Tatala aloa’ia le Ofisa o le Konesula Samoa i Fukushima, Iapani

Tusia Maiava ,

218 Hits

Ua tatala aloa’ia nei le Ofisa o le Konesula o Samoa i le Matagofie o Fukushima i Iapani.

O le Aso To’ona’i talu ai, na fa’atinoina ai lea fa’amoemoe  ma sa ‘auai atu iai le sa avea talu ai ma Sui Palemia, o Fonotoe Pierre Lauofo. O lea Ofisa, o lo’o i le nofoaga –‘autu o le kampani o le Joban Kosan.

O le kampani lea o lo’o fa’atamo’ea le faletalimalo o le Hawaiians Spa Resort i le a’ai o Iwaki, ma e fa’a’autu i faiga ma aga fa’aPolenisia. 

O le Ofisa o le Konesula o le a galulue fa’atasi ma le Amepasa o Samoa i Iapani, aua le fa’alauiloaina o Samoa o se tasi o nofoaga mo tagata-tafafao, o le una’ia o fefa’ataua’iga, ma le sa’ilia o avanoa fa’aPisinisi i le va o Iapani ma Samoa ma tu’uina atu fo’i fesoasoani mo tagata-nu’u Samoa o lo’o i lea itu o le lalolagi.

I lea lava sauniga, sa aloa’ia ma fa’atinoina ai fo’i e le Amepasa o Samoa i Iapani, o Fa’alava’au Perina Sila-Tualaulelei, le avea o Naomi Inoue – le Peresetene o le Kamupani a le Joban Kosan, e avea ma Konesula Samoa i le A’ai-Matagofie o Fukushima 

I lana saunoaga, na ta’ua ai e le Amepasa o Fa’alava’au, o le tatalaina aloa’ia o le Ofisa o le Konesula Samoa i Iapani, o se la’asaga au-i-luma mo le atunu’u, e atili fa’atauaina ai ma amana’ia le so’otaga va-va-lalata a Samoa ma Iapani ma o se fa’amoemoe taua, aua le atina’eina o le tamaoaiga o atunu’u uma e lua.

Sa ‘auai Fonotoe i lea fa’amoemoe, lea o lo’o iai i se asiasiga aloa’ia sa tapenaina e le malo o Iapani.

O lea asiasiga sa tapenaina i le taimi a’o avea o ia ma Sui Palemia.

O isi malo fa’aaloalogia sa iai i lea sauniga, e aofia ai le Sui Kovana o Fukushima, le Pulenu’u o le A’ai o Iwaki, le Peresetene o le Fono a Faioloa, o sui o le malo, o sui o le Komiti Fa’afoe a le Kamupani a le Joban Kosan ma nisi na vala’aulia o lea a’ai.

Ona o taumafaiga lava e una’ia faiga-fa’apa’aga mo le tamaoaiga lautele, na talosagaina ai fo’i e Samoa le malo o Iapani, ina ia faia mai i Samoa nei, le isi asiasiga ma le fono mo fefa’atua’iga a le Pasefika, lea e faia ia Iulai o le tausaga nei. O lo’o galulue nei la malo e lua, mo lea fa’amoemoe.

O le Taulaga o Iwaki i Fukushima sa talimalo i le fa’amoemoe lea ia Me 2016, lea sa auai atu i ai le Ali’i Palemia, o Auelua Fatialofa Lupesoli’ai Tuila’epa Sa’ilele Malielegaoi 

O le le-misia o se fonotaga ma fa’aaliga nei a le PALM, ua fa’aigoa ai Tuila’epa o se “Tama-tuai o le PALM” ae maise lava le Palemia o Abe, i le fonotaga talu ai. 

O lenei itulagi ma Samoa, e tali tutusa lava o latou tala’aga i mea nei o sunami, ua tele ai soifua ua ma’umau ae maise le tele o mea e fa’aleagaina na a’afia ai le soifua i afio’aga ma alalafaga ma o lo’o tele pea a’oga lelei e maua ai e Samoa mai polokalame toe-fa’aleleia o lo’o fa’atinoina e le a’ai lea o Iwaki i le taimi nei.

© Samoa Observer 2016

Developed by Samoa Observer in Apia