O le ma’umaga lona ofisa

Tusia Fetalai Tuilulu’u ,

141 Hits

Ieremia Fareni i le Fofoga o Samoa, 23 le matua o lona soifua mai Malie.

Ieremia Fareni i le Fofoga o Samoa, 23 le matua o lona soifua mai Malie. (Photo: Fetalai Tuilulu’u )

O le ma’umaga lona fiafiaga: Ieremia Fareni mai Malie

O au galuega e fai, e tele lona aoga i lou olaga. O au galuega fo’i e fa’atumuina ai lou oe tagata i le fiafiaE pau lava le auala e lelei ai sau galuega e fai pea fa’apea e te fiafia i lau galuega.  

O le manatu fa’aalia lea a Ieremia Fareni i le Fofoga o Samoa, 23 le matua o lona soifua mai Malie.

Na maua atu e le Fofoga o Samoa le taule’ale’a a’o feagai ai ma galuega i lana ma’umaga ma sa ia ta’ua fo’i, o lenei ma’umaga o lona ofisa faigaluega. 

O Ieremia o se tagata e fiafia tele e faigaluega i le ma’umaga, o lona tiute lea e fai aua le tausiga o le aiga.

“E leai a se mea e te tigaina ai pe’a e iloa fai le galuega. Ae le tago e fai galuega fa’apea, ailoga e manuia lou olaga,” o lana tala lea i le Fofoga o Samoa. 

 “Ia o la’u a ia galuega lea e fai ma ou te fiafia ai fo’i aua e le’o faia mo sesi tagata ese, o lea e fai e fesoasoani atu ai i le aiga.

“A lava ma totoe a matou mea’ai i le aso, e leai se loto mafatia ta te fa’alogoina.” O lana tala lea.  

“E pei o lo’u a’u a ia talitonuga, e te manuia a oe pea e fiafia i lau galuega na e fai ma e fa’amaoni ai fo’i. 

 “E le fa’apea o mea uma e fa’atatau i le tupe. Ou te fautuaina atu i tagata uma, tu’u le avea o tupe ma ou naunauta’iga.  

“Amata na e fa’atino galuega ia e te fiafia iai ma fai fa’alelei. 

 Sa ia fa’apea mai o lo’o ola lelei lona ma’umaga.

“Ou te alu a la e ave a’u mea mata i supamaketi ae e lelei fo’i lo’u totogi e maua mai ai. O lenei auala ou te talitonu a a’u ia e sili atu ai tua’iga fai pisinisi fa’apenei. 

 “E le gata fo’i la i le ma’umaga, ae e toto fo’i o’u pinati ma o se tupe tele fo’i lena. 

“O le pinati la, e tele a metotia e fai po’o le faasologa fo’i o mea e fai ae e le’i fa’atauina atu, ae e e le’o se galuega faigata aua ua ou masani ai.  

O se fa’amanuiga tele lea mo Ieremia ae pau lava se itu o lo’o popole ai o ia, ona ua tele fo’i isi aiga ua latou faia fo’i pinati aua se seleni maua.  

“E pei o se itu e lagona ai le fa’anoanoa i isi taimi pe a le taulia uma ia pinati ia e fa’atau e supamaketi i tagata fa’atau,” sa ia fa’apea mai. 

“E to’atele lava tagata o lo’o faia lenei ituaiga pisinisi ma so’o se mea fa’apena e tupu, ia pau a le mea e o’o ai, ia ua tauva uma tagata po’o ai e tele atu a latou pinati e fa’atau atu. 

 “E to’atele fo’i tagata ua su’e tupe i le fa’atauina atu o mea mata mai le ma’umaga. 

“Ae ou te talitonu, e le’o se mafua’aga lea e te fa’avaivai ai mai lou oe galuega fai. A maua a le loto alofa ma le fa’amalosi ‘au ia te oe, e leai se mea o lea tele ai fua fa’afitauli.

© Samoa Observer 2016

Developed by Samoa Observer in Apia