O Savai’i lava ia, o lo’u nu’u moni

Tusia Pai Mulitalo Ale ,

443 Hits

Laupati Mulitalo.

Laupati Mulitalo.

O le mea e iai lou fatu o lou aiga moni lava lea. 

O le tautinoga lea o se tasi o tama mai le afioaga o Lano le tama ia Laupati Mulitalo lea o lo’o faaaiga lua I le motu tele I Salafai. 

I le faatalatalanoaga ma le Fofoga o Samoa, na faailoa ai le nisi o manatu sa manatu le tama ia Mulitalo e le auai sona finagalo. 

“Ou te le taliaina le vaega lea o Savai’i o lo’o ola I se olaga pologa nai lo I tatou I Upolu nei.” 

“Ou te talitonu o le pologa lea o loo faasino iai tatou I Savai’I o le leai o se tupe.” 

“Ae o meaai o loo maua I taimi uma, e le faatusalia lea tulaga I le olaga I upolu.” 

O le tama ia Mulitalo faato’a si’itia mai ma lona aiga i Nu’u ae sa nonofo lava i Lano. 

“O le tele o taimi e lagona lava lou faanoanoa ona o le tele o faitioaga a tagata mai Savai’I e faapea, e ala ona o ese mai tagata mai Savai’I ona ua mana’o I se olaga filemu lea o lo’o ola ai tagata I apia nei.” 

Peitai, o le talitonuga o le tama ia Mulitalo, o le tele o tagata o loo nonofo I Upolu o loo faigaluega ma tausi aiga I Savai’i. 

“O matou lava nei o loo nonofo I Apia o loo faia le galuega o le tautua I aiga o loo I Salafai, tautua le ekalesia aemaise nu’u ma afioaga.

“E le faapea e na o le a’ai ma nonofo o loo fai nei, o loo galulue ma tautua aiga. 

Peitai, o aso nei o tupe lava e faatino ai mea uma. 

“E lelei le olaga I Savaii e mafai ona e sulu I aiga tuaoi, o toatele tatou aiga, ae o le olaga lena e le mafai ona tatou faatinoina I Upolu.” 

Saunoa le tama ia Mulitalo pau lava lea o le taimi e mafai ai ona toe foi I aiga o taimi o faalavelave ae o le seleni lava e faatino ai.

“O tu foi ia e le mafai ona tatou momotu eseina ma I tatou, ona sa tatou ola ane ai, o tatou aiga lava o loo iai lo tatou faasinomaga e le mafai la ona tatou faatala le iai.

O le olaga lava I Salafai e maua mea uma I le faamolemole, e saoloto mea uma. 

“E mafai ona e faagoi le ulu o lou tuaoi pea leai se mea’ai ae o upolu nei o le luma lena peafai ae e su’e se mea I sou tuaoi e te le masani ai.

“O lou lava ia talitonuga, e filemu atu le olaga o loo ola ai tagata I Salafai nai lo tagata I Upolu.

O se tasi o atugaluga na oo iai le faasoa a le tama ia Mulitalo o pulega a ali’I ma faipule. 

O le tele o nu’u e ala o ese tagata ona ua faate’a e pulega a ali’I ma faipule ae o fea a tutuli iai nei tagata. 

“Afai ae faate’a se taulealea ona o le gaoi o fea a tuli iai o lo’o nonofo matua e tatau ona faatonuina ma aoao le amio ae lea la’a aveese ma le nu’u. 

O itu ia e tatau ona toe Iloilo e le tatou malo. 

E le gata I lea I lau maitau iai e sili atu le taugata o le soifuaga o loo ola ai tagata I Salafai nai lo Upolu nei. 

“I lau va’ai iai pei ua fai sone e le malo le tatou atunuu. 

“Upolu sone A, Salelologa sone B, Ituotane Sone C ma le ItuoAsau Sone D. 

Afai e .50 sene le tau o le pauga suka I le sone A, e oo mai le sone B ua $1, sone C ua $1.50 e oo atu I le sone D ua $2. 

O le la’u va’ai lena iai faalemafaufau I le soifuaga lea o loo ola ai Savai’I ma Upolu nei. 

E pei e faaesea le tau o le soifuaga I totonu o le tatou atunuu ae tatau ona laugatutusa tagata uma. 

A tatou tagatagai foi iai I le atinaeina o le tatou malo, e pa’u lava le mamafa o atinae I le motu I Upolu.

“Sa ou nofo I Savai’i I le silia ma le 20 tausaga, e leai lava se mea ua suia o lenei motu.

“E ui lava ina filemu le olaga I Salafai, ae o lou talitonuga e sili atu le taugata o le olaga o tatou I Savaii. 

O le isi itu tatou te tilotilo iai, o mea faaleekalesia lea ua tele ina pologa ai le toatele. 

O le tele o mea fai e sasao mai ae utiuti le tamaoaiga. 

“O le olaga lea tatou te ola ai, o tupe lava e faatinoina ai.”

© Samoa Observer 2016

Developed by Samoa Observer in Apia