Onosa’i ma fa’atali i le taimi a le Ali’i

715 Hits

Na ou ola a’e i totonu o se aiga, e foliga mai sa fausia i le vaitaimi tonu sa soona nunumi ai le lalolagi e pei ona iai i fofoga a le Silisili Ese.

O lou tama o se tagata saua tele ma le itaita- gofie. E toafa le fanau a ou matua ao teine uma i matou, ma e iai lo matou tuagane fai, o le tama a le tuafafine a lou tama, na ia aumaia e fai ma o matou tuagane, ona o lona alofa mai ona i le leai o se taulelea o lenei aiga.

I lau maitau i le amataga mai o lou tutupu a’e e pei lo matou aiga o se aiga e fegasoloa’i ao o le lagi ma faamalumalu ai i luga a’e aua le faatupulaia o ni timuga, faititili ma ni matagi malolosi i le tele o aso o le olaga. A ou fua le faalemafaufau iai, o luasefulu pasene o aso o le tausaga e sologalelei ai le mafutaga, a’o le isi valusefulu pasene na o fevesiaiga ma le leai o se filemu e tulai mai ai.

O le tele o taimi e fesouaiga ai le mafutaga, ma tafili saunoa ai le tiapolo i le loto o lou tama, ma faatoa ma’ona lava lona ma’ema’ea ina ua oo lona aao malosi isi ou tina. O nisi aso e alu ai le tevaaga a si ou tina i lona aiga, ae alu lava ma ave a’u, aua o a’u o le pepe a le matou aiga.

E le galo ia te a’u se tasi po ta’aligoligoa ma le pogisa, a’o ma lalafi ma si ou tina i tua o le matou togaulu, a’o fealua’i solo lau toeaina ma le agaese pei o se Leona ta’anoa o lo’o tagi fesaea’i e saili se tasi na te aina. Afai na fai mai le Tusi Paia, “E leai se me e lilo i le silafaga a le Auta,” ou te talitonu e le’i lilo i le Atua ou lagona ma ou manatunatuga sa faafaupu’e i lou mafaufau i lea po.

Na ou tagi ma ou faapea atu i le Atua i lou loto, “Le Atua, se a le mea na e aumaia ai a’u i lenei aiga, aisea na le ave a’u i se isi aiga o i ai le fiafia, pei o isi aiga ia matou te tuaoi?” E iu ina ou itiiti i lea vaitaimi, pe a ma le fitu ou tausaga, ae oo ai le taimi nei o lo’o olaola pea i lou mafaufau lagona sa ou sa’i ai i le Atua i lea po, ona o le loto tiga, fefe ma le faanoanoa. 

Ua faagasolo pea aso o le soifuaga, ma aga’i foi ina matou matutua, ma ua amata foi ona taape le fuamanusina ona o uiga ia o le olaga e le tumau pea se mafutaga. Ua malaga ese atu lou uso matua i Hawaii ma aumau ai, o lou uso lona lua, na malaga mai i Tutuila nei ma nofomau ai mo se sailiga manuia mo si o matou aiga ona o le mativa ma le le tagolima. O lou uso e soso’o ane iai sa aoga i le aoga faafaiaoga i Malifa i Apia, aua le faaauauina lona tuamafai ina ua maua e ave malolosi o le alii o lenei lalolagi ma i’u ai ina fai lona aiga.

O si o matou tuagane fai sa faamanuiaina i le suega faafaiaoga i ia vaitaimi, ma nofomau ai loa i Apia se’i vagana faaiuga o vaiaso ona asiasi mai lea i Savaii. Ua toe nei na o a’u ma nai ou matua lo matou aiga. Sa ou aoga i se kolisi maualuga a si o matou Ekalesia E.F.K.S po o le Kolisi Tuasivi. Ua faasolo ina matua lou tama ma ua uma atu foi ma lona malosi, aua o se tagata galue tele i le faatoaga toe fiafia e fagota. Na ese se ma’i sa maua ai si ou tina i ia vaitaimi, sa faigata ai ona tauave faatasi ma lau aoga.

