Fa’agae’etia le To’omaga ona o le agalelei

Tusia Fa’aliliu e Maiava ,

105 Hits

O lo’o fa’aauau pea ona ‘auina atu fesoasoani a le vaega faipisinisi ma le atunu’u e lagolagoina ai galuega a le Vaega o le To’omaga Mo E Puapuagatia (SVSG), e le gata o tulaga tau-seleni ae fa’apea ‘au’aunaga e ofo-fuaina atu.

I le Leitiofoni sa’ili-tupe a le To’omaga sa faia i le masina o Iuni, na agalelei ai le atunu’u aoao, i se seleni tele e fesoasoani i le fa’aauauina pea o lea vaega ma matala ai pea ona faitoto’a mo so’o se Samoa e mo’omia se fesoasoani. 

O le lagolago mai le malo, o ekalesia ‘ese’ese, o sui-ta’ito’atasi ma sui o malo mai fafo, o afio’aga ma alalafaga o le atunu’u, o a’oga, fa’alapotopotoga ma le mamalu lautele o Samoa, na sasa’a atu lo latou agalelei mo lea fa’amoemoe aoga. 

Ua le gata i lea, ae o lo’o fa’aauau pea ona fa’aalia le a’ao-mafola o le vaega faipisinisi, lea ua toe to’ia ai fo’i le laulau a le Peresetene ma le pulega o le To’omaga, ona o nisi o meaalofa e fesoasoani i le tausiga, le saogalemu ma mana’oga o aso ta’itasi o fanau o lo’o tausia e le To’omaga.

O lo’o ta’imua le faletupe o le ANZ i Samoa nei, e tu’ufa’atasia se tupe e tusa ma le lua-afe valuselau tala ($2,800.00) mo taumafa ma isi vaega mo’omia mai le vaega o le Business Lunch Group fa’atasi ma le isi afe-valuselau tala ($1,800.00) fa’aopoopo mo mana’oga masani o lo’o fa’atalia nei.  

“Fa’afetai, fa’afetai tele i lau Susuga Mathew Fisher ma le ‘Aufaigaluega mo la tou lagolago fai-fai-pea.”

E le fa’agaloina fo’i le agalelei ma le ma’au o le susuga a Leckie ma Rhoda MacDonald o le kamupani a MacDonald Motor Distributors, lea ua fo’ia se pusa-‘aisa mo le Maota o le Fa’amoemoe fa’apea le susuga a John Bellinger o le kamupani a le Samoa Superior Products Ltd, ua foa’ina le tane-vai fou e tolu-afe onoselau lita (3,600 lita) ma ona totoga uma. Fa’afetai tele atu fo’i i le kamupani a le Apia Traders mo le meaalofa ua foa’ina, le ogaumu e alu i le ‘eletise mo le To’omaga. 

“Ua fa’agae’etia lava o matou tagata ona o lo outou alolofa, ua ovitia ai le gagana ma faigata sa matou ‘upu ona o le lagolago ua fa’aalia e le vaega faipisinisi mo le tausia o fanau a le atunu’u o lo’o iai nei i le To’omaga. Ua le-magagana o matou tagata ona o le alofa-tula’i ae maise lo matou fa’afetaia o Le Atua, ona o fa’amanuiaga ua sasa’a mai e ala i lo tou finagalo alofa ma le a’ao-foa’i mo lenei ‘au’aunaga. Fa’afetai tele atu Samoa, e fai ai ma sui o fanau uma o lo’o i le Maota o le Fa’amoemoe, Georgina Lui, le Ta’ita’ifono o le Komiti Fa’atonu o le To’omaga mo E Puapuagatia. 

© Samoa Observer 2016

Developed by Samoa Observer in Apia