O FEA NA O MAI AI TAGATA POLENESIA?

Tusia Fuimaono Na'oia Fasavalu Touli F. Tupua - Suaga a le Vaatele ,

193 Hits

Afai e faatu se fesili poo fea na o mai ai Tagata Polenesia i tausaga e tele ua mavae, e le faigofie ona maua se tali-aua o ona po ia- e le’i mafai ai ona faamaumauina i ni pepa, ae sa tuu-taliga faamatalaga uma- e uiga i lo latou tupu’aga, tu ma aganuu, ma le olaga i aso fai pea. O lona uiga la, ona pau ia o mea e mafai ona tatou  tua i ai-pe ono maua ai se fesoasoani-i le fesili ua tula’i mai.

Afai la tatou te faatusatusa tu ma aganuu masani a tagata Samoa, Toga, Hawaii, Maori ma isi, ona tatou iloa ai lea-e tali foliga tutusa lava i le tele o itu. O uiga tutusa ia e mafai ai ona tatou ioe -atonu o i latou uma- e tupuga mai se aiga e tasi. O le aiga lea e ta’u-o le “Aiga Polenesia,” o lona uiga-o “motu e tele.” O le itu taua la e ao ina ta’ua iinei e faamalosia ai lea Mau, o talatuu a nei tagata-e tutusa lelei lava, e pei o Tala ia Maui, Lata ma Tigilau. E o’o foi i foliga vaaia o nei tagata-e tutusa lelei lava-ae talitonu foi i latou uma- ia Tagaloa, le atua o mea uma-e tausia ma ta’iala i o latou olaga. 

E ese tagata Polenesia-ese tagata uli poo “Melanesia”-ia e nonofo i Fiti, Solomona ma Papua Niu Kini-aua e afua le eseesega i o latou lanu, ona faasolo ai lea i aganuu, aemaise ai- o talatu’u ma uiga masani i aso ta’itasi. O lona uiga la, e le taitai ona aiga pe faiā ma tagata Polenesia. E le mafai foi, atonu, ona tatou taofi- sa uia e tagata Polenesia ia atumotu i aso e tele ua mavae. Ae ao foi ina tatou manatua, o loo i ai le isi vaega o le Aiga Polenesia lava lenei-i isi motu laiti o le Pasefika.

O i latou ia e ta’ua o tagata “Maikorenesia.” E foliga tutusa o latou lanu ma tino ma tagata Polenesia-ma e faapea foi a latou tu ma aganuu-aemaise ai o nisi upu o le gagana i aso uma. E le taumate -sa uia ia atumotu laiti e tagata Polenesia i aso ua mavae- pe sa mau ai foi. E ese ai la mai le Pasefika, o Initia i Sasa’e ma le Penisula o Melei i Saute Sasa’e o Asia, o loo ta’ua e faapea- o loo nofoia e tagata ‘e’ena poo le lanu Melei.

O tagata nei fai mai o nisi o a latou sauniga, aganuu ma le gagana-e tutusa ma foliga i faiga a Samoa ma le tele o atunuu Polenesia. O ia uiga tutusa i tu ma aga, faiga masani ma gagana-ua talitonu ai nisi-sa nofoia e tupu’aga o tagata Polenesia Asia i aso ua mavae.

Fai mai- o i latou ia sa ta’ua o le lanu “Melei” poo “Melei Polenesia,” ae peita’i-na o ese mai Saute Sasa’e o Asia-ae nofoia le Akipeleko o Initia i Sasa’e. Ina ua mavae ni tausaga se tele o nonofo ai, sa ui ane i atumotu Malesala ma Karolaina- ma aga’i atu ai i le Pasefika Tuloto.

O malaga nei e faapea-sa afatia ai o latou vaa ma ta’ape ai. O nisi ua a’e ane nei i motu ese ma nonofo ai- e avea ma o latou nuu moni, ao isi ua fai pea le folauga ma faapea foi ona taunuu i isi motu o le Pasefika e pei ona i ai nei.