O le tele opo e tulai ai o ia ma fealua’i solo i le auala ae ou te leiloa. O nisi po e su’e atu ua oo i lona aiga i Palauli, ai e savali mai lava i le matou nuu i Lalomalava e tau i lona aiga. E toatele nisi e faimai o lou tina e faatausia e agaga leaga, ae ou te le ioe iai i ia faamatalaga. O lou talitonuga masalo o le fasi so’o o si ou tina ua mafua ai na tulai mai o se faaletonu i lona mafaufau, ua alia’e mai ai lea tulaga. 

Na i’u lau aoga i le tausaga 1985, ma maua ai lou avanoa ou te aoga ai foi i le aoga faafaiaoga i Malifa ae sa le mafai ona fa’aauauina lea avanoa maua gata e le tupulaga a lo matou nuu, ona o le leai o se isi e vaaia ou matua ma faia a la mea tausami, aemaise lava le tulaga faigata ua oo iai si ou tina. I le amataga o le tausaga 1987, na toe foi mai ai lou uso lona tolu ma lona to’alua ma matou nonofo faatasi, o se fiafiaga tele foi lea i lou loto ona ua iai nisi ua mafai ona fesoasoani mai i le tausoaina o lau pito laau.

O i foi faatoa ou iloa ma mautinoa ai lagona o le alofa moni faalematua sa natia ma faalilo i le loto o lou tama, ae sa ufitia e ona foliga pau’u ma le saua i le tele o tausaga ua mavae. Ou te le’i iloa sa mamafa i lona mafaufau so’u lumana’i manuia o le ala lea na ma malaga mai ai i Tutuila nei ma tu’u ai a’u i le afafine o lona uso e saili ai sa’u galuega ae toe foi i Samoa.

Sa le’i faigofie ia te a’u le motusia o le matou mafutaga ma ai o’u matua e iu ina lafulafua ma gaoa le ala sa faasavali mai ai le olaga, ae ua ou masani ma mea oona ma mea tiga o taimi sili ona faigata ia te a’u, o taimi maotu te faiaiga faatasi ai ma lo’u aiga fou lea ua ou nofo ai i Tutuila.

Ua laulau mai nei le anoano o taumafa ma kuka eseese ma le manogi i luga o le laulauai ua ou ofo ona e fou i la’u vaai ae na vave ona tau lou mafaufau i nai ou matua, ma ou manatua le tasi po na laulau atu ai le la mea tausami na’o le faalifu ulu suavaia, e leai se ti e molimoli ai ona ua leai se suka. Ua ou faalogoina ua maligi o’u loimata ua le mafai ona taofi ona out u lea i luga ma ou savali i le sigi fuluipu ua asu a’e vai i o’u mata e nana ai o’u loimata ou te musu e iloa mai e le afafine o le uso o lou tama ma lona to’alua i le mafatiaga lea ua oo i ai.

Ua o’o i le Aso Sa ona matou o uma lea i le lotu, e ese foi lea ituaiga tapuaiga i la’u vaai ma la’u faalogo, ae na vave ona ou mateiaina ina ua ou vaaia e patipati o latou lima i le tele o taimi, e vivii ma fe’ei tagata, e pepese ma fetagisi ona ou faapea ifo lea i lou loto oi o le lotu patipati. E ese fo’i la’u vaai i sia tapuaiga, ou te le faaleaga i le ekalesia sa ou ola a’e ai, aua o lotu uma i le Alii. Na avaga lo’u loto ma pei e fofo’e ese o’u lagona mafatia sa i ai, ona o uiga o tagata, e fiafia ma sagisagi mai e opoopo atu a’u ma ofo alofa mai e leai ni o latou uiga e vaai maualalo i lo’u tagata pe inoino ma aamu mai ia te a’u, aua ua latou iloa ia Moe lea ou te nofo ai faatoa ou sau mai Savaii. 

Ua mavae le tausaga e tasi talu ona ou tuvae mai i le Motu o fiafiaga, ua faagaioi uma foi o’u pepa nofomau, ina ia faigofie ai ona ou faigaluega. Ua faasolo ina matua le matou mafutaga ma ua amata foi ona ou iloa uiga ma amioga a lou aiga o lo’o o’u nofo ai.

