Ua sau i le aiga le tama telē

30 December 2015, 12:00AM

Sarafina Sanerivi 

Faaliliu e Seagaitumua Tupuola

O le “Alii Samoa Lauiloa”, o Mark Hunt, o loo i totonu o le atunuu ma lona aiga mo Aso Malolo. O le taimi muamua lenei ua toe foi mai ai lea alii ua 41 tausaga le matua talu ona tuua le atunuu mo Niu Sila ina ua fa tausaga lona matua. I se talanoaga ma le Samoa Observer, fai mai Hunt na te le o manatua le tele o lona taimi i Samoa i lena taimi. Ae ui o lea, ua matua faafiafiaina lava o ia ona o lona taimi ma lona aiga iinei i Samoa. 

“O se taimi lelei ma ua malolo lelei ai, “ o lana faaaliga lea. Ina ua fesiligia pe aisea ua tonu ai ia te ia e toe fo’i mai a ua silia le fasefulu tausaga, fai mai Hunt e mana’o e i Samoa e vaai i le fusuaga a Lupesoli’ai Joseph Parker. 

 “Sa ‘ou manatu o le taimi lea o le fusuaga a Parker iinei i lea taimi, ae ua numi faasoloatoa ia te a’u aso,” o lana faaaliga lea.  “Sa ‘ou manatu o lana fusuaga o le aso 25 ma o lea sa ‘ou manatua ai pe aisea ou te le sau ai iinei e matamata i lana fusu ma fiafia ai i se malologa itiiti ma lo’u aiga.  

Na ‘ou matamata i isi fusuaga a Parker na fai i aso ua mavae i Niu Sila ae sa ‘ou faamoemoe ou te molimauina lana fusuaga iinei i le motu. Ae ua ‘ou fiafia e mafuta ma lo’u aiga iinei faapea foi ma lenei taimi o le tausaga.”

A’o i Samoa nei, na ia tuuina atu i tagata e fiafia ia te ia faamatalaga fou e uiga i lsns vaai ia Samoa talu ona taunuu mai ma e mafua lea itu ona “e fesoasoani i tagata e mulimuli ia te a’u ina ia matou o mai faatasi i la’u malaga.  “Ou te mana’o ia latou vaaia le mea e mafai e Samoa ona ofo atu, o a’u o se Kiwi ae ou te mitamita foi i o’u sootaga ma Samoa.” Ina ua fesiligia pe o le a se fe’au na te faailoa atu i tupulaga talavou o Samoa, fai mai a ia: “O soo se mea lava e mafai ona o Iesu i totonu o lou olaga.

 “Saili le meaalofa poo meaalofa a le Atua ua tuuina atu ia te oe ma faapupula atu lana moli i le lalolagi atoa. E tumau pea ona i ai le ala pe a i ai le Atua i lou olaga tusa lava pe leai se auala.” O lea alii e 41 tausaga lona matua ma lona aiga ua latou maua se taimi fiafia i Samoa ma o le a asiasi atu i le motu tele o Savaii a’o le’i toe felelei atu i lo latou aiga i le aso 9 o Ianuari. 

 

Faamatalaga e lautua i ai 

O Mark Richard Hunt o se tagata Niu Sila e taalo i le karate fefiloi ma sa avea muamua ma tagata karate (kick boxer) e i ai lona tupuaga Samoa, o loo nofo i le taimi nei i Sini, Ausetalia. O Hunt e tauva  i le Ultimate Fighting Championship (UFC), ma sa manumalo foi i le 2001 K-1 ma sa manumalo foi i le World Grand Prix. Ua lauiloa o ia i le lalolagi  o le “Super Samoan” poo le “The Doctor” O Novema 2015, na numera #7 o ia i totonu o le faatulagaina aloa’ia o le paga mamafa a le UFC.

30 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>