Manatu o le Fa'atonu - Donal Trump ma faiga-fa’apologa i le Iunaite Setete o Amerika

Tusia Gatoaitele Savea Sano Malifa ma Faaliliu e Maiava ,

144 Hits

Se’i tatou talanoa ia Donald Trump i lenei aso.

O le sui-fa’atu lea a le vaega a le Republican mo le sa’ilia o se Peresetene o le Iunaite Setete o Amerika, i le palota e le o toe mamao atu. A ua va’aia nei lana susuga lea, o se tasi e matua le-talafeagai mo le Fale Pa’epa’e. 

Ae atonu e finau nisi, o le tamaloa e atamai tele pei o se pulu-taufe’ai ma e le- tatau ai lava ona ‘ave’ese lona suafa mai le taufetuliga a’o le’i amatā. 

E le gata i lena, o le tamaloa o se pilionea, e anoanoa’i ana faletalimalo ma casino i le talafatai i sasa’e o Amerika fa’apea ma Peretania, e mafua ai ona a’e se manatu, e matua fa’amaliegata tele lana susuga. 

O le ta’uta’u so’o fo’i i tala o le lalolagi, o ana saunoaga fa’ailogalanu le-afeifeia ma saunoaga fa’aulaula, ua avea ai ma fa’atiga taliga, pe a   tu’usa’o se gagana. 

O le mea moni, i totonu o Amerika – le atunu’u na titina-mate ai e Peresetene Apera’amo Linikone faiga fa’apologa i tausaga e tele ua mavae, a’o lea ua toe lalaga mai e lea ali’i fai’ai-mosimosi ma le talafegai mo le tofi, e pei ona alalaga ai le to’atele.

Silasila fo’i i le tala mai le nusipepa o le New York Times mo se fa’ata’ita’iga.  

I le lomiga o le Aso 27 o Aokuso 2016, o lo’o tusia ai e Jonathan Mahler ma Steve Ederaug e fa’apea: “Leai se Avanoa mo Tagata-Uli: Faiga  Amataga a Donald Trump.” 

O Ianuari 1973, i lalo ifo o le ulutala, o iai se ata o Donald ma lona tua’a, o Fred C. Trump; o lo’o asiasi atu i tasi e mautotogi i le tasi o a latou fale mautotogi i Brooklyn. O le igoa o le mau-totogi lea, o Maxine Brown, o se tama’ita’i-uli.

Sa fa’atalanoaina Maxine e se tasi o le ‘aufaigaluega ma e manaia le fautuaga sa faia e le tagata faigaluega lea.  

Fai mai: “E foliga mai o se mau-totogi lelei. O se tausima’i e 33 tausaga, o lo’o nofo i le YWCA i Harlem. 

“Na sau e mau-totogi i se potu e iai se moega, i le Fale Mautotogi i Wilshire, lea lava e le’i mae’a ona fausia, i Esetete o Jamaica e tua’oi ma Queens. 

“Sa fa’atumu lana pepa talosaga, lea e manatua lelei e le tagata faigaluega , o se “talosaga manaia”. E le’i matua naunau fo’i e silasila i le potu lea.” 

E tasi lava lona pona: Ona o Maxine Brown e uliuli.

Na talanoa le tagata faigaluega lea i lona pule, o Fred C. Trump.

Fai mai a ia: “Na ‘ou fesili iai i le mea e fai, ae fai mai, “Ave le talosaga e tu’u i totonu o le kapoti ma tu’u ai i’ina.” 

 O le tagata faigaluega lea, o le ali’i o Leibowitz ua 88 nei tausaga o lona soifua ae ma te manatua pea lea mea.

O le fa’ai’uga o le 1963, a’o sauni le ali’i louloua fai-‘ava o Fred Trump, e aoao mae’a ana oloa i le taimi o tele ana mea, fale-tetele fogafale 23 e fitu na fa’aigoa o le Nu’u o Trump, e latalata i le 40 eka le fanua e iai i Coney Island. 

Le taimi lea sa tapena lelei ai ma a’oa’o lona suli, lona atali’i o Donald ae fa’atoa 17 tausaga, e fa’aauauina le pisinisi. E le’i ‘umi na’ua ae ulufale Donald i le Iunivesete o Fordham i le Bronz a’o nofo i le fale o ona matua i Queens ma fa’aalu ai le tele o ona taimi avanoa e asiasi ai i nofoaga sa fausia ai fale tetele, e fealua’i i le Cadillac a lona tama, e ‘aveta’avale ai se tamaloa meauli. 

I le isi sefulu tausaga mulimuli ane, na fa’atinoina to’atasi ai e Donald J. Trump le va’aiga o le pisinisi, ae mais le aga-masani a le kamupani o le tutuli’esea o tagata-uli mautotogi, sa fa’atigaulu tele i nisi sa naunau mo avanoa tutusa i fale nei, i le taimi o mamafa finauga ona o le fa’ailoga lanu. 

Sa fa’atino e le Matagaluega o Fa’amasinoga sana lava su’esu’ega ma o le tausaga e 1973, na ‘ave ai i le tulafono (su) le Pulega a Trump ona o le “fa’ailoga-lanu i tagata-uli. O Fred Trump – le ta’ita’ifono o le kamupani ma Donald Trump na avea ma peresetene, na molia fa’atasi ai.

Na fesiligia sona finagalo i tu’ua’iga a le malo, ae tali Donal, e “matua mata’utia lava le leaga.” 

Ma ta’ua ai fo’i e le New York Times, “O le tali a Trump i moliaga ia, e foliga o ni lu’itau tau pisinisi ma tulaga tau-polokiki o lo’o foufou atu. 