O le taimi ua lelei o le taimi foi ua masesei, e fesuisuia’i fatuga ma lagona o lea aso ma lea aso e monia i le poto o Solomona i nisi o ana tusitusiga, “O ona po e ata ai ma ona po e tagi ai, o ona po e fiafia ai ma ona po e faanoanoa ai.” E ui i nei suiga o le olaga, ae sa le’i galo ia te a’u upu mulimuli a si o’u tama ina o le a toe fo’i, “Ia e onosa’i, e iai faafitauli o le olaga e le solo lelei pea aso uma o mafutaga, a ia e faamoemoe i le Atua o ia o lou fesoasoani.

Ua ese foi le lagona naunau i le lotu e pei o se nofoaga ou te to’omaga i ai e lafoa’i i ai a’u avega ma faafitauli o le vaiaso. E le gata i lea, ua amata ona mafanafana le ma mafutaga feso’ota’i ma lou Atua i le tele o taimi ma ua mama ai ma faigofie ai mea uma i lou olaga. I le fa’aiuga o le tausaga 1988 na ou faigaluega ai i le falei’a (StarKist) i le faamamaina o le i’a o se fiafiaga sili foi lea ia te a’u, ona o le manaoga sai le loto o le fia fesoasoani i nai mnatua ma le aiga i Samoa. Ua mavae le tolu tausaga talu ona ou faigaluega ae fai loa lou aig aina ua luasefulu ma le ono o’u tausaga o se taule’ale’a lava e faigaluega i se isi foi vaega i totonu lava o le kamupani. 

O se tagata au malosi ma sogasoga lona mafaufau i le faiga o so’o se matafaioi e pei o le kuka, aua sa faigaluega foi i se tasi faleaiga i totonu o le atunuu i aso ua mavae. E iai foi lona agavaa faakamuta o le ala lea na tuua ai le kamupani i’a (StarKist) ona o le tele o nisi sa faatoai mai a latou galuega i le fauina o latou laoa ma maota e o’o mai lava i le taimi nei. Sa faamanuia le Atua i lo ma aiga i se fanau e toalima, toafa teine ae toatasi lava si taulealea. Na ou nofo ma la’u galuega, ina ua amata ona fai le atina’e tamaiti.

Ua agai ina faigata le olaga ona ua faaopoopoina le fuainumera o le ma aiga, ma ua le gafatia foi e le galuega a le tama ona faafeiloai manaoga o le aiga, o faalavelave mai o ma aiga i Samoa aemaise mea e fai i totonu o le lotu o lo’o matou tapua’i ai.

Sa fai ma o’u alu faigaluega i le StarKist i nisi o vaitaimi ae le umi, pe a ma le ta’itolu masina ma ou toe nofo, ona o talavai a tamaiti masani i o la laotu tui faasolo, ae e le gata i lea o le momoliina i aoga, aua ua aoga le vaega matutua ia aoga tulaga muamua, a’o le aulaiti i aoga faata’ita’i. O le mea moni o a’u le isi tagata, sa tele ina palapala ai faila a le kamupani ona o le tia’i galuega ma le nofo so’o, talu ai lava le manaomia o le fesoasoani i le tausiga o fanau. Ua le o se tulaga lelei ua aga’i i ai lo ma aiga i lo ma ou vaai, ona ua leai se avanoa e mafai ai ona fesoasoani i le fanau i le faiga o meaaoga, pe afai e manava mai le tama ua vaivai, a’o lo’o o’u sifi po i le kamupani.

O se tasi o aso sa ma talatalanoa ai a le matou aiga, ma toe fefaasoaa’i ai o maua manatu, i seisi tulaga e toe faatulaga lelei ai lo ma aiga aua se lumana’i manuia o si ma fanau. Na i’u le ma filifiliga, o le tonu o le a ou nofo loa ma la’u galuega ae o le a fa’alu uma lo’u taimi i le tausiga ma le taumafaiga o a latou meaaoga, oa ua fai lava si pau maualalo o latou togi. Ua leai se mea e gata mai ai le fiafia o le fanau, ona ua maua le avanoa ua matou fai lotu faatasi ai i afiafi, ma fesoasoani ai i a latou meaaoga, aua o le ulu o le aiga, na ona fia uma lava o meaai i le po, pulou le ie afu ma le povi, moe vaivai ona o le mamafa o galuega o le aso. 

