Ua telē lava le suiga o Samoa

Tusia Vatapuia Maiava ma Sarafina Sanerivi ,

193 Hits

Fau Fetau mai le afioaga o Faleasi’u-Uta.

Fau Fetau mai le afioaga o Faleasi’u-Uta.

“Ua telē lava le suiga o Samoa i lenei vaitau.” 

O lea le finagalo o le tamā ia Fau Fetau mai le afioaga o Faleasi’u-Uta. 

Na ta’ua e Fau, o aso ua mavae, sa faigofie ma taugofie mea uma.

“O aso la, sa faigofie lava mea uma. E mo’i lava e le’i tele ni avanoa faigaluega, e le’i tele foi ni tupe na maua e tagata e pei o le vaitau lenei, ae sa taugofie lava oloa.

“Sa lava foi lava le fa’asoa a tagata i tupe na maua auā sa taugofie uma lava oloa.

“O aso la, sa maua lava le suka i le .50 sene, ae o le taimi nei, ua taugata lava le olaga ua iai.

“O le isi suiga tele ua iai nei, ua maualuga lava le tulaga tau a’oa’oga.

“Ua tele foi avanoa faigaluega ua iai nei. O le vaitau nei, ua maualuluga fa’ailoga o tagata ona o le maualuga o le tulaga i a’oa’oga ua iai, ae ua taugata foi le tau o oloa.”

Na ia ta’ua foi, o le isi fa’afitauli o lo’o iai nei, o le to’atele lea o tupulaga e leai ni galuega.

“E to’atele i latou e le’o iai ni a latou galuega ona e le’i i’u lelei a latou aoga.

“Ua tele lava nai aiga o lo’o oi ona o le taugata o le soifuaga ua iai ma le lava o le fa’asoa.

“O nai fanau foi e le’o lelei ni a latou aoga, o lo’o fa’afaigata ona maua ni a latou galuega. Na pau lava nai galuega e mafai ona galulue ai o le teufanua, tausi tama ma isi ituaiga galuega.”

Na ia ta’ua foi, o le isi tulaga e faigata ai le olaga i Samoa, o le tele lea o le mau fa’alavelave.

“Aemaise lava i taimi nei o aso fiafia ma le fa’aiuga o le tausaga. O le tele o fa’alavelave o lo’o feagai ai ma aiga o le isi tulaga lea e utiuti ai le fa’asoa. 

“E fa’i o saofa’i, fa’aipoipoga, o tu’ufatasiga a aiga (reunion) ia ma le anoanoa’i o isi lava mea.

“Ia e tagi lava i lima ma e tau saili lava e aiga ni auala e maua ai ni seleni e fa’atino ai ia fa’alavelave.

“E fa’alagolago foi nai aiga ia i latou o lo’o faigaluega e maua mai ai se fesoasoani e fai a’i fa’alavelave.”

Na fautuaina foi e Fau le to’atele o le tupulaga talavou ina ia fa’aaoga tatau lelei le malosi e saili ai ni galuega e tausi ai aiga.

© Samoa Observer 2016

Developed by Samoa Observer in Apia