LAUGA - “Ona aapa atu lea o lona lima, ma tago iai, ma aumai ia te ia i le vaa”

1192 Hits

E le o tagata uma e tausi mea fafaga. E le o manu uma foi e lalata i soo se fāgaga. E iai lava manu e faafitauli (f.7), a o le tele lava e ‘ai taumulimuli. O le tala i le lolo ina ua tau mauiui o le vai ma ua ali tumutumu mauga, na tuuina atu ai e Noa le lupe ia iloa ai po ua papa’u le vai i le fogaeleele. A ua le maua e le lupe se mea e tu ai ona vae ona toe foi lea i le vaa ia Noa. Ua tā’ua e le tusitala, “Ona aapa atu lea o lona lima, ma tago iai, ma aumai ia te ia i le vaa.”


(Kenese.8:9)


MANATU AUTU: “E āuāu le Atua ia te oe.”


Petaia Setu

O le talitonuga lava ia faa Samoa, o le mătua alofa, o le mătua e ’ote. A o upu foi a le atunuu, ‘e tetele a pesega, ae mătua lava i le ōō. Poo le a lava se ma’ema’e, ae galo lava i le alofa. O le talitonuga foi lenā o le aposetolo o Paulo, “O le alofa e lautua lea i nei mea uma, o le fusi lea e atoatoa ona lelei ai.” (Kol.3:14).

O le tala i le lolo, o le faamasinoga ma le toasā faaalia o le Atua (Ken.6:13). O le vaa o Noa, o le alofa faaola ia o le Atua (Ken.6:18-19). O le faamoemoe o le vaa, o le olataga mo ē ua salamō ma mata’u i le Atua. Fai mai le tusitala o le tusi  nei ua toe foi le lupe i le vaa. O loo  manino foi le mafuaaga; e leai se mea e tu ai ona vae. O lona uiga, na o le vaa e maua iai lona ola. O loo i le vaa aao agalelei. O loo i le vaa le alofa faa tinā. O iai le mafanafana. Le mafanafana na te faafofoaina le ola fou. O le ola fou na te tapenaina se amataga fou mo le lalolagi fou. O le ata lena o lenei mataupu; o le ola fou, i se siomaga fou.

O Noa, ua faasaoina e le Atua ona e sao lana amio. O le tagata amiotonu ia ma le mata’u i le Atua . Sa feoai ma le Atua, auā e āuāu iai le Atua. E fiafia iai le Atua. I le, ua faapelepele lava ia ia Noa. Faapei ona aapa o Noa ia maua mai le lupe i ona lava lima, e faapenā foi aao faaola o le Atua na aapa mai ai ia Noa ma aveina atu i totonu o le vaa mo lona faaolaina.

Samoa, o le lupe i le tala nei, o le faailoga o le agaga sōlia poo le loto filemu, ua ia lagona ma talitonuina, o i lona matai lona ola ma lona saolotoga. E eseese ma le oreva. O le oreva, ua tu segi. E nanamu lava ia i le lalolagi tuai. Ua fefoifoia’i ma tu mamao i luga o le vaa, ae le o totonu ia Noa. Na te le o maua le mafanafana o totonu, auā ua le manatu i sona sao mo le siomaga fou. E fia ola tutoatasi ma pulepuletutu, ae le fia soalaupule mo se amataga o le lalolagi fou. 

Silasila Samoa i lou malo! Silasila i lau ekalesia! O le ā le matāfaioi a le malo? A o le a le faiva o le ekalesia? Soo se mătua lava e āuāu i mea nei o fanau. Silasila foi i le loto sa ia Noa, e putiputi i le ola ma le saogalemu o le lupe. Ae faapefea tatou? E iloa i fea o loo popole se pulega faale malo i se lumanai manuia o le atunuu? A o afea e lagona ai e pulega faale lotu se alofa faaola i le mapu ea a le ekalesia? Fai mai le Kenese, “ona aapa atu lea o lona lima.”

O lona uiga, ua pulunaunau lona loto ia laveai; ia mapu; ia saogalemu; ia ola, “ma tago iai” E le mafai ona e iloa le mamafa o loo amo pe a e le tago iai. E le i uma timu o le lolo. E le o maua foi se pa’u mātū i le fogaeleele. O loo susū uma le tino o le lupe. Ua maalili foi i le mālūlū o le sau! O loo lagona le fefe ma le popole. Ua manaomia ona pa’i atu iai o lima mafanafana; lima alofa; lima faaola. Ua tatau foi ona  faaitiitia folafolaga, ae faatino le auaunaga i nuu ma afioaga; i le siomaga ma le soifua o tagata.

