O le ala i le pule o le tautua

Tusia Vatapuia Maiava ma Sarafina Sanerivi ,

149 Hits

Kelemete Aukusitino mai le afioaga o Fasito’o-Uta.

Kelemete Aukusitino mai le afioaga o Fasito’o-Uta.

“O le ala i le pule o le tautua.”

O le alagaupu lea o lo’o fai ma fa’amalosi ‘au i le taule’ale’a ia Kelemete Aukusitino, e 32 tausaga mai le afioaga o Fasito’o-Uta. 

Na fa’ailoa mai e Kelemete i le Fofoga o Samoa, o ia o lo’o feagai nei ma le faiva o le tautua i totonu o lona aiga. “O a’u lea ua tu’u mai iai le vaaiga o le aiga.

“O a’u lea e tautuaina si o matou aiga ma faia feau. O lo’o to’atele i latou o lo’o faigaluega, ae pe o a’u lea e nafa ma le faiga o le ma’umaga ma tausi le aiga.

“O aso uma lava, o le feau masani lava e fai o le aga’i lea i uta i le ma’umaga e fai ai se galuega, ona fo’i mai lea i le fale e fai le meaai.

“Ae pei o le vaitau lenei o aso fiafia, pau lava le mea o lo’o alu iai le fa’amuamua, o le tapenaina lea o fanua ma fai fea’u ii le fale ae fai sina malologa mai le ma’umaga se’i uma foi aso fiafia toe amata foi lea o galuega i le ma’umaga.”

Na ia ta’ua, e le fa’atauina fua o ana fa’ato’aga.

“O le ma’umaga e fai mo meaai a si o matou aiga. E le fa’atauina aua o lo’o to’atele le aufaigaluega i le matou aiga.

“E faigata le fai ma’umaga. E leai lava se mea e faigofie i lenei olaga. Ae ua ou masani ai lava a’u ia. 

“Ia te a’u lava ia, ou te talitonu lava i le fa’aupuga lea “O le ala i le pule o le tautua.”

“E faigata foi le mea lea o le tausi aiga. Ae fai lava ma le fa’amaoni ma le onosa’i auā o ii e ala mai ai manuia o aiga.

“Po’o le a lava le ituaiga galuega e fai, e tatau lava ona fa’amaoni ai i le fa’atinoina auā o iina e ala mai ai manuia, ma o galuega uma lava e mo le manuia o aiga.”

Na ta’ua e Kelemete, o loo sologa lelei lava le fa’amanatuina o aso fiafia i si o latou nu’u, ma ua maua foi lea avanoa e malolo ai ma maua ai se fa’asiliga malosi auā foi feau o le isi tausaga.

“Ua manaia lava nei aso malolo ua mafuta uma ai aiga ma malolo mai ai mai galuega masani ai.

“Manaia lava le fa’amanatuina o aso fiafia isi o matou nu’u, e leai lava se vevesi. E filemu lava mea uma ma o le mea sili lava o le maua o le fiafia. 

“O ta’aloga lava ma sina ta’ilua malulu lea e fa’ailoga ai aso fiafia iinei.”

© Samoa Observer 2016

Developed by Samoa Observer in Apia