Alofa i aiga
O le ola tautua ai o aiga o se itu taua tele lea.
O lea le finagalo o Simona o Apolima Uta i le fa’atalatalanoaga ma le Fofoga o Samoa i le aso ananafi.
“Ia e pei o lea lava le tulaga o lo’o ua i ai le taimi lenei, ma o se itu lelei tele lea i lo’u ia iloa i a,” o lana saunoaga lea.
Na ia ta’ua e le’i leva ona nonofo ma le tinā o le aiga.
“Ia e pei o lea lava le tulaga o lo’o ua i ai nei, o le taumafai lava ia mafai ona atia’e aiga, ma o a’u ia o lo’o i ai lava sina tama’i ma’umaga i uta o le afio’aga o lo’o ua tua i ai le taimi lenei.
“O se itu faigata tele lea i a te a’u ia ae o le uiga o la’u tala a e alofa moni i lou aiga ia o le a fesoasoani tele lea.
“A leai se galuega o le va’ava’ai lava lea i itu uma ina ia mafai ona feso’ota’i ai ma fai feau uma mo le aiga.
“O le taimi lenei e le’i leva na nonofo ai ma le to’alua ia o lo’o va’ava’ai atu lava ni tamaiti aua le lumana’i.
Na ia fa’ailoa o le itu lelei tele lea e fesoasoani ai aiga.
“Aua e o’o ane le taimi e fai ai le to’alua ae lae iloa ona fai le fatu aiga.
“O le taimi lenei ia ua faigata le soifuaga, o le galulue lava ia e fa’apea ona fesoasoani ai so’o se fa’afitauli tau i aiga aemaise ai lenei vaitau i le taugata o le tau o le soifuaga.
“E leai se tulaga fo’i lea o le moe ae fa’amoemoe i se vavega e mafai ona maua ai nisi o vaega o lo’o ua mana’omia.
“E leai se tulaga fa’apena, o le itu taua o le mafai lava lea ona fa’atino o mea uma mo le lelei alu i luma o aiga aemaise o nuu ma afioaga.