Manatu o le Fa’atonu - O le upu moni lava i le taimi nei, o ai le vale lea e iinei?

236 Hits

Tusia - Savea Sano Malifa

Faaliliu e Seagaitumua Tupuola

 

E o’o mai i le taimi nei-o se masina matua uiga ese lava. Ma pagā le matagofie o le faiga e kiki amata ai se tausaga fou.

E leai se aso ua mavae atu e aunoa ma se faaupuga uiga ese e mapuna ae iinei ma iina e peiseai o lo latou faamoemoe atoa o le ta’ita’i filemu o le tatou Tausaga Fou i luma.. Ma afai e le lava le uiga o lena tulaga, tu’u maia o a’u e faailoa atu e faapea e tusa ai ma le gagana faa-polokiki, o se taimi uiga ese lea e fealua’i solo ai faavalevalea ia Samoa ua palavivi i faiga pi’opi’o, aemaise ai lava le faataamilo i le taulaga. Talitonu mai oe. O le fetaafa’i solo i lenei atunuu i lenei taimi o le tausaga e ono mafai ona avea ma mea uiga ese e manatua pea. 

Ma afai e te fia iloa moni, e mafai ona ‘ou ta’u atu ia te oe e faapea i totonu o mafaufau o tagata Samoa uma e popona i lea itu-o loo fesaea’i solo ai se tulaga popole mata’utia e faapea e ono mafai e le Palemene ona faatama’ia o ia lava- o lona uiga i le gagana faa-ata-i soo se taimi vave.

O se atugaluega lea ou te manatu, na afua mai uma ina ua aliali mai e faapea o loo aafia le Fofoga Fetalai i se finauga mataga ma se Minisita o le Kapeneta, lea e manino mai ua uma ona faaulu ai ni moliaga o le saini faamalosi ma faiga tau faasese ia e manino mai ua mae’a ona faatino. .I le taimi nei la o se tulaga mata’utia lea e faalumaina ai-ma o se mataupu foi e le manuia-pe afai e te fia iloa moni lava.

Ia, o le a la sou manatu? E te manatu la e le’i iloa e lea to’alua e faapea o upu saini faamalosi ma le tau faasese- o lona uiga o le le faamaoni, ina ua faatau aafia i la’ua e to’alua i lea finauga faavalevalea? E te manatu ona o lea ala-sa le mafai ai foi ona la iloa o loo la saeluaina le tulafono a’o i latou lava na faia? O le mea la ua tupu, e mafai ona faapea atonu sa tapunia o la mafaufau pe sa faaletonu poo na foi mea e lua, i le taimi na la faatagaina ai i la’ua ina ia taafilifili i totonu o lea faiga solitulafono e pei ona tuua’ia ai lea ua matua avea ma tau faamata’u e saeluaina ai lo la atunuu? 

Faamolemole faailoa mai ia i matou outou finagalo. Ma afai o lea mea tau polokiki mataga e le o alu faataamilo solo, o le lu’itau a le Minisita Faaolioli o Tupe a le Itu Agai o Afualo Dr. Wood Salele, mo le Palemia o Tuilaepa ina ia faamavae, ua matua talafeagai lava.

(Samoa Observer, 13 Ianuari 2016). Na faailoa atu e Afualo i le Palemene: “Ou te manatu ua o’o i le taimi e la’a ese ai ma faafiafiaina o ia i soo mea lava o loo totoe mo ia ma fiafia i lona soifuaga. “E faagasolo lava i luma le atunuu. E tatau ona tatou manatua e faapea i le avea ma Faipule ua na o i tatou lava o ni mea faigaluega, ua na o i tatou o ni mea faigaluega laiti.”

Ona faagasolo atu lea o Afualo i le Tusi Paia. 

Fai mai a ia: “Ou te fia faamanatu atu foi i le Palemia ma le H.R.P.P. le upu mai le Tusi Paia. O loo manino lelei i le Faataoto 29:18 e faapea “a leai se faaaliga e faasalaina le nuu.” Ona faagasolo lea o lana saunoga ma faailoa atu e faapea “e tele mea ua fai e le malo mo le atunuu, ae peitai-ua leai ni a latou fuafuaga fou.”

