Tulimata’i e le sa avea ma Ofisa Sili isi avanoa maualuluga

Tusia Lanuola Tusani Tupufia ma Fa’aliliu e Maiava ,

228 Hits

Ua taula’i nei le silasila a Matafeo Tanielu ‘Aiafi – le sa avea talu ai ma Ofisa Sili o le Matagaluega o A’oga, Ta’aloga ma Aganu’u, mo isi avanoa maualuluga fa’apea i totonu o le malo. 

O le toe sa’ilia o se galuega a Matafeo, e afua mai ona sa le-manuia ana taumafaiga i Faiga Palota Tele a le Atunu’u, lea sa tauva ai mo le Nofoa o le Itumalo Tu-taulaga o Faleata. Le nofoa lea ua manumalo ai Faumuina Wayne Fong.

I se talanoaga ma sui o le Samoa Observer, na fa’amaonia ai e Matafeo le ‘auina atu o sana talosaga mo le avanoa i le Pulega mo Tagata Maimoa mai Fafo (STA) fa’apea le avanoa o le Pulega o Fa’ailoga Taualoa a Samoa, (le SQA).

O avanoa nei mo Ofisa Sili o le SQA ma le STA fa’apea isi fa’alapotopotoga a le malo e aofia ai le Fa’alapotopotoga mo ‘Ele’ele o Samoa (le LTA), sa fa’asalalauina e le’i mamao atu. “Sa ‘ou talosaga fo’i mo le STA,” o le fa’aaliga lea a Matafeo. “Ua fa nei vaiaso talu ona mae’a fa’atalanoaga sa faia ma o lo’o fa’agasolo pea iloiloga a le komiti, ona ‘ave ai lea o se fautuaga i le Kapeneta ma fa’amaonia ai se fa’ai’uga.   “E le’i o’o mai lava la se tala ae o lo’o fa’atalitali pea.” 

E le silafia e Matafeo pe to’afia nisi sa talosaga mo le Vaega mo Turisi peita’i na saunoa, na fa’alogo e to’alima sa fa’atalanoaina. 

Na fa’aopopo mai fo’i, o lo’o va’ava’ai fo’i i le Pulega mo Fa’ailoga Taualoa a Samoa (SQA) ona e iai ona agava’a i vaega tau-a’oa’oga. 

O lo’o avanoa le vaega lea ina ua tu’ua le malo e Fepulea’i Sinapi Moli sa fa’auluulu ai.

© Samoa Observer 2016

Developed by Samoa Observer in Apia