia i aso uma, ua lau silafia lelei lava e le atunuu o le olaga e alu agai i luma ma ua faapena ai foi ma le tau o le soifuaga.

“E sili ai lava le galue i le faatoaga e maua ai le fiafia ma le saoloto aemaise lava le ola faigofie e maua lea ma le filemu.

O lana mau e sili lava le galue i le faatoaga ma e suamalie e leai se vevesi e maua mai aua o lo’o maua mea uma ma le filemu aua le tausiga o aiga ma fanau.

O lona naunautaiga ina ia faia lava sona ia lava aiga i le lumanai ae o lo’o faamuamua i lona olaga atoa le tausiga o lona aiga, aua e pei o lona valaauina lava lea o le fai-faatoaga mo le tausiga o aiga.

© Samoa Observer 2016

Developed by Samoa Observer in Apia