O se alii poto tau le tamaoaiga, fai mai Afualo: “O le mea o loo matou vaaia i lea taimi ma lea taimi mai le malo e leai lava se mea fou. Ua na o le toe faaleleia lava o faiga faavae tuai na latou faia i le tele o tausaga.” Afai la e fai se faatusatusaga, sa faailoa atu e Afualo i le Palemene e le fiafia lana vaega i mafaufauga tuai. Fai mai a ia afai e avea i latou ma malo-o le a latou aveeseina uma faiga faavae tuai e mafai ona latou maua mai le faiga-malo o loo i ai nei. 

O se vaaiga fou lenei ma o se mafaufauga fou,” o lana faaaliga lea. Na ia faafetaia le tele o mea na fai e le malo e ati a’e ai le atunuu e tusa ai ma galuega tetele, ae a pa’ia loa le tulaga tutusa lautele ma le atiina a’e o tagata, sa le mafai ona latou faia.” 

 “Afai tatou te nonofo i lalo ma Iloilo lelei e tusa ai ma fuainumera faamaumauina le tolusefulu poo le sili atu tausaga (o le pulega a le H.R.P.P) o lona uiga, e le o le tulaga lea e tatau ona i ai Samoa. Sa tatau ona sili atu le tulaga lelei o Samoa.” Ae mo Tuilaepa ma lona teena o a latou fuafuaga i taimi uma, fai mai Afualo-e le o se tulaga lea e faate’ia ai.   “E matua le faatuatuaina lava o ia i nisi taimi,” o lana faaaliga lea.

Ou te manatu o le tele lava o taimi na te faaigoaina a ii matou e valelea, ae na te matua le iloa lava o ia le tagata lea e faavalevalea.  “Afai la o ia o se tagata poto-semanu na te le mafai ona tautala ma faaleaga isi talu ai o le atamai mai le Atua e taofia o ia. Ae o le mea ua matou vaaia ia te ia e matua leai lava sona poto. “O la’u fesili la-o fea e aumai ai lona poto? O le mea moni lava e mai le tevolo. E foliga mai ia te a’u o ia o le sui o tevolo ae o lea lava tatou te faaaloalo ia te ia i le avea ma ta’ita’i.”

Oi ioe? Faamata ua mautinoa lelei e Afualo lea tulaga? O anafea le taimi mulimuli na saofafa’i ai i lalo o ia ma le tevolo ma talanoa faafesaga’i? O lea la tulaga, pe e te mana’o i ai pe leai, matou te fia iloa moni lava.  Ae poo le a lava, e pei lava ona faamoemoeina, o le lu’i a Afualo e faapea ua o’o i le taimi mo Tuilaepa e faamavae ai e le’i alu fua.

Ae na toe faaupuina lelei. (Samoa Observer, 13 Ianuari 2016.) O le manatu o Tuilapea:  “O le manatu o Afualo e anoano ni ana faiga, ae mo a’u lava ia, e leai ni o’u mafaufauga. E te’i lava ua tupu mai. Ou te ole i le Atua ina ia aumai ia te a’u ni mafaufauga.” Fai mai Tuilaepa o le faafitauli o Afualo ona e faalagolago i lona poto tau aoaoga. 

Ae o a’u,” fai mai Tuilaepa, “A pa’ia loa le faafoeina o le atunuu, e le masani ai ona i ai ni a’u faiga e fai a’i. “Ae peita’i, a ‘ou mana’omia ni mafaufauga, ou te faalagolago i le Atua. “E faapena le faiga o loo fai a’i. Afai ou te nofo iinei ae leai ni mafaufauga, ou ‘ou faapea atu lea:Le Alii faamolemole aumai ia te a’u ni mafaufauga.”

Ma o lona faatauaina o lona manatu e faapea o le faiga lenei o loo tausisia pea i soo se nofoaga i totonu o le lalolagi faa-temokalasi, o lea na ia faamatalaina ai le faiga e faatino ai e le Senate a le Iunaite Setete o Amerika lana fonotaga. “A valaau mai le Peresetene i le Senatoa mai Amerika Samoa e faai’u le aso i se tatalo,” sa faaalia e Tuilaepa.

“E tulai o ia i luga ma faapea atu, le Alii e-ia e tuuina mai ia te a’u ni mafaufauga e fesoasoani ai e fo’ia nei faafitauli.” Ma o le mea lea, ou te manatu o le faiga lena ua leva ona ia te ia i le faagasologa o tausaga sa avea ai o ia ma ta’ita’i o le HRPP, faapea foi ma le avea ma palemia o Samoa. 

