1. Matauina i Tala Fou se ulutala e faapea ua tuua’ia le Fofoga Fetalai o le Maota-o Le’aupepe Toleafoa Faafisi-ona o ni faiga sese i le Faiga -Palota Lautele talu ai nei.

O lea la tuua’iga –o se tuua’iga lea a se tasi o sui faatutu mo le Faiga Palota a le Itumalo o Aana Alofi Nu.1 -o Aiono Tile Gafa-ma o se talosaga tau le Faiga-Palota e faasaga ia Le’aupepe ma le Ofisa o le Komesina o Faiga-Palota.

O lea la tagi e faapea ua uma ona faaulu i le Faamasinoga-ma o lea fo’i tulaga-ua uma ona faamaonia e le Ofisa Sili o Pulega o le Matagaluega o Faamasinoga ma Pulega Tau Faamasinoga-o Papalii John Taimalelagi.

Ia- e ui lava la ina e le o faailoa maia le pogai o ia talosaga poo faiga pi’opi’o i le Faamasinoga-ae o le mea moni-o lea ua aliali mai-e le’i ‘asa le Faiga-Palota Tele talu ai nei-ma faiga pi’opi’o-ma  atonu e le ona pau foi lea o le Fale Palota na fai ai ia faiga pi’opi’o!

Masalo ana mafai ona suesueina lea tulaga-ailoga e i ai se Fale Palota e tasi i le salafa o Samoa- e sao mai lea tulaga o le faimea pi’opi’o? Afai la e faamaonia ia faiga pi’opi’o-o lona uiga –ailoga la e i ai se sui faatu e to’atasi na te le’i faia se faiga pi’opi’o?

Afai la na filifilia nisi faipule ona o faiga pi’opi’o-e faapefea la ona latou faia le amiotonu ma le faamasinoga i le atunuu? O le a sou taofi? 

2. Ua matauina foi i Tala Fou se ulutala fai mai-“O loo tumau pea ona avea a’u ma tagata ua matua fiafia lava……- ma o lea ulutala e faasino i se Sui Usufono o le Palemene ua leva ona tautua-o Faumuina Tiatia Liuga! Ia-afai la ua ta’utino le solo a le tamaloa e pei o lea muagagana- o loo tumau pea ona avea ia ma tagata fiafia-e leai se mea e tasi o lea faaupuga o sese!

Aisea? Ia-a tatou tilotilo nei i le faitau miliona ma miliona o tupe o le afu maligi o le atunuu na ia faamaumau a’o avea o ia ma Minisita sa vaaia le SLC poo le Faalapotopotoga o Eleele a Samoa-toe faamaonia e le Pule ma Su’etusi Sili-ma saga toe faamaonia e le Komiti a Alii Ofisa o le Palemene-ae le o mafai ona falepuipui ai e pei ona faia i isi tagata o le atunuu-a faapefea ona le tautala mai-pe na o tagata o le atunuu e falepuipui pe a gaoi le $10? 

O le fesili taua lava-o le a la le ituaiga o fiafia lea e ta’ua e Faumuina Tiatia Liuga? O le mata poto poo le faalafi o le mea moni ina ne’i iloa tino ai le va’ava’a o le HRPP? O le a sou taofi? 

3. Matauina i Tala Fou se foliga vaaia o se Malae Vaalele Fou Faava-o-malo i Faleolo ma o le tau o lea Malae Vaalele e $400 miliona! O le matau la i lea galuega-o se matua galuega tele lava-ma e foliga mai-o lea foi ua ave i ai le faamuamua!

O le fesili la-e i ai se mea ua faaletonu ai le malae vaalele o loo i ai nei? O le a se faamaoniga a uma ona fai lea malae vaalele taugata-ona matua fetuleni mai lea o le faitau afe ma afe o turisi mai fafo?

E fia ni vaalele tetele o le a felelei mai i Samoa e aumai turisi pe a mae’a i lea aso ma lea aso? O fea e aumai ai lea $400 miliona? O se foa’i poo se tupe faa-meaalofa pe o se faaunegatupe?  Afai o se faaunegatupe-o ai na te totogiina?

Ia o lea o le a fau lenei malae vaalelei e $400 miliona lona tau-ae leai ni vailaau i le Falema’i Tele i Motootua-toe leai ni foma’i e faia togafitiga mo le atunuu? Sa faita lava o le faamuamua moni -e faasino lea i le soifua maloloina o le atunuu-ae o lea e matau atu-e matua leai lava! O le a sou taofi? 

4. Matauina foi i Tala Fou fai mai ua tafiese mai le afioaga o Salelologa ni alii se to’alua-talu ai se faalavelave na tupu i le vaiaso talu ai-lea na fasi ai se alii mai Salelavalu, tau’ai i ma’a ma toe susunu lana taavale.

A silasila la i le tulaga o nei faalavelave ma lona tula’i mai totonu o Samoa-o mea nei e masani ona tatou vaaia i ata tifaga mai fafo-aemaise ai o faiga a le ‘au-faatupu faalavelave ia ua vesia ai le lalolagi atoa ma ua le avea ai ma nofoaga e saogalemu mo le nonofo ai o tagata soifua.

A fua la i lenei faalavelave na tupu i Salelologa –ua mafua ai ona tafiese ia taulele’a e le afioaga-e peiseai ua toe fo’i Samoa i aso o le pogisa-pe ua taumafai foi e faata’ita’i i le faiga o faiga faatupu vevesi i fafo!

Ae poo le a lava-tatou te faafetaia pea le Atua ona o le faavae popo o Samoa ia te Ia ma lana aganuu-aua ana leai ia faiga ua faata’oto ma le aganuu masani o le fetausia’i ma le fealolofaa’i-semanu ua tala tuu mai faiga faatupu faalavelave i fafo-i lo faiga a le tupulaga ua i ai nei. O le a sou taofi?