Le a fusu Lupesoli’ai i ona malae

Tusia Patrick McKendry - The NZ Herald ma Maiava ,

232 Hits

FA’AMAONI I KOLENIGA: Lupesoliai La’auli Joseph Parker.

FA’AMAONI I KOLENIGA: Lupesoliai La’auli Joseph Parker.

 Ua faia e le vaega o fuafuaina fusu’aga a Joseph Parker le avanoa aupito lelei, ina ia manumalo ai i lana fusu’aga o loma nei, lea e fetaui ai ma Carlos Takam. 

O le faia lea o le fusu’aga i le Nofoaga Tutotonu a le Vodafone i Manukau, ‘Aukilani, pe a ma le iva kilomita mai le nofoaga sa soifua ane ai.

O le fale lea e na o le tolu afe tagata e ofi ai, pe a fa’atusa i le Vector Arena i le talafatai o Aukilani, lea e tele mamao atu, e ofi ai le silia i le 12 afe tagata, peita’i, o le mana’o lava o Lupesoli’ai e faia i lona teritori ae maise atonu o lana fusu’aga mulimuli lea i Aukilani i Sasa’e, ma ua ioe fo’i iai lana vaega, le Duco Events i lona mana’o. 

Ua fa’alua ona fusu Lupesoli’ai – lea o lo’o fa’amautu nei i Las Vegas – i le fale lea i Manukau ma na manumalo a’ia’i ai i ali’i Amerika o Brian Minto ma Jason Bettaway i tu’i-oti, ma ua masani ai e fusu i le si’osi’omaga na soifua ai, i luma o ana uo ma aiga.  

“Atonu o le taimi mulimuli lea o le a fusu ai i Aukilani i Saute ma e le’iloa se isi taimi,” o le fa’aaliga lea a Dean Lonergan, le fa’atonu o fusu’aga a Parker.

 “Ua matou manatu lava, o le nofoaga aupito talafeagai lea ma lelei mo ia. E le matua to’atele na’ua nisi e ofi i le fale lea peita’i, o le po aupito ta’uta’ua lea ma logologoa i totonu o Niu Sila, ae maise o le fusu’aga ‘aupito taua lea ma tele ua faia i Niu Sila nei.” 

A manumalo Parker (lea e le’i faia’ina lava) ia Takam (o lo’o fa’amautu i Farani), o le a fusu loa ma le tagata o Anthony Joshua ma Charles Martin e manumalo i le la fetauiga lea o le a faia i Lonetona i le Aso 9 o Aperila.  

I tulafono a le Fa’alapotopotoga o Fusu’aga a le Lalolagi (le IBF), e mo’omia ai Joshua, e tatau ona fusu ma Parker ia Ianuari i le tausaga fou. O lea fusu’aga o le a faia i Lonetona, na ta’ua e Lonergan, e ona faia i le Malae o Wembley.

“A taunu’u ona fusu Joseph Parker i Egelani i se taumafaiga mo le fusi o le lalolagi, e mautinoa lava, o le a faia lea fusu’aga i luma o le silia i le 100 afe tagata. ‘Ou te le-iloa pe sa ia se isi Kiwi na o’o muamua i lena mea. A o le iai o se ‘au-matamata e 100 afe e maimoaina le alofaiva o ni tama-fusu i se fetauiga, o se mea mata’utia lea e seāseā ona ‘ausia. O le a avea fo’i ma fusu’aga tele o le a fa’amauina i tala-fa’asolopito o fusu’aga.” 

Na fa’aalia mai e le Fa’atonu o fusu’aga a Takam, le Italia o Christian Charchi, e sili ia te ia ona fai o le fusu’aga lea ma Parker, i totonu o Pale i Farani.

Ae na ia fa’aalia ai fo’i, o se fusu’aga e tama-fusu e tutusa lelei ma e tele le avanoa e malo ai lana tama i le tu’ioti ia Parker. 

“O le mea moni lena, o se tasi o lu’itau tele mo Parker – lea e le’i fusu lava ma se tagata e pei o Carlos Takam,” o le fa’aaliga taufa’afefe lea a Cherchi.

© Samoa Observer 2016

Developed by Samoa Observer in Apia