O fesili la i le taimi nei e faapea:  O ai e ana le manatu e tuuina atu le mata tauaso i nisi o minisita o le kapeneta ia na tuua’ia e faapea na latou faaaogaina sese tupe a le atunuu e faitau afe ma afe –pe afai e le faitau miliona ma miliona –ma i le faatinoina o lea tulaga ua faaitiitia ai aiga i soo se nofoaga ma ua matua sili ona matitiva ona o ia faiga, ma ua faoa le aia tatau a latou fanau e maua fua ai se aoaoga e leai se totogi i a’oga maulalo?  

O le mea moni, o ai e ana le manatu e faataga tamaiti e tau lē lavalava e faalavelave i tagata i soo se nofoaga e ala i le faatauanauina o i latou e faatau ni mea’ai leaga o lo latou faatauina atu, ma ona pau lea o le ala o tupe maua mo latou aiga. 

Ma o le itu mulimuli, o ni fuafuaga nei a le Atua, pe o ni fuafuaga a nisi o tagata ola tau faasese e le ma faamagaloina?  O se itu taua tele lea pe a tatou iloa..Poo le a lava, ua latalata i le faiga-palota lautele, o le mea lea-ia ‘aua nei o tatou tausolomua ona tusitusi lima le tasi i le isi ma fai atu poo ai e sa’o a’o ai e sese. Ua fai sina tuai o lena tulaga mo le taimi nei. O le Fa tausaga o se taimi umi. Ua matua umi na’ua mo se tasi na te faia ai se mea sa tatau ona fai e se tasi e faaalia ai ua saunia se tasi e avea ma taitai o lona atunuu. O le aso o le taimi lea e tautala ai mea a se tasi ua fai, ae le o upu a se tasi. Ma ia ‘aua nei e faapea o le a faamavae Tuilaepa i lona lava loto i soo se taimi vave. 

Ma i le avea ma palemia o lenei atunuu ua loa ona tautua ma e noatia mo suiga lelei uma o loo tatou vaaia i le salafa o le atunuu i aso nei-ma i luga atu o ia mea uma le faaaloaloa e le ma teena  e faapea, i le avea ma taunuuga, o loo faaauau pea ona aga atu i lona ala mai le faataamilosaga o le lalolagi-o ia le tagata e toatasi e matua faigata lava ona faaseseina pe fulitua i ai.  Ia manatua o Tuilaepa o lona faia’oga ua maliu o Tofilau Eti Alesana-na filifilia o ia. Ma i aso nei, ua sefulu ma le lima tausaga talu ona tuumalo Tofilau, o ia o le tagata mulimuli lea o Mohigans”-pe a e loto i ai-lea sa faaauau pea ona faamanatu atu le pule aupito i taua a Tofilau fai mai: “O le mea e lelei mo Upolu e lelei foi mo Savaii.”  

I lea aso ina ua o’o i le taimi e tuua ai e Tofilau le Palemene mo le taimi mulimuli-Ou te manatua ma le manino lea taimi e peiseai na tupu ananafi-O Tofilau lea sa feavea’i i le nofoa faataavale sa tau le mavai ona gaoioi lava ia, na ia tuuina atu ia Tuilaepa lana faamanuiaga. 

Mulimuli ane, sa vaaia Tofilau ua faa-taavale ese lona nofo faataavle e lona faletua o Pitolua, ma e le’i umi-ae malaga ese i la’ua. O se taimi o le matua faanoanoa moni.. Ae poo le a lava, afai o lea vaaiga o se faaaliga, o le pogai lena e le mafai ai ona matua faafiafiaina Tuilaepa i le manatu lea o le faamavae, poo i se taimi vave i le lumana’i. Talu ai ona e pei foi o Tofilau, na te manaomia i ona ‘autafa se tagata talavou malosi –poo se tagata poto pe a mafai-e fepasia’i solo nofoaiga. Ma i lenei la vaega o le taimi, e leai se tasi. Ia outou maua Samoa se Aso Sa to’afimalie, ma ia faamanuia atu le Atua!..

 

* “The last of the Mohigans”.

                 O se tala na tusia e James Fenimore Cooper.

© Samoa Observer 2016

Developed by Samoa Observer in Apia