Ua aga’i ina faaletonu le galuega a le tama ona o le tele o nisi o aiga o le amataga o latou galuega, e ese le fiafia, toetoe a masagi i luga o le ea le kamuta, ae a levaleva ma faasolo o le a mae’a, oka e fiu, e tauva’avaai tagata o le aiga ua fa’atatafa solo ma ua pei e le masani.

O vaitaimi fo’i laia e na o le ai malie faasolo atoa ai o si a’u fanau. E ta’ifa i le lima vaiaso o fai tulaga a le kamuta ma le aiga e ana le galuega i so latou totogi, ai lava se’iloga ua malilie le aiga, o le mafuaaga fo’i lea ua tele ina toe o ese ai nisi o le au faigaluega, ua le lavava onosa’i ma fa’atali.

Ua le masino fo’i le mau aitalafu, ae leai se uiga aua afai e maua mai se tupe o le galuega e toe alu uma i le totogiina. Ua tafiu fo’i e fautua i le tama e tia’i ia galuega, ua fai si tigaina tele ae le talafeagai le totogi, ae le mafai fo’i, ona e faigata ia te ia le alofa ma le va fealoa’i o le olaga fa’asamoa. Ua seasea fo’i toe avea se faamomoli po’o se tupe i o ma aiga i Samoa, ta te faatu a’e vili mai lo’u uso o lo’o tausia matou matua i se tupe, aua o le taimi e tau faiatu ai se faamalie, oi o upu leaga uma e lalafo mai, toe lalau mai le le alolofa ma fai mai ua sili ai le toe fo’i atu i Samoa.

O lou uso matua sa i Hawaii, ua toe foi mai i Amerika Samoa ma fai ai lona toalua. O si ou uso lona lua lea ua leva ona iinei ua fai foi lona tolaua ma si ana fanau e toatolu, ae ua maliu la si tamaloa. O i laua ia e tele ina ou toomaga i ai mo fesoasoani i nisi taimi, faapea foi nisi o ou aiga. Sa le logo malie ia te a’u lea tulaga, ona sa ou lagona ina e le o se mea lelei, le ave o lau avega ma faae’ee i luga o tauau o isi tagata, ta te le o iloa foi o latou lagona, po o fiafia po ua saisaitia.

I se tasi o taeao na ou foi mai i le momoliina o si au fanau i le aoga, ua matua’i leai lava se matou tupe, toe osi pepa araisa itiiti o loo totoe, o se suka ma se mea faiti ua leai, a o se pilikaki foi ua leai lava. Na fasolo lou mafaufau po o ai se tagata o le a faatutu i ai se aitalafuga tupe, ao lou loto ua matua’i le ioe mai i lea fuafuaga ma ua foliga mai o se taua tele a lou mafaufau ma lou loto lea ua tau, ua le maua ai ma so’u filemu.

Ua ou manatua le Atua, ona ou toatuli ifo lea i ou tulivae i luga o si nofoa apa elea sa ou nofo ai, e lei mafai ona ou tautala i se upu e tasi, na o le maligi faavai o o’u loimata, ae ou te iloa, e malamalama le Atua i le gagana a loimata. Na ou tatalo i le Atua i se tatalo faigofie e lei fealofai foi upu sa ou faapea atu ai, “Le Atua e, alofa mai, ua ou manaomia lau fesoasoani, faafeiloai manaoga o lou aiga faamolemole ma ia e aumaia le filemu i lou loto, Amene.”

E amene ane la’u lotu, ae tatagi ma lau telefoni o si ou uso matua o lo’o faigaluega i le oloa sii atoa a Koluse i Leone. E le tele ni tala, ae na manino lelei i lau faalogo lona faapea mai, matou te tietie atu ma tamaiti pe a manava mai le matou aiga, e aumai le matou faatau o le vaiaso.