 “E aunoa ma le  taumafai e fofo malie le mata’upu, sa ia avea le tagi lea e foliga o se taua, sa matua tete’e malosi ai ma tu’ua’ia le malo i le taumafai e fa’amalosi o ia e fa’amatu’u atu nofoaga ia “manuia ai tagata nei” ma fa’amalosi o ia e fa’aulu se  talosaga e fa’atau-matatao atu ai ma tu’ua’ina le Matagaluega o Fa’amasinoga, ona o le tau-fa’aleaga.    

Ioe, o le 1973 lena. 

Peita’i, i tua atu lava i le 1855, na avea ai faiga-fa’apologa o se fa’alavelave matuia, e o’o lava i le malo na matua fa’alumalumaina ai ona o lona fo’i sao iai.

O le vaitau lea na tusi ai le Peresetene o Apera’amo Linikone i lana uo mamae o Joshua Speed, sa iai sana pologa i Kentucky ma fa’amanatu iai: 

“Ua e iloa lelei ‘ou te fiafia i faiga-pologa, lea sa e ta’utino mai, o se mea sese tele ma le-sa’o.

“’Ou te ioeina fo’i au aia-tatau, ae maise fo’i a’u folafolaga sa faia i lalo o le fa’avae, e tusa o au pologa.

Na fa’aauau pea le tusi a le Pesetene: “’Ou te manatu lelei le tausaga e 1841, sa alu ai la ta malaga i se vai, i se Va’a Karasini mai Lousville aga’i i St. Louis. 

“Atonu o e manatua fo’i le va o Louisville ma Ohio, sa iai i luga o le va’a, le sefulu po’o le sefulu ma le lua o pologa, na fafao fa’atasi ma u’amea i se potu e tasi. 

“E o’o mai i le aso, o lo’o tu mai pea i o’u luma va’aiga na; ma e fesuia’i lava mea ‘ou te va’aia i taimi uma e o’o ai i Ohio po’o se tua’oi fo’i e tele ai pologa. 

“E faigata lava ma le-fetaui lou fa’ataga-leiloa, lo’u le-fiafia i se mea e so’ona fa’aalia ai le malosi ma le paoa e fai ai se mea-sese ma le-sa’o. 

 “Ua tatau ai lava ona e aloa’ia ma fa’afetaia, le galuega aoga a tagata mai Matu o lo’o fa’asatauroina ai latou lagona, ina ia tausia pea lo latou fa’aaloalogia o le Fa’avae ma le Iuni. 

“E fa’afefea lava i se tagata na te matua te’ena faiga fa’apologa o tagata-uli, ae fiafia tele e fa’aleaga isi tagata papa’e?  E foliga mai ia te a’u, ua fai lava si teletelea’i tele o le tatou aga’i atu i le lumana’i. O le avea ai o tatou o se atunu’u e tasi, sa tatou amata lava i le fa’alauiloa atu fa’apea “e tutusa tagata uma na faia.”   

“Le taimi nei, ua tatou va’aia ai le tulaga lena, ae vagana ai lava tagata-uli, nikolo.” A pule loa le tagata e le-iloa se mea, o au ina fa’apea: “e tutusa tagata uma na faia, vagana lava nikolo, ma tagata mai fafo, fa’apea ma tagata Katoliko.” 

 “A o’o loa i le tulaga lena, ona ‘ou fa’ananau ai lava lea, e fia alu-‘ese atu i se isi atunu’u e le-maua ai se fa’afoliga o le alofa sa’oloto – o se fa’ata’ita’iga, a fa’apea o  Rusia, e le mamafi ai i le fa’aaliga o le malosi, ma le-maua ai se ola fa’afoliga.” 

I le 1854, na tusia ai e Apera’amo Linikone se tusi fa’apea: “Afai e sunu’i uma mai ia a’u le paoa ma le malosi uma, o le mea muamua ‘ou te faia, o le fa’asa’olotoina uma lea o pologa, ma fa’afo’i uma atu i Liberia, lo latou ‘ele’ele moni.” 

Ae o le Aso 22 o Setema i le 1862, ae taunu’u lana miti lena. 

O le aso lea, na fa’asilasila fa’alaua’itele ai e Apera’amo Linikone, le soloia ma le fa’amutaina o faiga-fa’apologa i totonu o Amerika. 

E le gata i lena, ae na fa’alauiloaina ai fo’i e Apera’amo Linikone “lana Ta’utinoga Aloa’ia i le Aso 1 o Ianuari 1863, e soloia uma ai ma tafi’esea faiga-fa’apologa mai setete uma, a ia sa’oloto e o’o i le fa’avavau.” 

O le a la sou finagalo? Afai e malo Donald Trump i le palota, mata o le a avea ai o se tagata alofa, e le fa’ailoga-lanu a’o se Peresetene alofagia o le Iunaite Setete o Amerka?

Mo tatou nei i si o tatou tama’i tulimanu o le lalolagi, ua leva ona mae’a faiga-palota. Tu’u ia la Donald Trump, ae tatalo ia tumau le filemu ua tatou ‘ae’ae ai nei.   

Ioe, tatou fa’afetai  i Lagi, ona ua le pei tatou o isi o le lalolagi nei, lea e matua nofo-popole ma mamata’u le to’atele o tagata ona o le tetele o le fasioti-tagata i aso uma, ae  o lo’o tumau pea lea fifilemu ma le soifua sa’oloto o si o tatou atunu’u nei. 

Tatala mai le ‘ato-ponapona Samoa. 

© Samoa Observer 2016

Developed by Samoa Observer in Apia