Vaega Pogisā (Vaega I)

258 Hits

Toe mafaufau tasi lava A’o fa’atalitali le taimi o le malaga a le tasi tama’ita’i i le malae va’alele, na tago fa’atau se tama’i pepa keke e lamulamu ma faitau lana nusipepa. Na ia iloa, le i si tagata, ua a’apa atu i le pepa keke.

Na fa’ate’ia i lona iloa mai tua o lana pepa o faitau, se ali’i la’ei-lelei, ua tago atu ‘ave ana keke!. E le’i mana’o e fai sana tala, ae na ona a’apa atu lava o ia, se’i mai lana  keke, ma ‘ai.

Na matuā lē talitonu ona e le’i atoa se minute, a ia toe va’aia fo’i le ali’i lea, ua toe ave fo’i ana keke. O le taimi lea, toeititi lava uma keke! Ua atili lona ita, ina ua tago le ali’i lava lea, vaelua lana keke mulimuli, ae avatu le isi ‘afa ma ia.

‘Ai loa le ‘afa-keke a le ali’i lea ma savali ‘ese. Ua atili ai le ita o le tama’ita’i lea. E savali a la i luga o le va’alele, ua le mafai lona ita i le ali’i lea. Ae na matua te’i ina ua tatala atu lana ‘ato ta’ita’i, e siaki lana pepa malaga, ae tau atu i lana pepa keke na fa’atau, e le’i tatalā.

O le taimi lea, fa’atoa na iloa ai, o le pepa keke a si tamaloa lea sa na ‘aia, ae le o lana pepa keke! E ui lava la o ia e sesē, a o le ali’i agalelei ma alofa lea, na fa’atagā o ia, e ‘ai lana pepa keke 

Na matua mafatia si tama’ita’i lea ma fa’anoanoa, ona ua na fuaina, ma fai lana lava fa’amasinoga ma lana fa’ai’uga o si ali’i lea. A’o ia lea na matua pogisa atoa ona o lona mitamita fa’anene’i, fa’apea o ia e sa’o, ae leai, o lana susuga lava e leaga.

Na mafua ai ona pogisa lona mafaufau i le agalelei o lea ali’i ia ia. 

O le fa’anoanoaga lea, ona tatou te fua i si tagata, tusa lava pe o tatou e sese. Fa’apea tatou, tatou te iloa lelei uma sese o tagata ma o latou vaivaiga, ae ua tatou tauaso ai i o tatou lava tagata!

Ua tatou fa’apea ane lava, ua sili atu lo tatou iloa ma le malamalama, nai lo mea moni ua iloa. Pei o le teineititi na fai i lona tama: “Papa, ua ‘ou iloa lava mea uma!?” Tali lona tama: “Oi, e a ea? Ae fa’apefea ona e iloa?” 

Tali le teine: “Ia, sa ou mafaufau ma mafaufau ma saga mafaufau – ma ou le manatu ai i se i si lava mea ou te leiloa!”   

O le popolega tele lea, ona o le mea lena a tatou - tagata matutua e fai - pe a tatou fuaina ma fa’amasino i si tagata – ui lava e tele a tatou mea sese i o tatou uiga ma aga, ma le va-feagai ai ma isi i le soifuaga nei.

Tatalo nei  ia Iesu, le Fa’amasino moni e fa’amaon, ina ia fa’amagalo ‘Oe ona o ou mitamitaga sese, ua e tauaso ai i ou lava sasi ma fa’aletonu i lou olaga. E na o Iesu e fesoasoani e amata ona suia ‘Oe ina ia avea o le tagata moni fa’amaoni ma fiafia e pei ona ia faia ai ‘Oe.

O se tagata e alofa ma fa’amagalo i isi, e pei fo’i ona Ia faia mo ‘Oe. Toe mafaufau tasi lava…                                            

(Fa’aliliu e Maiava)


© Samoa Observer 2016

Developed by Samoa Observer in Apia