Talosagaina e le Minisita Lagolago le talia o tagata sulufa’i ona o le suiga o le Tau

268 Hits

Minisita Lagolago o le Matagaluega o le M.N.R.E., Faumuina Tiatia Liuga.

Minisita Lagolago o le Matagaluega o le M.N.R.E., Faumuina Tiatia Liuga.

Tusia - Lanuola Tusani Tupufia 

Faaliliu e Seagaitumua Tupuola 

 

Ua una’ia le malo ina ia silasila i le talia o tagata sulufa’i ona o le suiga o le Tau mai atumotu laiti o latalata mai..O le talosaga lea a le Minisita Lagolago o le Matagaluega o Puna’oa Faale-Natura ma le Siosiomaga (M.N.R.E.) o Faumuina Tiatia Liuga.  

 “E ono fai mai Tokelau ia i tatou ua latou manana’o e fia o mai iinei talu ai ona ua molo’aua lo latou motu ona o le siitia pea o le maualuga o le suasami,” o le faaaliga lea a Faumuina. E ono faapena foi Niue ma o lona uiga o Samoa le nofoaga talafeagai mo tagata sulufa’i ona o le suiga o le Tau-mo tatou uso o loo i le Pasefika.”I lana lauga i totonu o le Palemene ananafi, na fautuaina foi e le Faipule mo Palauli Le Falefa e faapea atonu o le taimi lenei mo le malo e silasila ai i le faatuina o se faalapotopotoga fou e ta’ua o le Matagaluega o le Suiga o le Tau. 

O lea Matagaluega fou, fai mai a ia, e tatau ona gafa faapitoa ma tupe o loo tuuina mai e sui sooupu e foa’i mai ai tupe ma atunuu e galulue faatasi e faaitiitia le malosi o le suiga o le Tau.

 “Tatou te le iloa pe feagai a tatou fanau i le lumana’i ma ni faafitauli tau le maua mai o nei tupe faava-o-malo mo le puipuiga o tatou fanau ma faavaeina ni ala ‘alo i le va o motu,” o lana faaaliga lea. “E pei ona faaalia muamua e lo tatou Palemia, o nei tupe e le o ni tupe laiti. Afai la tatou te faaaogaina ma le tatau ia tupe, o le a fesoasoani lea e puipui lo tatou atunuu.” Na lagā foi e Faumuina le manatu e uiga i se ala i le va o motu. O lenei faiga o le a uia ai motu o Savaii ina ia mafai ai ona faaaogaina puna’oa faale-natura o loo maua ai, e aofia ai le suavai, 

Ae mo le uafu i Salelologa-na toe faamamafa e Faumuina lana talosaga muamua ina ia liua e avea ma taulaga faava-o-malo.O lena faiga, fai mai Faumuina, o le a nonofo ai iina tagata mai Savaii, ma faaitiitia ai lo latou mana’o e o mai i Apia. 

O le itu mulimuli, e i ai le matafaioi a Faumuina i le Itu Agai-o lona faanoanoa lea i le itiiti o le aofai o latou sui auai. Na ia faaalia lona faanoanoa ona o le le taunuuu o lo latou faamoemoe, fai mai e faatoese atu ona o le liua o latou sui auai e avea ma tagata e lagolagoina le H.R.P.P. Ae peitai-na fesiligia e le Faipule o le Tautua Samoa Parrty o Papalii Ta’eu Masipau Faumuina.

“O lau vaega ‘ea e igoa o le H.B.poo le H.A.” o lana fesili lea. Na te le’i faailoa mai pe o le a le uiga o le H.B. poo le H.A., ae fai mai le Ta’ita’i o le Itu Agai o Palusalue Faapo II, o sui o le Tautua Samoa Party e le taugofie.

Fai mai a ia e na o le toatasi lava le sui o le Tautua Samoa Party ua maua e Faumuina, ae le’i ta’ua e Palusalue le suafa o lea sui usufono. Sa faaauau taualumaga a le Palemene anapo.

© Samoa Observer 2016

Developed by Samoa Observer in Apia