Toe manatu tasi lava...Fai Lou Sao

Tusia Fa’aliliu e Maiava ,

96 Hits

Toe mafaufau tasi lava…E iai se ata-tusi o lo’o fa’aalia ai se ata o le Tupu, o lo’o taumafai e fai sana filifili mai lona pale-ali’i, fa’atasi ma le ata o se tagata-pologa o lo’o taumafai e fau se pale-o se-tupu mai sana filifili. I lalo-ifo o lea ata, o lo’o iai ‘upu nei: “O le olaga lenei, e fua lava i mea e faia e le tagata, po’o le a lava le mea o faia.” E tofu tatou ma malosi’aga ‘ese’ese na tatou fananau mai ma tatou, peita’i, o tatou lava e iai le fa’atalia, pe fa’aaoga lelei ia malosi’aga pe leai fo’i. E ā lau susuga, o ē fa’aaoga tatau uma mea-alofa o ia te ‘Oe? O ‘ave atoa uma iai mea ua ia te ‘Oe?

O le ali’i talavou ‘ou te iloa, o Bob le suafa, na fanau mai ma malosi’aga masani, peita’i, o lo’o soifua nei i se soifuaga tulaga ‘ese, ona o le lelei o ana fa’atatau, e lotoa ma lava lona fa’atuatua. O le fa’atoa 15 o tausaga o Bob, sa finau ai ma le ma’i o le kanesa i le tele o tausaga. Na si’itia lona aiga, i le isi a’ai e iai le falema’i ma foma’i fa’apitoa mo tamaiti e a’afia i le kanesa. Ae le’i fa’afiti ai Bob! Na i’u ai lava ina manumalo ma manuia si ali’i, i a la finauga ma lea fa’ama’i mata’utia.  

A’o a’oga, e galue punoua’i lava Bob i ana mea-a’oga nai lo isi tamaiti, ma i’u ina si’itia ai i se tasi o Iunivesete maualuga i Amerika. Ina ua fa’au’uina mai le Iunivesete lea, sa toe a’oga fo’i ma atili su’esu’e malosi ina ia ‘ausia le a’oga fa’aFoma’i. O le mea lava lea sa i le loto o Bob, ma matua tu’u atoa iai lona malosi. O le asō, ua avea nei o ia ma ali’i foma’i, ma o lo’o fuafua e fesoasoani mo tagata mama’i i atunu’u matitiva i le lalolagi. 

Ae a lau susuga? O ē tali atu i ou lu’itau e pei o Bob? I lou soifuaga, o e tu’u atoa iai lou malosi ma meaalofa ua ia te ‘Oe? Manatua, e le o le lelei i le amataga, a o le taunu’uga manuia, e aupito taulia. A uma atu ma le lalolagi nei, e lē-fesili fa’apea “O le a le telē o lou fale sa iai?”, ae  “O le a le tele o lou fatu?”. Sa lelei ona e fa’atino lau pito-la’au na tu’u atu e Le Atua?  

Manatua, “E faia e Le Atua mo ‘Oe, mea e le mafai ona e faia mo ‘Oe lava, ae le mafai ona Ia faia mo ‘Oe, se mea e mafai lava ona e faia.” Ua tatau ona fai nei lau filifiliga, fa’atino lou sao, fai lau galuega, ma tu’u uma iai mea ua ia te ‘Oe,  lou tagata atoa, lou to’alua, lau fanau, lau galuega ma le lumana’i, lau a’oga, ma isi mea uma e tatau ai. Ae amata lava i le ‘ave uma iai o ou malosiga ua iai mo lou Atua, ina ia fesoasoani mai ai ia te ‘Oe, e fa’aaoga tatau mea uma na Ia avatu ia ‘Oe. Amata i le asō, ona tatalo ia Iesu e pulea atoa e Ia lou tagata. E na o Ona ala lava e mafai ai ona suia lou olaga, i le soifuaga fou ma lelei, e finagalo e te soifua ma ‘ou ola i le lalolagi nei. Toe mafaufau tasi lava…                              

© Samoa Observer 2016

Developed by Samoa Observer in Apia