Ua ou manatua o lona aso totogi tonu lea, ua leai se mea e gata mai ai lou fiafia, ua le masino upu ua avatu ai lou agaga faafetai i le Atua ona o lona faamaoni. Masalo ana i ai nisi latou te maitaua a’u ma a’u mea o lo’o fai, latou te faapea mai o a’u ua leaga lou ulu ona o lou tautalatala toatasi na o a’u. na vave manava le au kamuta i lea aso ina ou vili i lou toalua, ma matou tietie ai loa ma si a ma fanau ina ua tuua le aoga e vaai lou uso.

Ua oso fiafia mai si ou tei ma opo fiafia atu tamaiti, ma nanati mai loa, e faatope le faiga o le matou faatau faatau ua lata foi le taimi e tapuni ai le faleoloa o lea manava.

Ou te talitonu o lo’o mateia e lou uso, ua tau faaletonu lou mafaufau, po o le a le tele o le faatau e tatau ona fai, o le mea lea na ia toe oso mai ai, toso mai le isi taavale, fai loa ma le lauga, o meaai tuu aisa, o meaai tuu apa, o fasimoli, pauta tamea ma le anoanoa’i o mea e tatau ona manaomia e le aiga, o lau vaai o le faatauga o le masina atoa.

Ua uma ona ta e le teine faatauoloa le matou faatau, ua out ago atu i isi taga pepa e fa ua aofa’i faatasi ma ou savali agai i le taavale, ua ou musu ou te vaai pe fia le aofaiga atoa o le faatau, ua ou alofa isi ou uso masalo o le afa o lana siaki lea ua mama uma i le faatau.

Ua faaola le matou taavale, a ua toe savali atu e faafetaia’i lona savali mai, se’i ou toe momoli atu ai se faafetai tele ona o lona alofa ma lona agalelei. O le mea e malie ai, ua galo ia te a’u ona ou fai i lou uso, i le poloa’i a lo’u toalua, i se luasefulu tala se’i utu ai le kesi o le taavale.

Ua faigata fo’i ona ou toe fai isi teine, ona ua fai si tele o le matou faatau, ae na ou te’i i le faapea mai o si ou uso, “Omai loa e o, e fai foi si mamao, ae avatu le fasefulu tala lea e utu ai le kesi o le tou taavale.” Na o le fafa o le isi faafetai, ma matou agai mai loa i Fagatogo.

Na fai si umi ou te le tautala i lou toalua, na o lou gugu lava ma faasaga i fafo, ua faasolo lou mafaufau ua toe faamantu mai ia te a’u le aso na matou masesei ai ma si ou uso ma lona toalua. Sa matou tuu tala, afai ae ou toe fanau o se teine ua avatu ma laua, afai o se tama e tausi lava e ma’ua, aua e leai se la fanau. E leai ma se iloa e lo matou aiga o nei fuafuaga uma, ae o le po na ma o ai ma lou uso i le falema’i ina ua tiga lo’u manava, na ou ola ai, o le teine i le ta tonu o le lima i le vaveao.

O le fiafia tele osi ou uso na ia vili mai ai i lona toalua e alu atu e piki ia, la te o e fai le faatau a le la pepe, aua o le teine. E pei o le uila faiga a le toalua lea, e le’i leva ona o ae foi atu ma le faatauga tele a le pepe na ona tuu lava o le faatauga i luga o lou moega, ae toe topetope agai i le ofisa e totogi ai pili ma totogi uma lou pili ae le’i taina le valu. E foi mai le vaega lea, ua taunuu atu foi ma le matou aiga ma le vaisalo, ai o le mea lea na tuai mai ai si tamaloa o le faiga o lana vaisalo.

Na ona se’i ane lava e lou uso o le risiti i lana taga ma faapea mai, “Vaai le risiti lea o lou pili ua uma ona totogi, a uma loa lau ti ia ona lua o atu lea o oulua, ae matou o atu ma pepe, se e malosi ona faagaioi lea o pepa e liliu mai ai pepe ia maua.”

