Tumutumu sa fa’amavae atu i le Tama mai Aleisa

254 Hits

TOFA JIMMY: Sui o le Aiga o lo’o molimoli atu le pusa-maliu o Jimmy ‘Atilua Fatipule La’ulu i le malumalu mo ona toe sauniga i Hawkes Bay.

TOFA JIMMY: Sui o le Aiga o lo’o molimoli atu le pusa-maliu o Jimmy ‘Atilua Fatipule La’ulu i le malumalu mo ona toe sauniga i Hawkes Bay.

Ripotia e Jonathan Pine

Hawkes Bay Today

Fa’aliliu e Maiava

Matua tumutumu sui o le aiga, o uo ma ‘aumea-mamae fa’apea le mamalu o le atunu’u sa ‘auai atu e fa’amavae i le ali’i-la’ititi o Jimmy ‘Atilua Fatipule La’ulu, le atali’i mai Aleisa e le’i leva ona malaga atu i Niu Sila ma lona aiga, aua se soifuaga manuia. 

O le tina fa’anoanoa o Fofoga La’ulu na faia le molimau e fai ai ma sui o le Aiga, i ona toe sauniga sa faia i le Malumalu o le Ekalesia a Iesu Keriso o le ‘Au Pa’ia O Aso e Gata Ai.

O Jimmy si tamaititi tolu-tausaga lea na malemo i le sami i le matafaga o Ocean Beach i le Aso To’ona’i, ua uma le Kerisimasi. 

E silia i le itula atoa o tau sa’ili e sui o le aiga fa’apea uo ma le to’atele sa iai i lea nofoaga. 

Na fa’amafanafana ma fa’alototeleina le tina o Fofoga e sui o lona aiga, a’o molimoli atu i le malumalu le tino-maliu o si ana tama. O lona pusa-maliu sa fa’atumulia i teu-fugala’au, o ata ma fa’amaisega-tusitusia e fa’aalia ai le alofagia o lea ali’i-la’ititi.

E manatua e ona matua ma le to’atele le ali’i o Jimmy, o se tamaititi tafitifiti, e atamai ma naunau e fia iloa o so’o se mea. O le molimau lea na fa’afofoga iai le to’atele a’o momoli mai i le gagana Samoa. 

E le’i leva ona malaga lea aiga i Niu Sila mo se soifuaga fou.

Na mafatia si ona tina ma fa’amatala le afaina tele o lona finagalo ona o si ana tama ma o le a le-fa’agaloina lana tama-tautalatala ma alofagia e lona aiga. Na ta’ua fo’i i le molimau, o se tamaititi e fiafia tele e talatalanoa i tagata matutua ma naunau tele e fa’ata’ita’i mea fou e va’ai o fa’atino e isi tagata.

“O le a manatua pea lana ‘ata’ata taufa’alilli i lo’u fatu.”

 Sa lagiina e tamaiti-a’oga o le A’oga Tulagalua a Heretaunga se pese e aualofa ai ma fa’amavae atu i le latou uo o Jimmy.

Na ta’ua e le uso o lona tama, o Simi La’ulu, ua fetaui lelei le aso mo ona toe sauniga.

“O se aso matagofie tele ae maise, o le to’atele sa ‘auai e lagolago atu i le aiga mafatia.”

Na ta’ua fo’i, o le a fa’amanatu pea e le aiga atoa le aso na fanau mai le ali’i o Jimmy fa’apea le aso na ‘amia ai e Lona Matai. O le Aso 11 o Ianuari, e atoa iai lona fa tausaga.

“O le a matou fa’amanatu pea lona Aso Fanau i tausaga ta’itasi fa’apea fo’i le Kerisimasi ma fai mea uma e manatua ai le atali’i.”

Ae na mafanafana lava le aiga atoa ona ua talitonu, ua mapu atu ma le filemu Jimmy, i A’ao o Le Atua.

“Ua fa’atasi atu Jimmy i Lagī ma o lo’o matamata ifo fa’atasi ma agelu o lo’o pepese i Vi’iga o le Kerisimasi.” 

O lo’o lagomau nei i le fanua-tanu i Hastings.

Na fa’aalia e se uo a le aiga ananafi, uiga malie ma tausa’afia o le tamaititi.

Sa alu se tafaoga a Evangeline Levao ma lona to’alua, o lona atali’i e ono tausaga, o lona tei ma lana fanau-tama e to’alua mai Samoa.

E le’i leva ona momoli e le faia’oga talavou lea, pepa-fa’atumu mo Jimmy ma lona uso-la’ititi, ina ia a’o’oga ai i le A’oga Fa’ata’ita’I i Flaxmere i le tausaga fou.

“A o se fa’anoanoaga tele. Ma’umau e, pe ‘ana ‘ou iloa atu o ia, ma mafai ona ‘ou lavea’i maia. Na ‘ou ala a’e i le taeao ma mafaufau ia Jimmy ua maliu… Talofa e!

“O se tamaititi aga-malie ma tautalatala.”

Na ta’ua fo’i, e fa’afeiloa’i lava ia e Jimmy i le “malo” pe a alu i le latou fale.

Na ta’ua e Evangeline, o lo’o tatalo ma mafaufau i nai matua fa’anoanoa ona o mafatiaga o feagai ma latou uma.

“Amu’ia e fa’anoanoa, aua e fa’amafanafanaina i latou,” o lana fa’amanatu mai lea o Afioga Pa’ia a Le Atua.

© Samoa Observer 2016

Developed by Samoa Observer in Apia