O nisi -ua taunuu i le Penisula o Melei, ma aga’i atu ai i le tele o motu tetele o Initonesia. Ae ui o lea-fai mai lava le taofi o isi tagata popoto, e le o ni nuu moni ia o tagata Polenesia pe a fua i le tamaoaiga o a latou aganuu ma gagana- aemaise ai lava le tomai i folauga mamao.

E mafuli le mau a tagata popoto i le taofi e faapea- o le nuu moni lava o tagata Polenesia e ta’u o “Hawaiki” poo Initia lea. Fai mai latou-o le va o le TLM 500 ma le 400-sa mau ai tagata Polenesia i laufanua o Mesopotamia i le vaega e ta’ua o “Kanekesa,” ma sa ta’ua  ma iloa-gofie i latou i le lanu masani o lea vaega-eleele.

O iina sa feusua’i ai ma tagata Ariana, Tipeta, Arapi, Aikupito ma tagata Eperu mai sauté. O itu uma ia ua taofi ai isi tagata atamamai-o tagata Polenesia e tupuga mai le tuufaatasiga o tagata eseese ma lanu e tele ua ta’ua i luga.

Fai mai se tasi alii poto-pe tusa o le 450TLM-na tulaiI mai ai se malo soofaatasi i totonu o Initia- e igoa o (Atia-te-varinga-nui) sa pulea e se Tupu e suafa ia “Te-te-Rangi-Marama.” O tagata ia na amataina fefaataua’iga ma pogai ai ona malaga atu i Melei ma motu o Initia i Sasa’e- a’o le’i taitai ona suluia le lalolagi i ‘ave o le Tala Lelei.

O i latou ia sa nonofo ai lava poo “Avaiki-to-Variga” ae mulimuli ane ona faasolo atu i Sasa’e poo le Pasefika lea sa latou ta’ua o “Moana-o-Kiva.” O taofi na o le ‘au-popoto-ua tatou iloa ai e peiseai e talitonu faatasi i le mau-o Initia lava, o le “Hawaiki” lea poo le nuu na tupuga mai ai tagata ua ta’ua nei o tagata Polenesia, Peita’iu, i soo se mea lava-e tatau ona lua ni itu o se finauga.

O lea la-e le faapea le taofi o isi, aemaise ai i latou ia e fai mai-e ui lava ina fulisia le toatele i le mau ua faaalia i luga, ae o lo latou lava taofi, e mamao atu le mea e ta’ua o “Hawaiki.” O lenei foi mau ua aumai ai pine e faamaonia ai -o le Hawaiki o tagata Polenesia-e i se mea o le talafatai o le vai-fagaloa o Peresia. A lē o Arapi ia poo le Sami ‘Ula’ula. E tele upu a tagata Polenesia ua mautinoa e fofoa mai Atunuu i Sasa’e, o nisi foi o aganuu e tutusa ai Arapi ma Eperu.

O ia aganuu e faasino i le upu “peritomeina,” “tapu” poo le “tapui”, le matauina o taimi ma igoa o fetu folau. Ae le gata i lea, e na o Eperu e fai o latou “matai” ma e tautua, e pei lava o Samoa. I le ma lea, o molimau a tagata folau na mua’i tu-laueleele i Samoa, o tagata Samoa, o tagata folau i le vasa.

O le tomai na latou maua mai ia latou folauga i le sami ma o latou tua’a i aso ua mavae. O latou o tagata atamamai i le folau i vaa, fausia o va’a, ma le matauina o uiga o le vanimonimo. Sa latou faitauina peau o le sami- atoa ai ma taimi o matagi. Fai mai sa latou folau ane i Matakasa ma nonofo ai.

Sa folau atu i Initia talu ai fefaatauaiga- faapea ai ma Initia i Sasa’e. O le taimi o feusuaiga ma tagata Arapi na latou aoaoina ai le poto i folauga, le faitauina o le La ma Fetu-aua a latou folauga, aemaise ai o au o le sami ma taimi o matagi.

O le tele o taimi latou te folau ai-e pei o tagata Arapi i le agaga saili pea- aua le faaleleia atili o lo latou tomai. O le pogai foi lea a latou folau ai-e le mafai ona sese-ae pei lava o manulele le toe fo’i mai ma le manuia! (E toe faaauau atu

© Samoa Observer 2016

Developed by Samoa Observer in Apia