Oka! Ua ou te’i i le faasaga mai o lou toalua ma ee mai mai ia te a’u, “Oi ogi lua kogu ia ma lou uso, ia e leai se mea valea faapea o le magaku o oe, o le pusa vae moa le mea lea, a’e loko lava e foai, foai.” Na ona se’i lava e lou toalua o le risiti o le pili mai lou lima, masau mai fafo, pe a ma le sefulu minute, ae toe tofu atu i totonu, tu’u le tupe i lou uso, toe tu’u i ai ma le faatauga na fai e si teine ma faiatu “Malie, koe o ma ave mea ga, ma le lua kupe lega ua koe faafoi aku, o la ua uma oga ou koe kokogia le pili o le kamaikai lea, faamalie foi oulua, e le pule koakasi faapea le ma fagau, po o le a lava lou makiva ou ke kausia lava i oloa kaua ga aumai e le Akua ma ke kausia.”

Na ou tagi ona o lou alofa i si ou uso ma lona naunau mai, ae sa ou faasa’oa le le fiafia o lo’u toalua, ona sa tatau ona ou fesiligia sona manatu aua o ia o le ulu o le aiga, o ia foi o se tagata e ese le auaua i le faiga o le ma fanau.

Talu mai le aso lea matou te le’i toe fetautalatala’i, ae ina ua ou faalogo, lo’o ma’i tigaina si ona toalua i le falema’i i se tasi aso, na matou o uma ai ma tamaiti e asi, ma toe faalelei ai si a matou laufa’i, o le lima o masina o le ma pepe lea, o le lima foi lea o masina talu ona matou masesei. Na motusia faafuase’i fesootaiga o mafaufauga ina ua afe le matou taavale i se tasi o pamu kesi i Nuuuli ma utu ai le kesi, ona toe faaauau ai lea o le faigamalaga. 

Ua mavae atu ia tausaga, ua i ai foi nisi suiga fou ua agai mai, ua ese fo’i lo’u toaga e fesoasoani i meaaoga a si au fanau, e le gata i lea, ua ma tutu malosi ma lo’u toalua e lagolago so o se mea e fai o aoga a tamaiti aemaise o mea e tauva ai ma isi aoga eseese i totonu o le teritori. O se fiafiaga sili i lo’u loto, ua ou vaaia le malosi o le tama o le aiga i le lotu, ua fai foi o ma tofiga, e pei o le tofi tiakono ma le faiaoga Aso Sa, ma ua faamalosia ai lava lo ma aiga i le Ali’i.

E le misi a matou faigalotu i le afiafi, faapea foi taeao i le vaita o le lima i le ono i le vaveao, aua e fafagu po lava le fanau, o le ma naunautaiga ia muamua le Atua i o latou olaga e manuia ai a latou taumafaiga. O le tele o taimi, ma te a’oa’o le ma fanau i le upu a le Atua, ma te faamalosi au i o latou loto, ina ia malilie i mea ua matou maua, o a ea ua foai mai e le Atua matou te aai ai ia maua e i latou le loto faafetai, ia fai foi ma lu’itau i o latou olaga, ia toaaga e fai meaaoga ma finau i le aoga.

O nisi suiga ua tuali mai, ua matou le toe aitalafu, o se mea manaia tele lea, aua ua ou iloa o se olaga pologa ma le inosia e tagata. Ua agai aoga a le vaega matutua i aoga maualuluga a’o le isi toalua o lo’o i le aoga tulaga muamua, o le tele o mea e tatau, ona maua e tamaiti e fai ai a latou aoga i ona po nei e le o mafai ona maua e si a ma fanau, o le ala lena e toaaga ai i le faletusi i Utulei e faaaoga komipiuta o lo’o i ai.

O mea uma foi e tatia’i e isi tamaiti i le lapisi ua le aoga, e pieo peni ua gaui o titian ua afaafa o api o lo’o i ai lava nai avanoa, e taalao uma mai e le fanau ma toe faaaoga.

E tagi lou fatu i le tele o taimi e aiai fua ai se saka po o se araise ma le vai aisa a nai tamaiti, ona ua fai foi si tele o mea fai tupe o aoga a nisi o le fanau o lea faau’u i le vasega sefululua ma le vasega valu, aua ua faapolopolo uma iai ni seleni mai galuega a le tama, ona e le ose galuega e totogu lua vaiaso pe vaiaso foi, e le gata i lea o le totogiina o le pili o le vai ma le uila, e tele ina aoina le ola o le matou moli i le faiga o meaaoga. 

