O le fanau o lo’o ou galue malosi ai

Tusia Fetalai Tuilulu’u ,

88 Hits

Manuia o le fanau o lona fiafiaga: Teni Leu mai Malie

Manuia o le fanau o lona fiafiaga: Teni Leu mai Malie (Photo: Fetalai Tuilulu’u )

A e fiafia i lau galuega o lo’o fai, e lagona fo’i lou loto tausa’afia ma maua lou filemu. 

A e iloa lou fa’asinomaga, e leai se mea e te mafaufau vale ai fua ma o lea lagona fo’i lou fiafia i lenei lalolagi. 

O le manatu fa’aalia lea o Teni Leu mai le nu’u o Malie, ma na ia ta’ua o ia o lo’o galue mo le lumana’i lelei o lana fanau. 

Sa ia fa’apea mai e leai lava se mea e faigata pea fa’apea o lo’o e galue mo le lumana’i lelei o lou aiga ma lou fanau. 

O le tama 43 le matua o lona soifua, sa ia fa’apea mai e pologa lava i le taugata ole soifuaga ae e le’o se itu e ono fa’avaivai ai sesi. 

“O lo’o lelei pea le matou aiga, ma o lo’o lava fo’i le fa’asoa,” sa ia fa’apea mai le Fofoga o Samoa. 

 “O lo’o iai le matou ma’umaga e toto ai a matou mea’ai ma fuala’au aina, ma ona la lea ou te galue ai i le taimi nei e su’e ai se tupe mo o matou mana’oga.  

“Ou te nofo a la i le fale ma vaai mea e tatau ona fai ma galue i le ma’umaga.” 

Sa ta’ua fo’i e Teni, o le tele o tupe e alu i le va’aiga o le fanau aua o latou ia o lo’o ave ai le fa’amuamua.

“E fa’apena uma a tagata, e alu uma a latou tupe i le fanau aua o latou o lumana’i o aiga,” o lana tala lea.

 “E le’o se galuega faigofie le tausiga o le fanau. 

“E to’afa la’u fanau ma o lo’o a’o’oga uma. E mana’omia a la e latou le fesoasoani i taimi uma. 

Sa ta’ua e Teni o lo’o lelei pea le tulaga i le vai ma le eletise i totonu o le nu’u ma o se fa’amama avega lena mo latou. 

“Ua fai fo’i sina leva ua matou ii nei.” O lana tala lea.  

“O lo’o lelei uma lava mea uma.” 

 “A leai fo’i se tupe fato’a lagona fo’i lea o le popole. 

“E lelei a le nofo i totonu o nu’u aua e faigofie ai le olaga aua e felagolagofa’i tagata.” Sa ia fa’apea mai. 

“O matou ma’umaga ia matou te ola ai ma tau fesoasoani ai fo’i i le taugata ole soifuaga.

“O se fa’afitauli lava lena o lo’o feagai ma Samoa atoa.”

© Samoa Observer 2016

Developed by Samoa Observer in Apia