O LA’U TALA FO’I

139 Hits

1. Matauina i Tala Fou le Malelega a le Ao Mamalu o le Malo o Samoa e faasino i Tiute Tauave Paia o le Palemene-ma o loo matauina ai le Tulafono Sili a Samoa o lona Faavae lea-faatasi ai ma tapu o loo aiaia ai e pei o le faaaoga sese o le paoa ma faiga pi’opi’o o soo se ituaiga-faatasi ai ma le tapu o sauaga ma le mana’oga ina ia mautali atu ma le faimea tonu! Ia –afai la e moni e pa’ia faiva ma tiute o le Palemene-o le fesili-“Aisea ua le mafai ai ona faatino e le faigamalo o loo i ai nei?

Ia-atonu e sa’o lele le malelega pe a fua i le Faavae lava ia-ae a fua i le faatinoina-ia o le a lafo atu lava i lau faamasinoga tonu Samoa-aua a fua i le tulaga ua i ai nei le atunuu-o le mativa, gaoi, talepe fale, toso teine ma faiga faa-Sotoma ma le fasioti tagata -faamata  o ni fua ia o ni matafaioi  ma tiute e pa’ia?

O lea ua uma lenei 5 tausaga-ma ua tatou alo atu i le isi faiga-palota ia Mati o le tausaga nei! O lona uiga- o le a toe fo’i le atunuu e filifili mai se faiga-malo na te faafoeina lona atunuu! Afai la e filifili mai ae le pa’ia lava ia i latou le faatinoina o latou tiute mo le atunuu-o le fesili-o le a le pogai? A toe faaupu le fesili-e aoga lenei mea o faigamalo faa-Vaega ia Samoa?

A tatou toe fo’i la i tua, afai na silafia e o tatou tua’a e aoga poo e manuia ai Samoa i nei mea o pulega-malo faa-Vaega-aisea na latou le faia ai? Ia-ua silasila la i le tulaga ua i ai nei le atunuu-ua matua matitiva lava ma ua o’o lava i fanau pele-ua tutuli i luga o ala tetele i le ao ma le po e faatau atu  oloa-ona o le fia maua o se tupe e tausi ai o latou aiga! O le fesili la-o le a se fesoasoani a le Malo i nei tagata o le atunuu? O le tali-e leai se mea! O le mativa la o loo feagai nei ma le atunuu-e afua mai le Malo. Silasila i le Tau o le Soifuaga. O ai na faia le VAGST? Ana o se faigamalo e alolofa moni i le atunuu-semanu ua aveese lena lafoga.

Ae o le mea o loo i ai nei- a e faigaluega-e tipi lau lafoga mai lou totogi-toe alu atu i le faleoloa-o lena foi ua saofa’i mai ai ma le isi lafoga o le VAGST.Silasila i pili o moli eletise! O le a le tulaga ua o’o i ai? A alu atu le tagata e totogi le pili o lona moli- na te totogi foi le tau o le suau’u ma le aitalafu a le Malo-toe totogi ma le pili o lona moli! O se mea sa’o lea ma le amiotonu le totogi e le atunuu o aitalafu a le Malo toe totogi ma pili o latou moli eletise ma le tau o le suau’u lea e aumai e vili ai le eletise?

Ae o le itu e sili ona tiga ma matuitui-o le faatautala ma le fai o a latou faiga pi’opi’o i le faitau miliona ma miliona o tupe a le atunuu-ae musu e molia i le  Faamasinoga le Minisita o Tupe na aafia ai ma nisi o tagata faigaluega! O le a la le uiga o ia faiga? O lona uiga e pule le Palemia i le malo toe pule i le faatinoina o galuega a le Faamasinoga? O le manatu ‘ea o lenei faigamalo e valelea tagata o Samoa? Afai la o le faigamalo foi lenei na te toe faafoeina le atunuu mo le isi 5 tausaga o i luma-o lona uiga-tatou te totofu uma i Seoli! Aisea? E pologa ma matitiva le atunuu –ae o lale foi e faamalumalu mai le aitalafu i fafo ua silia le Piliona! O ai la e totogiina? O le a sou taofi? 

2. Matauina foi i Tala Fou le manaia o ata o Sui Usufono o le Palemene i le sauniga na faataape ai le Palemene mo lenei nofoaiga. O isi o Minisita ma Minisita Lagolago o le Kapeneta ae mafuli lava i Sui Usufono o le Palemene. Ua faaalia foi o latou lau-fofoga fiafia ina ua ‘ausia le faaiuga o lenei paeaiga i le manuia. O le mea moni-o le a le mafai ona faagaloina i o latou finagalo le 5 tausaga ua mavae! O nisi atonu o le a toe fo’i mai pe a manuia le Palota-ae o nisi-ia masalo o lo latou taimi mulimuli lava lea!

O le mea lea- e momoli atu ai le faafetai tele ona o lo outou sao i le manuia o le atunuu! Ia atonu ua taunuu nisi mea sa finagalo i ai i lenei 5 tausaga-ae o le tele lava-e le o mafai ona faatino i lenei vaitau! Ae ui o lea-ua silafia lava e le atunuu lo outou tautiga ma le finau mo mea lelei aua se manuia o Samoa! Ia manuia lava le alo atu i le Faiga-Palota o loo loma nei-ae o se faamanatu-o filifiliga uma lava- e mai le Atua! O le a sou taofi? 

3. Ia, ua tele lava finagalo faaalia e uiga i le faama’i lenei o le Zika-ma e aliali mai-o se siama lea e ono lamatia ai Samoa. Ae pei lava ona tatou iloa mai le Faatonu Sili Aoao o le Soifua Maloloina-e leai se mea e popole ai i lea faama’i! E mafua lea mau a le Matagaluega o le Soifua Maloloina-ona fai mai o le tausaga talu ai-e na o le tolu gasegase na togafitia i Samoa nei! Ia afai la na o’o mai i Samoa nei lea faama’i i le tausaga talu ai-o lona uiga- e mafai foi ona toe o’o mai.

Afai la ua fai mai le Matagaluega e ‘aua le popole- o le fesili-afai la ae faafuase’i ona taunuu mai-e mafai la ona togafitia? Talosia la ua fau ni tapenaga e tatau ai mo lea faafitauli-ae a fai mai e leai se mea e popole ai- ae faafuase’i ona taunuu mai ma pagatia ai le atunuu- e lava la na upu e togafiti ai ? O lona lua-o a ni tapenaga o fai e tali atu ai? Ia manatua foi e le togafitia ni ma’i i ni upu-a’o vailaau faatasi ai ma foma’i.  O le a sou taofi?

© Samoa Observer 2016

Developed by Samoa Observer in Apia