O aoga ea le Tauvaga mo se Tausala Samoa?

163 Hits

E le o toe mamao fo’i ae alo le Komiti e sa’ilia se Tausala o Samoa mo le 2016.  Ui lava fo’i ua foliga o se tauvaga ua tauau ina le-aloa’ia ai tulaga fa’aleAganu’u a ua tau-mafuli i le sa’ilia o le tama’ita’i aupito ‘aulelei ma lalelei, ua tula’i mai ai se fesili, pe o aoga pea ma talafeagai ona fa’aauau lea tauvaga. I Talanoaga i le Ala o lenei aso, na fesiligia ai e Mathias Huckert o le Samoa Observer le mamalu o le atunu’u feafio’ai, ma o nisi nei o finagalo sa fa’aalia:  

Samunda Safuie, Tafitoala: 

E le tele so’u iloa o tulafono o lea tauvaga ae mo Samoa lava ia, ‘ou te iloa o se ‘auala lelei e avea ai ma sui o le atunu’u i nisi itu.

John Aana, Samatau: 

‘Ou te manatu o tauvaga fa’apea e tāua tele mo le atunu’u. O le mea aupito taua, ona o tauvaga nei o lo’o maua ai avanoa o latou mai fafo e a’oa’o ai le aganu’u ma mea uma e uiga i lo tatou atunu’u talu ai, o le to’atele lava e le malamalamala lelei ia Samoa, i ana tu ma aganu’u masani.

Young Sani, Alafua: 

Sa’o lelei, e iai le aoga ae ia fa’atele atu nisi va’aiga nai lo le Teuila. E moni o lo’o aoga fo’i e fa’ailoa atu ai le tatou aganu’u, a o le taunu’uga lava lea, e tele lava i itu tau fa’afiafiaga, ae le matua mamafa i le una’ia o le fa’aSamoa. 

Ouandolity Fa’afetaie, Mulifanua: 

Ua silafia fo’i, o tauvaga nei, e fa’aalia ai taleni ‘ese’ese a tagata ma ‘ou te iloa, e le na o le ‘aulelei e fai iai. E aoga fo’i e fa’alauiloa atu ai le tatou aganu’u i so’o se ‘auala, aua o vaega na e feagai ma latou o le a tauva. E le matua iloa Samoa nei e le lalolagi ma isi atunu’u i fafo. O la’u la fa’amatalaga, e mautinoa lava, e iai le aoga ma e talafeagai ai lava ona fa’aauau pea.

Caroline Leala Ah, Vaiola Faleata: 

O se mea e fiafia tele iai tupulaga teine talavou. E manana’o ia tutupu a’e ma fa’aali atu lo latou ‘aulelei i le lalolagi e ala i tauvaga nei. ‘Ou te iloa, o le tulaga lava lena ua masani ai ma ‘ou te le-iloa se mafuaga e tatau ai ona suia i le lumana’i. E manaia, e lelei tele aua e le fa’apito le ‘aulelei i se va’aiga mai fafo. O le lalelei fo’i o tama’ita’i tauva e mai totonu, mo se fa’ata’ita’iga, o o latou uiga ma mafaufauga. Ae maise, o lo’o ‘autu lava i le aganu’u fa’aSamoa, e a’afia ai o tatou tagata, lo tatou fa’asinomaga ma mea uma, ae le na o se ‘aulelei o se tagata.  

Karl Uilelea, Lauli’i:

E leai so’u malamalama tele i tauvaga nei ma e le’i alu fo’i iai so’u mafaufau i tauvaga ua mavae. Pau se tala e fai atu, ona o le taua o le tauvaga. E fa’ailoa atu ai le tausala aupito ‘aulelei i le atunu’u ma avatu ai fo’i le fe’au i isi atunu’u o le lalolagi, i tulaga o le tatou aganu’u. Aua o mamafa i le va’ai a tagata le Tausala Samoa, o le a fiafia mai fo’i i lo tatou atunu’u nei. O le itu lelei lena e ao ona lagolagoina e Samoa. 

© Samoa Observer 2016

Developed by Samoa Observer in Apia