Ua ila foi taliga i le lauga soo o le alofa, ae lipi sona faatinoga. O le upu moni, soo se tagata mafatia lava (gasegase), e le  gata ina fia vaai atu i ou foliga, ae sili ona fia faalogologo i le fegāsoloa’i o le toto mafanafana o loo i ou lima. Tago iai, ona e tausoaina lea o ona tigā. Tuu iai lou ola i lona ola, ona e mautinoa lea o lona pologa.

E sola tiga pe a e pa’i i lona tino mafatia. E le i gata ai i lea. “Ua aumai ia te ia i le vaa” O lo ta tiute lea. Sii a’e le tagata puapuagatia (Luk.10:34); faafuata le ua maua mai i lou fatafata (Luk.15:45). Faamălie i le galala o le mativa (Luk.15:31). E afua i se a lea mea lelei? E alofa le Atua ia te oe! E pele oe i le Tamā. Poo fea lava tatou te taamilo ai, na te le tuulafoaiina i tatou (Sala.23:6). Na te avatu oe ma a’u ia te ia (o le vaa), auā ua na o le vaa e faaolaina ai i tatou.Manatua le igoa o Noa – o mapu; malologa.

E mapu iai le tagata ua lailoa i lou sauā. E to’a iai le ua fetulina’i solo i lou papano. E malolo iai tagata ua le maua se mea e tu ai i au pulega! E fai ma malologa o le tagata ua toefuataina lona olaga. Le tagata ua le maua i le lalolagi nei sona saolotoga. Le tagata ua malemo i tuinanauga! E faapefea ona e utufia loimata o le atunuu? Ae faapefea ona e faana le tagi ‘ū’ū a le ekalesia? E mātū ia Noa. E nā ia Noa. Ioe, e manaomia lava se Noa i pulega a le malo ma le kealesia. Se Noa ua alofagia e le Atua.

E feoa’i ma le Atua. E pulea ma taitaiina e le agaga o le Atua. E mapu iai le atunuu. E saoloto ai Samoa. E manuia ai tagata lotu. E ola ai agaga o le ekalesia. E malolo iai tagata uma. I le ma lenei; Ia uumi lima o Noa ma lana taupulega. Ia āu i nuu uma ma itumalo o le atunuu. Ia tago atu i le tagata ma’i ma le tagata mativa. Ia aapa atu i aiga lima vaivai ma aiga ausage. O ulugalii tete’a ma aiga malepelepe; o le gaoi ma le toso teine. O onaga ma sauaga; o le faamaualuga ma le ola faatautala.

E le tatau ona lafi ou lima i lau taga. ‘Aua foi le faapuupu’ua ou lima i lou fatafata ma ou autafa; a ia aapa atu ma faamāfola, ina ia faaolaina ai le atunuu ma le ekalesia. Ia āu i tagata uma; ia maua tagata uma; ia manuia tagata uma.

Samoa e, e galulue tatou uma. E iai foi lau pitolaau. O loo o tatou fetafeaa’i foi i lologa o tu’inanauga ma tofotofoga ma faaosoosoga a le fili. Samoa e, e te le maua i na mea uma se mea e te mapu iai. E le maua ai se mea e tu ai ou vae. ‘Aua ne’i pei oe o le oreva; e tosina lava i le leaga o le lalolagi. Ua lafoai le manao o Noa, ae fai lona lava loto. Uso e, fo’i nei ia Iesu. O lona mafanafana e te maua ai le ola. O lona filemu e te maua ai le saolotoga. O loo aapa mai ona aao faaola ma naunau mai ia te oe. O loo valaau ia te oe, “ia outou o mai ia te a’u, o outou uma o e tigaina ma mafatia i avega, o a’u foi e malolo ai outou” (Mat.11:28).

Uso e, e te malemo i le mea lena o loo e finau iai. E te tafea i o tatou manatu faale tagata. Fo’i i le vaa. Faalogo ia Paulo, “afai e le tumau i latou na i le vaa, e le faaolaina” (Galu.27:31).

Manatua foi le ui’i faamaumau’oa, ua fiu i le lalolagi, e le i maua se mea e tu ai ona vae. E le maua i le lalolagi sona fiafia ma sona saolotoga. Ua malemo tupe; malemo le oa; toetoe lava a maumau atu ai ma lona talavou.

O le a le tala? E foi atu ma le masaesae, o loo naunau mai aao mafanafana o le alofa moni e talia o ia i le lalolagi fou. E faapena Samoa le naunau mai o lo tatou Alii. Na te fia sapaia oe ma faafuata i lona fatafata, ina ia tatou lagona lona mafanafana, ma ola i se amataga fou ia te Ia. Ioe, poo le a lava lou faigata ma lou faatafai, o le itula lava e te fulitua ai i lou olaga tuai ma liliu atu ia Iesu lou Faaola, e talisapaia oe ma le fiafia. Auā e āuāu le Atua ia te oe.

 

Amene.

7737063/7783782

E-mail: petaiasetu@gmail.com




© Samoa Observer 2016

Developed by Samoa Observer in Apia