UA TUUA’IA LE FOFOGA FETALAI

Tusia Pai Mulitalo Ale ma Seagaitumua Tupuola ,

559 Hits

Leaupepe Tole’afoa Fa’afisi

Leaupepe Tole’afoa Fa’afisi

Ua tuua’ia le Fofoga Fetalai o le Palemene, o Le’aupepe Toleafoa Faafisi i faiga tau faasese e tusa ai ma le Faiga Palota Lautele talu ai nei. O lea tuua’iga e afua mai le filifilia o se sui faatu mo le Itumalo o Aana Alofi Nu.1, o Aiono Tile Gafa, o ia lea ua na faauluina se tagi tau le faiga-palota e faasaga ia Leaupepe ma le Ofisa o le Komesina o Faiga-Palota.

O le ‘auga o lea moliaga sa le mafai ona faamautuina anapo.Ae ui o lea, o lea faamasinoga o se tasi lea o talosaga tau faiga-palota e lima ua faaulu i le Matagaluega o Faamasinoga ma Pulega Tau Faamasinoga e o’o mai i le itula e 5 ananafi, o le taimi lea e tapuni ai le faauluina o talosaga tau faiga-palota. 

O lenei mataupu na faamaonia e le Ofisa Sili o Pulega o le Matagaluega o Faamasinoga ma Pulega Tau Faamasinoga, o Papalii John Taimalelagi.

 

O isi talosaga e fa e aofia ai:

• Lafaitele Patrick Lei’ataualesā e faasaga ia  Aliimalemalemanu Alofa Tuuau

• Ale Vena Ale e faasaga ia Lealailepule Rimoni Aiafi ma le Komesina o le Ofisa o Faiga-Palota.

• Palusalue Faapo II e faasaga ia Leaana Ronnie Posini ma Manualesagalala Enokati Posala

• Anae Misa Pita e faasaga ia Taefu Lemi 

E tusa ai ma le faaaliga a Papalii, o talosaga uma lava ua uma ona tauaao atu i le Faamasino Sili, Lana Afioga Patu Tiava’asu’e Falefatu Sapolu mo se toe iloiloga ma le fuafuaina o se aso e fofogaina ai.

 “O le Asō i le itula e 5 i le afiafi o le aso mulimuli lea mo talosaga uma lava tau le faiga-palota ma e na o le lima talosaga ua uma ona faaulu,” o le faaaliga lea a Papalii.

Na faamaonia foi e le Ofisa Sili o Pulega e tolu isi mataupu tau solitulafono e faasino i le palota ua uma ona faaulu i le Faamasinoga, ia o le a fofogaina i le aso 12 o Aperila 2016.

O nei mataupu e aofia ai ni moliaga tau solitulafono e faasaga i ni Sui Usufono se to’atolu o le Palemene, ia ua uma ona faaulu e ala i ofisa o loia tua mo moliaga tau solitulafono.

O Sui Usufono e to’atolu o le Palemene ua tuua’ia- o Sala Fata Pinati o Gaga’emauga Nu.1, Nafo’i Talaimanu Keti o Gaga’emauga Nu.2 ma Pa’u Sefo Pa’u o Faasaleleaga Nu.2.

Sa le mafai e le Ofisa Sili o Pulega o le Matagaluega o Faamasinoga ona faamaonia pe o a moliaga-vagana ai lana faaaliga e faapea o ia moliaga o le a faaalia lava i totonu o le Faamasinoga. Na toe ta’ua e Papalii e faapea e leai se aso e faamuta ai le faauluina o mataupu tau soligatulafono  e tusa ai ma le faiga-palota lautele talu ai nei.

 

© Samoa Observer 2016

Developed by Samoa Observer in Apia