Malaia se fale o se aiga i Tufuiopa

30 June 2018, 12:00AM

O le taeao o le Aso Tofi sa fa’apea ona aafia ai se fale o se aiga i le afioaga o Tufuiopa ona o se malaia.

Ae o le tulaga mata’utia e le nao le tasi le fale na aafia ae lua isi fale sa faapea ona faaleagaina ona o lenei malaia.

Sa taunuu atu le vaega ale Samoa Observer i le nofoaga sa tulai mai ai lenei mataupu ua leai uma se fale ua uma ona faaleagaina e le mu.

E tusa ai ma le saunoaga a se tasi o tina sa iai i le taimi na tulai mai ai lenei mataupu o Tita’e Afele e faapea o le mu na amata mai i totonu o se potu o le isi fale lea sa faapea na fai ai se auli a se tasi o teineititi aoga.

“E leo sou fale lea o lau tama teine e nofotane mai iinei,” o lana saunoaga lea i le vaega o le Samoa Observer.

“O au lea na ou sau ou te asiasi mai isi au fanau, ae o le mataupu ua tulai mai o nei le taeao sa faapea ona fai ai le auli a se tasi o teineititi o le aiga.

“O lea teineititi e aoga i le kolisi maualuga o Vaimauga o Makerita lona igoa.

“Na mae’a ona fai le auli a lea tamaitai ona alu lea ae loka lona potu pe tusa o nai itula ae ou sosogi loa ise manogi e peiseaī o se mea o loo mu.

“Na ou fesilisili i le matou fale ma sa matou sueina lava poo solo I totonu ma fafo o le fale poo fea tonu lea e sau ai le manogi mea mu lea.

“E lei iai se mafaufau o totonu o le potu moe o le tamaitai lea o loo sau ai le manogi lea.

“Ae peitai sa faateia matou ina ua valaau mai se tasi o tamā ma faapea e matou te tamomoe I fafo ona ua mu le fale.

“Sa leai sesi o matou sa toe faatali ae ua matou tamomoe mai loa i fafo.” 

Sa taua foi e Tita’e e lei iai se taimi sa mafai ai ona aofa’i uma mai mea aogā o loo I totonu o le fale ona ua vave na sasao le malaia.

“O le fale lea na amata ai le mu e ogatotonu o isi fale e lua ma o le mafuaaga tonu lava lea ua aafia atu ai ma isi fale.

“Ua leai ma se mea o le fale lea sa amata atu ai le mu o totoe.

“Ae o le agaga faafetai ona e leai se soifua o maimau ai i lenei malaia, pau le tulaga lea e iai ona ua afaina atu ai ma mea aoga e pei o tusifolau ma isi mea faapena.

“Ae faafetai I le Atua ona e moni lava ua leai uma ni mea totino ae o loo saogalemu uma matou.”

E lei mafai ona maua mai se tali mai le Matagaluega a leoleo faapea ai ma le Matagaluega o Fuimu.

30 June 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>