O le galuega Fa’aauau

By Fa’aliliu e Maiava 30 May 2016, 12:00AM

Toe mafaufau tasi lava…E manatu le to’atele, o le ali’i o Michael Jordan le tagata-ta’alo aupito ta’uta’ua i le ta’aloga pasiketiplo.

Na fa’aalia e lana faia’oga o Phil Jackson, ua na iloa, ua le-aoga ona ia toe a’oa’oina ni tomai ma metotia o le ta’aloga i le ali’i o Michael, ae mafai ona fesoasoani iai, mo le fa’aleleia atili o ona tomai fa’aTa’ita’i.

Ona amata loa lea ona a’oa’o e Jackson le ali’i o Jordan, e ta’ita’i ma fesoasoani i tama o lana ‘au, ia avea o tagata aupito lelei. Ioe, na aoga! Na avea le latou ‘Au – le Chicago Bulls – o se tasi o ‘au-pasiketipolo manuia i tala-fa’asolopito o le ta’aloga i Amerika.

E afua ona lelei tagata-tusiata logologoa, ona e alu le ta’i-fia tausaga o taumafai e fa’aleleia o latou malosi’aga ma agava’a. Fia-selau tausaga talu ai, sa taumulimuli ai se tusiata talavou mai Eleni o Timanthes le igoa, ma a’oga i se faia’oga tusiata mata’utia.

Na mavae tausaga o le tigaina ma pologa i aso uma, ae tusia loa e le tusiata talavou lea o Timanthes se ata mata’uti le matagofie.  O lona fiafia tele i lana ata sa tusi, na alu ai le tele o aso, o tilotilo pea ma tilotilo pea lava iai.   

E taunu’u atu i le isi taeao, ua suia atoa foliga o lana ata taugata, ona ua valia atoa. Na matua fa’ate’ia Timanthes ina ua ta’u-sa’o e lona faia’oga, o ia na fa’aleagaina lana ata i le vali. Fai mai le faia’oga: “Na ‘ou faia le mea lena mo lou lava lelei ma lou lumana’i manuia.

Ua fa’agata e le ata lena lou taumafai ma le aga’iga’i i luma. Ua tatau ona toe amata se isi ata fou ma e taumafai, ia sili atu.” O le mea lelei, ona sa usita’ia e Timanthes le fautuaga a lona faia’oga ma fa’aauau ai pea e tusia se tasi o ata aupito mata’utia o le seneturi ma le tala-fa’asolopito e o’o mai i le aso: le Ositaulaga a Iphigenia 

A’o le’i soifua mai le tagata ta-selo logologoa i le lalolagi o Yo Yo Ma, sa iai se tagata musika iloga e igoa ia Pablo Casals.

I le fa’amanatuga o lona 95 tausaga, sa fesiligia ai e se tasi o tusitala: “Ali’i Casals, lea ua 95 tausaga o lou soifua ma o le ta-selo aupito lelei ua soifua mai. Aisea lava e te saga fa’ata’ita’i ai pea ta’i-ono itula i le aso?” Tali Casala, “”Ona o lea lava e fa’asolosolo i luma i taimi uma.”  

O le ‘auala aupito sili e fa’amalieina ai le soifua ma le-fa’anoanoa ai, o le taumafai e a’oa’o so’o se mea fou i lou soifuaga atoa. E fai-fai ai pea, o se “galuega o lo’o fa’aauau.”

Fai mai se tasi ali’i-atamai: “E leai se tagata e atoatoa sona fiafia pe fa’amalieina lona lava tagata, pe afai e na o lona lava ola o popole iai. E na o manu lava e fiafia ma fa’amalieina e olaola noa.” E iai lava le avanoa e fa’aleleia ai.

Ae fa’alagolago atoa lava ia tatou, pe fa’aauau ona fa’aleleia o tatou fatu ma agaga ma tagata atoatoa, o mafutaga fa’aleUlugali’i, mafutaga i aiga, o mafaufauga, faiga-uo, o galuega ma isi lava mafutaga fa’apena.   

Na o le malosi lava o Le Atua Soifua e mafai ai ona tatala atu ou manuia. A tu’u atu lou fa’atuatua ma lou ola i Ona a’ao, o le a fesoasoani Iesu i aso ta’itasi e fa’alelei vaega ta’itasi uma o lou ola, ina ia avea ai ‘Oe o le tagata atoatoa Na Ia fausia ‘Oe ia iai. Toe mafaufau tasi lava… 

By Fa’aliliu e Maiava 30 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>