Taunu’u i Niu Sila le afafine o Jerry Collins

Tusia Kirsty Wynn ma Fa’aliliu e Maiava ,

362 Hits

O Alana Madill – le to’alua o  Jerry Collins, ma le la tama o Ayla.

O Alana Madill – le to’alua o Jerry Collins, ma le la tama o Ayla.

Ua malaga asiasi ane nei i Niu Sila – mo le ulua’i taimi – le afafine e to’atasi o le ali’i-Samoa iloga o Jerry Collins ma lona faletua o Alana Madill a’o sauniuni ana uo ma aiga e fa’amanatu le tausaga talu ona maliu le ali’i lakapi ma lona faletua.

Na taunu’u i Niu Sila i le vaiaso nei Ayla Collins ma tagata o lona aiga mai Kanata, e aofia ai matua o lona tina – o Ruth ma Darrel Madill ma le uso o lona tina, o Aunt Nora.

O le Aso Sa a-sau, e atoa iai le tausaga talu ona maliliu matua o Ayla i se fa’alavelave tau-ta’avale i Montpellier i Farani.

O Ayla – na fanau i Kanata - sa na o le 10 vaiaso le matua ae tupu le fa’alavelave lea na maliliu ai ona matua, ma na manu’a ai fo’i o ia, ma fa’apea ailoga a ola ona o manu’aga i lona ulu.

Sa finau pea Ayla ma taofia ai pea i le falema’i i le silia i le masina fa’atoa te’a ai i tua e va’a’ia ma tausia e matua-o-ona-matua.

Na ta’ua e le tua’a o Jerry Collins, le toea’ina o Frank, o se fiafiaga tele lea ona ua o’o atu matua o le to’alua o lona atali’i ma lona afafine i Niu Sila. 

“’Ese le malosi ma ‘aulelei, e fa’asolo lava ina atoatoa lona malosi ma ua amata ona savali,” o lana fa’aaliga fiafia lea.

“’E mata’utia le ‘au-malosi, e matua ‘au-malosi lava… pei o lona tama.” 

Na felelei i Kanata ia Iulai o le tausaga talu ai, matua o Jerry Collins – o Frank ma Galuia – ma lona tuafafine o Brenda e asi Ayla ina ua te’a i tua mai le falema’i.

O le vaiaso nei, o le a ‘auai fa’atasi le Aiga o Collins ma le ‘Au-Madill mai Kanata i le talaga-teu ma le fa’apa’iaina o le ma’a-fa’amanatu o le tamā-logologoa o Ayla, le ali’i-ta’uta’ua o le ‘Olopeleki, a o le tama-tuai fo’i o le kalapu lakapi a le Northern United i Porirua, Ueligitone, o Jerry Collins.   

O Jerry – e 48 ana ta’aloga faitaulia i le ‘Olopeleki, e 34 ona tausaga ma sa soifua lava i Porirua ma ta’alo mo lana kalapu.

“E ‘auai tagata uma aua o le matou kalapu lea,” o le saunoaga lea a Frank.

O Frank le pule o le isi ‘Au ma o lo’o ‘auai fa’atasi ma ona alo tama’ita’i i ‘Au maualuga a le kalapu.

O le malae ta’alo lea ua fa’aigoaina nei, o Jerry Collins Stadium.

Na fa’ailoa e le kapeteni o le Kalapu a Northern United, o Alphonso Parson, e tolu aso o le fa’amanatuga. 

“O le po o le Aso Faraile, e lua ta’aloga e faia ai, ma e ta’a’alo uma ai tuafafine e to’alua o Jerry, o Helen ma Brenda,”

“O le tolu lea o aso o le fa’amanatuga, o le a tumu i fa’afiafiaga, o musika, o pesepesega ma ta’aloga lakapi mo Jerry.” 

E silia i le 200 tagata o lo’o fuafua e ‘auai i le talaga-teu i le Aso To’ona’i ma o lo’o talosagaina e Galuia – le tina o Jerry – le usuina o le pase EFKS, Ua so’ona ‘oli’oli nei e manatua ai si ana tama i taimi o faiga-lotu.

Na ta’ua fo’i e Parsons, o le fa’ai’uga o le vaiaso lava lea, e ‘uma ai le tausaga o le fa’anoanoa a le kalapu, ona e le gata i le maliu o Jerry ae fa’apea fo’i isi sui o le kalapu o lo’o fa’ata’otolia ona o gasegase ma manu’aga.

A ua fa’asolosolo lava ina lelei mea uma a’o aloalo atu mo le fa’amanatuina o le tausaga, talu ona maliu Jerry. “Ua sologa lelei lava mea uma aua le fa’amanatuina o Jerry. E matua to’atele lava tama-ta’a’alo talavou ua toe fo’i mai e ta’a’alo i le kalapu ma e talitonu, e tele lava sa matou fesoasoani e atina’e ai tupulaga laiti nei ia o’o i le ‘Olopeleki.

“O lo’o galulue fa’atasi tagata uma mo lenei fa’amoemoe.”  

© Samoa Observer 2016

Developed by Samoa Observer in Apia