E ui i lea tulaga faigata, ae ou te faafetai i le Atua, ou te vaaia pea le fiafia o le fanau, e leai seisi e tagisa mai i le fia ai mealelei pei o se falai moa ma nisi lava mea faapena, ua masani lava isi olaga mativa. 

Ua amata ona fa’aamuia mai tagata o le nuu, o e matou te masani, ona o le tulaga maoa’e ua agai i ai le taumafai o le fanau, ae sa le’i avea ma mea e oo ai se lagona fefete ma le faamaualuga i lou loto, na maualuga ia te a’u le viiga o le Atua, aua o ia e toatasi na mafua ai ona o’o le fanau i lea tulaga.

Ou te faafetai foi i loto o le fanau, e ese foil au vaai, e le o ni tamaiti e soona gaoia pe fia faalialia vale ma mimita, o lea foi le agaga ia i ma’ua e taulogologo pea ia i latou, ina ia aua nei galo le Atua, ia iloa ona faafetai ma fafoi lona viiaga aua ana le seanoa le Alii latou te le maua ia faamanuiaga. 

I le tausaga ua mavae atu 2014 i le masina o Tesema, ma faauuina ai le tamaitai matua o le ma fanau mai le Iunivesite o Chamanade Hawaii, ma ua faigaluega ne ii le ofisa o Faiga Faiva (Marine Wildlife) i Fagatogo.

O lana tala i lona tama, ae le i alu i fafo i lana aoga, afai ae manuia lona taumafaiga ma maua sana galuega, e le toe mana’o e toe faigaluega lona tama, ua alofa mai i le pologa ma le tigaina. O le tamaita’i lona lua o lo’o aoga nei i le Iunivesite o Hilo, masalo o lo’o fuafua e faau’u i le tausaga fou pe a tusa ma le finagalo o le Atua ma maua ai lona faailoga. O le alii lea o lo’o lona tolu o le fanau, ua na o ia foi le taulealea, ua mae’a ona faau’u mai le Kolisi i Mapusaga ia Tesema 2014 faatoa foi mai i le faaiuga o Aperila i le tausaga nei i lana toleniga (basic training) sa faia i fafo, ua uma foi ona faau’u. O lo’o sauna e faaauau lana aoga mo le su’eina o se isi faailoga i le Iunivesite o Manoa, ao i ai i le Ami Faaleoleo.

O le tama’ita’i lona fa o le ma fanau sa faauu i le aoga maualuga a Samoana i le 2014, o lo’o aoga nei o ia i se tasi Iunivesite i Hawaii (H.P.U) faatasi ai ma le pepe a le matou aiga, o lo’o aoga nei i le aoga tulaga muamua a Kolumane i Pagopago i le vasega ono. Ua ou nofo ma ou vaavaai i le alofa faamaoni o le Atua i lo ma aiga, aua e leai ni a ma tupe se tele e totogi ai aoga i fafo ona e fai si taugata, ao faamanuiaga a le Atua e ala i ni sikolasipi ua maua e le fanau, ua mafai ai ona faaauauina lo latou taumafai.

Ou te le iloa pe faapefea ona ou taui le alofa ma le agalelei o le Atua ia i maua ma le fanau. I le taimi nei, ua ma galulue nei ma lo’u uso i totonu o le falepuipui a Ali’i, Tama’ita’i, ma Fanau Talavou i le momoliina o le afioga a le Atua, e fai ma fesoasoani ia i latou ina ia liliu ese mai le leaga, ma ia feliuaina i se isi olaga fou, faaaoga mo le Atua ma lona finagalo.

E moni lava, e taua le onosa’i ma faatali i le taimi a le Atua. E ui lava ina tele taimi sa tauau ina vaivai ai le loto ae ou te faafetai i le Atua ua mafai ona a’oa’oina ai le olaga i mea uma lava.

© Samoa Observer 2016

Developed by Samoa Observer in Apia