Fa’amanatu i le Palemene ‘Lo tatou vala’auina’

249 Hits

Afioga a le Ao Mamalu o Samoa, Tui Atua Tupua Tamasese Efi.

Afioga a le Ao Mamalu o Samoa, Tui Atua Tupua Tamasese Efi.

O le aso ananafi na malele ai  Lana Afioga a le Ao Mamalu o Samoa, o Tui Atua Tupua Tamasese Efi e fa’ama’ape ai le Paeaiga lona 15 a le Palemene o  le Malo Tuto’atasi o Samoa.

“Ma ona o tatou o ta’ita’i, o le tatou tiute tau’ave, o le mataala i ālāfua faatemokarasi, i faiga faavae, ina ia manino ma malamalama ia pulega malo, ma le pule a le Tulafono.  

“O le tatou matafaioi faaauau, ina ia o tatou molimau e lē gata iā i tatou, ae faapea ai i lo tatou atunuu, aemaise ai i lo tatou Atua.” 

O lea vaega taua na fa’ataunu’uina lea i le malae ta’alo i Tuana’imato ma e sili atu ma le selau i latou na mafai ona auai ai.

Na malele fo’i Lana Afioga i le tele o le mau fa’amanuiaga na ausia e le atunu’u i le lima tausaga ua mavae atu nei aemaise o le Lipoti fa’atatau i Aia Tatau o Tagata Ta’itasi.

“O se tasi o sini ‘autū o le faamoemoe, o se polokalame e ‘aualā ai ona laugatasia tagata uma – po o le ā lava lo latou tulaga, po o le ā le malosi tau tupe, ae avanoa ona latou maua se olaga e malu-puipuia ai lo latou soifua mālōlōina, lo latou mamalu, lo latou saogalemū, faapea ai ma lo latou olaga atia’e.

O le Fono Fa’avae le isi vaega na aofia i le malelega.

“O le tatou Fono Faavae, na faia e o tatou mātua ma nisi e i ai le tofa mo le tatou manuia nei ma ā taeao.  E ao lava iā i tatou, o ni ta’ita’i alofa ma le vaai mamao, ina ia tatou iloilo ma toe iloilo le tōfā, le aogā ma le amiotonu, le Fuaiupu o le Tulafono Faavae, ae tatou te le’i teuteu pe suia.  “O teuteuga o le Fono Faavae, e ao ona faia ina ua mae’a lelei ona liuliu faalā’au mamafa e le Maota.  Faaopoopo i ai ma se tuualalo a aiga, nuu ma itumalo.

Na ia vi’ia fo’i ma fa’afetaia le tele o vaega taua na ausia e le Palemene lea e aofia ai so’o se feso’ota’iga, o le taligamalo a Fono a Malo Laiti aemaise o le una’i malosi ina ia to’atele tama’ita’i i totonu o le Palemene.

“I le asō, ia tatou sula ma fiafia i sini ua ‘ausia i lenei 5 tausaga.  “Ma ia tatou manatua le sao ma le taulaga ua faia ina ia faamautūina le filemu ma le pulega malo lelei i lo tatou atunuu.

“E au ina mitamita ō tatou tagata i ā tatou tama ma teine taaalo, i faigamalo ma le ‘aufaipisinisi, ona ua faalauiloa atu i nei mafutaga ia le latou tomai ma le agavaa.  “Ma ua ‘avea lava i latou o ni faata’ita’iga lelei i ō tatou tupulaga.

Na taualaga lana malelega i le momoli ai lea o lana fa’afetai i a’i latou uma aemaise o le atunu’u atoa mo le sao taua i le atina’e o le atunu’u i le lima tausaga ua mavae.

“I le asō, ia tatou sula ma fiafia i sini ua ‘ausia i lenei 5 tausaga.  “Ma ia tatou manatua le sao ma le taulaga ua faia ina ia faamautūina le filemu ma le pulega malo lelei i lo tatou atunuu.  

“Ou te momoli atu le faamalo i le faigamalo, i le Itu Agai, i Sui Tuto’atasi, i le ‘aufaigaluega a le Palemene sa fai le latou sao i tulaga lelei ua aliali mai i le Nofoaiga a le Palemene Lona XV, mo le tou galuega e faia ma le alofa ma le pulunaunau mo Samoa ma lona tofi fa’aauau ma ia faamanuia le Atua i taualumaga o totoe.  

“Ou te faasilasila atu ai, ua tapunia aloa’ia le Paea’iga Lona XV a le Palemene o le Malo o Samoa.” 

Afioga Tui Atua Tupua Tamasese Efi.

(O le atoaga o le Malelega a le Ao Mamalu o le Malo, o le a lomia atoa atu i le aso-a-taeao”


© Samoa Observer 2016

Developed by Samoa Observer in Apia